ahwal-e-hadsat-e-safar tum se kyon kahun

ahvāl-e-hādsāt-e-safar tum se kyoñ kahūñ

kyā manzileñ thī kyā hai Dagar tum se kyoñ kahūñ

chīḳheñ haiñ kuchh ghuTī sī haiñ kuchh harf be-sadā

kahne ko kaafī kuchh hai magar tum se kyoñ kahūñ

hai mere dil meñ kyā ye mujhe tum batāoge

mujh ko hai mere dil kī ḳhabar tum se kyoñ kahūñ

kyā chāhte ho kaun ho aa.e kahāñ se ho

kyūñkar luTā ye dil kā nagar tum se kyoñ kahūñ

Dar hai ki tum baḌhāoge kuchh aur uljhaneñ

lekin maiñ apne ḳhauf-o-ḳhatar tum se kyoñ kahūñ

koī bhī haq nahīñ mire din raat par tumheñ

kaTte haiñ kaise shām-o-sahar tum se kyoñ kahūñ

tum ko udhar ye shauq suno dāstān-e-ġham

mujh ko ye zid lagī hai idhar tum se kyoñ kahūñ

tum shauq se bhale mujhe patthar pukār lo

maiñ jāntī huuñ maiñ huuñ guhar tum se kyoñ kahūñ

ahwal-e-hadsat-e-safar tum se kyon kahun

kya manzilen thi kya hai Dagar tum se kyon kahun

chiKHen hain kuchh ghuTi si hain kuchh harf be-sada

kahne ko kafi kuchh hai magar tum se kyon kahun

hai mere dil mein kya ye mujhe tum bataoge

mujh ko hai mere dil ki KHabar tum se kyon kahun

kya chahte ho kaun ho aae kahan se ho

kyunkar luTa ye dil ka nagar tum se kyon kahun

Dar hai ki tum baDhaoge kuchh aur uljhanen

lekin main apne KHauf-o-KHatar tum se kyon kahun

koi bhi haq nahin mere din raat par tumhein

kaTte hain kaise sham-o-sahar tum se kyon kahun

tum ko udhar ye shauq suno dastan-e-gham

mujh ko ye zid lagi hai idhar tum se kyon kahun

tum shauq se bhale mujhe patthar pukar lo

main jaanti hun main hun guhar tum se kyon kahun