aman apni tarah aashna-e-fan to nahin

'amān' apnī tarah āshnā-e-fan to nahīñ

nashist-e-jāñ meñ koī apnā ham-suḳhan to nahīñ

nikal ke hujra-e-tanhā.ī se kisī se 'ishq

tumhāre kahne pe karte haiñ apnā man to nahīñ

burā na maan magar pūchhnā to paḌtā hai

ki bevafā.ī kahīñ tujh meñ fitratan to nahīñ

ye tū ne 'ishq jatāyā to maiñ ne maan liyā

hamāre biich magar aisā ġhāliban to nahīñ

qasam sabā kī ye ḳhushbū hai jānī-pahchānī

guloñ ke jism pe terā hī pairahan to nahīñ

kyoñ aaj manzar-e-shab itnā sahmā-sahmā hai

kisī charāġh kī zad par havā kā tan to nahīñ

hai Tuut jaane ke ḳhadshe meñ yaad kī kashtī

furāt-e-furqat-e-jāñ aaj maujzan to nahīñ

sadā.eñ aatī haiñ jangal se āh-o-zārī kī

pata karo ki parindoñ kī anjuman to nahīñ

'aman' apni tarah aashna-e-fan to nahin

nashist-e-jaan mein koi apna ham-suKHan to nahin

nikal ke hujra-e-tanhai se kisi se 'ishq

tumhaare kahne pe karte hain apna man to nahin

bura na man magar puchhna to paDta hai

ki bewafai kahin tujh mein fitratan to nahin

ye tu ne 'ishq jataya to main ne man liya

hamare bich magar aisa ghaaliban to nahin

qasam saba ki ye KHushbu hai jaani-pahchani

gulon ke jism pe tera hi pairahan to nahin

kyon aaj manzar-e-shab itna sahma-sahma hai

kisi charagh ki zad par hawa ka tan to nahin

hai Tut jaane ke KHadshe mein yaad ki kashti

furaat-e-furqat-e-jaan aaj maujzan to nahin

sadaen aati hain jangal se aah-o-zari ki

pata karo ki parindon ki anjuman to nahin