apna kirdar nibhate hue dushwari mein

apnā kirdār nibhāte hue dushvārī meñ

mar bhī saktā huuñ maiñ jiine kī adākārī meñ

koī tā'bīr kī tadbīr bhī ho saktī hai

vaqt barbād na kar ḳhvāb kī mismārī meñ

jab bhī maiñ dil se guzartā huuñ mohabbat le kar

mujh ko miltā hai vo rahgīr isī rahdārī meñ

us ko jangal kā nigahbān banāyā gayā hai

jo mulavvis thā parindoñ kī giraftārī meñ

she'r achānak kabhī sarzad nahīñ hotā mujh se

vaqt lagtā hai ḳhayāloñ ko numūdārī meñ

maiñ ne jalte hue kāġhaz pe use likkhā thā

nazm kī raakh paḌī hai mirī almārī meñ

ḳhvāb dekhūñgā khulī aañkh se 'āzar' ki mujhe

niiñd aatī hai isī ‘ālam-e-bedārī meñ

apna kirdar nibhate hue dushwari mein

mar bhi sakta hun main jine ki adakari mein

koi ta'bir ki tadbir bhi ho sakti hai

waqt barbaad na kar KHwab ki mismari mein

jab bhi main dil se guzarta hun mohabbat le kar

mujh ko milta hai wo rahgir isi rahdari mein

us ko jangal ka nigahban banaya gaya hai

jo mulawwis tha parindon ki giraftari mein

she'r achanak kabhi sarzad nahin hota mujh se

waqt lagta hai KHayalon ko numudari mein

main ne jalte hue kaghaz pe use likkha tha

nazm ki rakh paDi hai meri almari mein

KHwab dekhunga khuli aankh se 'azar' ki mujhe

nind aati hai isi ‘alam-e-bedari mein