apni buniyaad tere dil mein uThana hai mujhe

apnī buniyād tire dil meñ uThānā hai mujhe

naqsh banñe kā nahīñ phir bhī banānā hai mujhe

terī āñkhoñ se ye andāza kahāñ hotā hai

aa chukā huuñ tirī duniyā meñ ki aanā hai mujhe

tere hamrāh to maiñ yūñhī chalā aayā thā

apne hisse kī abhī ḳhaak uḌānā hai mujhe

ye jo āvāz kī lahr uTThī hai in āñkhoñ meñ

ab isī lahr pe bahte chale jaanā hai mujhe

kashtī-e-jāñ meñ mire ham-safaroñ meñ shāmil

kitne dariyā haiñ jinheñ paar lagānā hai mujhe

Dhalte Dhalte ye mah-o-sāl kī sūrat meñ Dhalā

ab mirā dil bhī zamānoñ sā zamāna hai mujhe

merā vā'da hai ġhubār-e-rah-e-dil se 'shāhīn'

abhī is dhuul meñ kuchh din nazar aanā hai mujhe

apni buniyaad tere dil mein uThana hai mujhe

naqsh banne ka nahin phir bhi banana hai mujhe

teri aankhon se ye andaza kahan hota hai

aa chuka hun teri duniya mein ki aana hai mujhe

tere hamrah to main yunhi chala aaya tha

apne hisse ki abhi KHak uDana hai mujhe

ye jo aawaz ki lahr uTThi hai in aankhon mein

ab isi lahr pe bahte chale jaana hai mujhe

kashti-e-jaan mein mere ham-safaron mein shamil

kitne dariya hain jinhen par lagana hai mujhe

Dhalte Dhalte ye mah-o-sal ki surat mein Dhala

ab mera dil bhi zamanon sa zamana hai mujhe

mera wa'da hai ghubar-e-rah-e-dil se 'shahin'

abhi is dhul mein kuchh din nazar aana hai mujhe