ai mere thakte hue sae na kar takrar tu

ai mire thakte hue saa.e na kar takrār tū

ab safar meñ rah gayā hai ik mirā ġham-ḳhvār tū

is qadar masrūf thā vo shaḳhs us ne ek din

ḳhud se pūchhā āj-kal rahtā kahāñ hai yaar tū

baiThe baiThe yuuñ sirhāne kab se mujh bīmār ke

dekh merī maut ḳhud lagne lagī bīmār tū

chhoḌ kar zindāñ meñ tujh ko vo to kab ke jā chuke

jin kī tasvīreñ banātā hai sar-e-dīvār tū

ho rahā huuñ jo sar-e-sahrā zalīl-o-ḳhvār maiñ

ai kitāb-e-'ishq is hālat kī zimme-dār tū

sar na ḳham karne kī 'ādat ke natā.ej dekh le

mushtahar hai ab sar-e-kū-e-salīb-o-dār tū

ai mere thakte hue sae na kar takrar tu

ab safar mein rah gaya hai ek mera gham-KHwar tu

is qadar masruf tha wo shaKHs us ne ek din

KHud se puchha aaj-kal rahta kahan hai yar tu

baiThe baiThe yun sirhane kab se mujh bimar ke

dekh meri maut KHud lagne lagi bimar tu

chhoD kar zindan mein tujh ko wo to kab ke ja chuke

jin ki taswiren banata hai sar-e-diwar tu

ho raha hun jo sar-e-sahra zalil-o-KHwar main

ai kitab-e-'ishq is haalat ki zimme-dar tu

sar na KHam karne ki 'adat ke nataej dekh le

mushtahar hai ab sar-e-ku-e-salib-o-dar tu