agarche sham se muflis ki kuTiya mein andhera hai

agarche shaam se muflis kī kuTiyā meñ añdherā hai

tasavvur meñ magar us ke koī raushan saverā hai

nachātā hai zamāne ko hamesha biin par apnī

bharī duniyā meñ shāyad vaqt hī aisā saperā hai

kahīñ se lūTtā hai aur kahīñ par baañT detā hai

samajh paayā nahīñ koī ki vo kaisā luTerā hai

bahut jaldī thī maañ tujh ko ye duniyā chhoḌ jaane kī

batā kaisā jahāñ hai ab jahāñ terā baserā hai

bhale kartā rahe pāmāl 'izzat vo ġharīboñ kī

use har baat jaa.ez hai vo gaaoñ kā vaDera hai

likhā thā jo nasīboñ meñ use to ho ke rahnā thā

huā jo kuchh bhī us meñ haath terā hai na merā hai

karūñgī go mohabbat se chaman kī ābyārī maiñ

havā se Tuut saktā hai jo ik paudā chharerā hai

chalo ham bhī vahīñ chalte haiñ fasl-e-gul kī aamad hai

sunā hai āj-kal is shahr meñ ḳhushbū kā Derā hai

mujhe ab ḳhauf kaisā chilchilātī dhuup se 'azrā'

tirī palkoñ kā chehre par mire saayā ghanerā hai

agarche sham se muflis ki kuTiya mein andhera hai

tasawwur mein magar us ke koi raushan sawera hai

nachata hai zamane ko hamesha bin par apni

bhari duniya mein shayad waqt hi aisa sapera hai

kahin se luTta hai aur kahin par banT deta hai

samajh paya nahin koi ki wo kaisa luTera hai

bahut jaldi thi man tujh ko ye duniya chhoD jaane ki

bata kaisa jahan hai ab jahan tera basera hai

bhale karta rahe pamal 'izzat wo gharibon ki

use har baat jaez hai wo gaon ka waDera hai

likha tha jo nasibon mein use to ho ke rahna tha

hua jo kuchh bhi us mein hath tera hai na mera hai

karungi go mohabbat se chaman ki aabyari main

hawa se Tut sakta hai jo ek pauda chharera hai

chalo hum bhi wahin chalte hain fasl-e-gul ki aamad hai

suna hai aaj-kal is shahr mein KHushbu ka Dera hai

mujhe ab KHauf kaisa chilchilati dhup se 'azra'

teri palkon ka chehre par mere saya ghanera hai