andhi raat ke chehre par tariki ka ghaza tha

andhī raat ke chehre par tārīkī kā ġhāza thā

dhyān kī uThtī maujoñ meñ jazboñ kā āvāza thā

yuuñ to zaḳhm aur marham meñ ik fitrī samjhautā hai

lekin marham kyā kartā zaḳhm-e-mohabbat taaza thā

baasī phuul kī ḳhushbū ne saare 'uqde khol diye

us ke haath kī mehñdī se pahle sirf andāza thā

ham ko muqaddar chhoḌ gayā aur kisī dar par varna

jis par dastak denī thī vo us kā darvāza thā

ik mustahkam rishta hai bastī kā vīrāne se

ghar meñ motī bikhre the jangal meñ shīrāza thā

bastī kī pagDanDī se guzre the kuchh log abhī

'tālib' ham ko kyā mā'lūm Dolī thī kī janāza thā

andhi raat ke chehre par tariki ka ghaza tha

dhyan ki uThti maujon mein jazbon ka aawaza tha

yun to zaKHm aur marham mein ek fitri samjhauta hai

lekin marham kya karta zaKHm-e-mohabbat taza tha

basi phul ki KHushbu ne sare 'uqde khol diye

us ke hath ki mehndi se pahle sirf andaza tha

hum ko muqaddar chhoD gaya aur kisi dar par warna

jis par dastak deni thi wo us ka darwaza tha

ek mustahkam rishta hai basti ka virane se

ghar mein moti bikhre the jangal mein shiraaza tha

basti ki pagDanDi se guzre the kuchh log abhi

'talib' hum ko kya ma'lum Doli thi ki janaza tha