apni aawaz ko auron se milane wale

apnī āvāz ko auroñ se milāne vaale

terī pahchān miTā deñge zamāne vaale

mere ḳhvāboñ se tirā koī ta'alluq hī nahīñ

kyoñ pareshān hai tā'bīr batāne vaale

makḌiyāñ ab na dahānoñ pe buneñgī jaalā

ġhair mahfūz haiñ sab ġhaar meñ jaane vaale

apne virse ke charāġhoñ ko jalāte hī nahīñ

ḳhvāhish-e-nūr bhī rakhte haiñ zamāne vaale

sāniha ek hī lamha ke liye aatā hai

'umr kaT jā.egī vo lamha bhulāne vaale

us kī palkeñ na chhalak aa.eñ javāban 'shāhid'

is liye ashk chhupāte haiñ hañsāne vaale

apni aawaz ko auron se milane wale

teri pahchan miTa denge zamane wale

mere KHwabon se tera koi ta'alluq hi nahin

kyon pareshan hai ta'bir batane wale

makDiyan ab na dahanon pe bunengi jala

ghair mahfuz hain sab ghaar mein jaane wale

apne wirse ke charaghon ko jalate hi nahin

KHwahish-e-nur bhi rakhte hain zamane wale

saniha ek hi lamha ke liye aata hai

'umr kaT jaegi wo lamha bhulane wale

us ki palken na chhalak aaen jawaban 'shahid'

is liye ashk chhupate hain hansane wale