aise waison se to ab pyar nahin kar sakta

aise vaisoñ se to ab pyaar nahīñ kar saktā

zindagī maiñ tujhe be-kār nahīñ kar saktā

karne vaalā hī to kartā hai karishme varna

har koī dariyā ba-zid paar nahīñ kar saktā

'ishq vo kaam hai sachchā ki mire ham-'asro

aisā vaisā ho adākār nahīñ kar saktā

mujh ko mahsūs jo karnā hai to yuuñ hī kar le

maiñ yaqīnan koī iz.hār nahīñ kar saktā

ḳhaar ko ḳhaar hī rakhtī hai ye ġhairat merī

aur jo hai phuul use ḳhaar nahīñ kar saktā

us kī ḳhvāhish hai to be-ḳhauf mire saath chale

varna chalne pe maiñ isrār nahīñ kar saktā

apnī bātoñ se mirī zaat pe gahrā jaadū

tum jo karte ho fusūñ-kār nahīñ kar saktā

sham' mahfil kī bujhe aur ta'alluq TuuTe

itnā 'muzmar' tumheñ lāchār nahīñ kar saktā

aise waison se to ab pyar nahin kar sakta

zindagi main tujhe be-kar nahin kar sakta

karne wala hi to karta hai karishme warna

har koi dariya ba-zid par nahin kar sakta

'ishq wo kaam hai sachcha ki mere ham-'asro

aisa waisa ho adakar nahin kar sakta

mujh ko mahsus jo karna hai to yun hi kar le

main yaqinan koi izhaar nahin kar sakta

KHar ko KHar hi rakhti hai ye ghairat meri

aur jo hai phul use KHar nahin kar sakta

us ki KHwahish hai to be-KHauf mere sath chale

warna chalne pe main israr nahin kar sakta

apni baaton se meri zat pe gahra jadu

tum jo karte ho fusun-kar nahin kar sakta

sham' mahfil ki bujhe aur ta'alluq TuTe

itna 'muzmar' tumhein lachaar nahin kar sakta