andhera chha na jae mah-paro jagte rahna

añdherā chhā na jaa.e māh-pāro jāgte rahnā

taqāza vaqt kā hai ai sahāro jāgte rahnā

mirī palkoñ pe ashkoñ ke sitāro jāgte rahnā

mire TuuTe hue dil ke sahāro jāgte rahnā

baḌī muddat meñ vasl-e-dost kī ye raat aa.ī hai

mire hamrāh tum bhī chāñd taaro jāgte rahnā

jilau meñ nuur le kar vo numāyāñ hone vaale haiñ

mirī chashm-e-tamannā ke sahāro jāgte rahnā

har ik dil meñ mohabbat kī abhī buniyād rakhnī hai

tabassum-rez hoñToñ ke sharāro jāgte rahnā

yahī to kah rahe haiñ inqilāb-e-vaqt ke tevar

bahut tūfān ā.eñge kināro jāgte rahnā

hazāroñ qāfile haiñ jāda-paimā rāh-e-ulfat meñ

zarā manzil ke tābinda ishāro jāgte rahnā

abhī dil-soḳhta hone meñ thoḌī der baaqī hai

abhī kuchh aur ai ġham ke sharāro jāgte rahnā

ye duniyā hai yahāñ ḳhvābīda rahnā ik qayāmat hai

yahī kahtā hai 'sādiq' ġham ke maaro jāgte rahnā

andhera chha na jae mah-paro jagte rahna

taqaza waqt ka hai ai sahaaro jagte rahna

meri palkon pe ashkon ke sitaro jagte rahna

mere TuTe hue dil ke sahaaro jagte rahna

baDi muddat mein wasl-e-dost ki ye raat aai hai

mere hamrah tum bhi chand taro jagte rahna

jilau mein nur le kar wo numayan hone wale hain

meri chashm-e-tamanna ke sahaaro jagte rahna

har ek dil mein mohabbat ki abhi buniyaad rakhni hai

tabassum-rez honTon ke shararo jagte rahna

yahi to kah rahe hain inqilab-e-waqt ke tewar

bahut tufan aaenge kinaro jagte rahna

hazaron qafile hain jada-paima rah-e-ulfat mein

zara manzil ke tabinda ishaaro jagte rahna

abhi dil-soKHta hone mein thoDi der baqi hai

abhi kuchh aur ai gham ke shararo jagte rahna

ye duniya hai yahan KHwabida rahna ek qayamat hai

yahi kahta hai 'sadiq' gham ke maro jagte rahna