baat jo ki thi dil-lagi ke liye

baat jo kī thī dil-lagī ke liye

ban ga.ī baar zindagī ke liye

tere jaane ke baad barsoñ tak

lab taraste rahe hañsī ke liye

terī aamad kā gar yaqīñ hotā

aur jī lete ik ghaḌī ke liye

ḳhūn-e-dil pī ke muskurāte raho

ye bhī lāzim hai zindagī ke liye

ziist se kab ke aa chuke aajiz

jī rahe haiñ magar kisī ke liye

tan ke maare se kuchh nahīñ hogā

man ko maaro qalandarī ke liye

dard ġham rañj aah naala fuġhāñ

ai 'naresh' ek aap hī ke liye

baat jo ki thi dil-lagi ke liye

ban gai bar zindagi ke liye

tere jaane ke baad barson tak

lab taraste rahe hansi ke liye

teri aamad ka gar yaqin hota

aur ji lete ek ghaDi ke liye

KHun-e-dil pi ke muskuraate raho

ye bhi lazim hai zindagi ke liye

zist se kab ke aa chuke aajiz

ji rahe hain magar kisi ke liye

tan ke mare se kuchh nahin hoga

man ko maro qalandari ke liye

dard gham ranj aah nala fughan

ai 'naresh' ek aap hi ke liye