badan mein kaun ujala lakir khinchta hai

badan meñ kaun ujālā lakīr khīñchtā hai

ki jaise ḳhaak pe dariyā lakīr khīñchtā hai

kisī kisī ko hai tarbiyyat-e-suḳhan-sāzī

koī koī hai jo taaza lakīr khīñchtā hai

jab aur koī madad ke liye nahīñ aatā

to 'ishq dasht meñ tanhā lakīr khīñchtā hai

maiñ dā.ere ke tasallut se jab nikaltā huuñ

vo ism paḌh ke dobārā lakīr khīñchtā hai

'ajab nahīñ hai ki ham ḳhaak par judā ho jaa.eñ

ġhazab nahīñ hai ki lamha lakīr khīñchtā hai

vo apne baḳht kā likkhā bhī kaaT saktā thā

jo apne haath pe taaza lakīr khīñchtā hai

qubūliyat kī ghaḌī hai du'ā kareñ 'āzar'

falak pe surḳh sitāra lakīr khīñchtā hai

badan mein kaun ujala lakir khinchta hai

ki jaise KHak pe dariya lakir khinchta hai

kisi kisi ko hai tarbiyyat-e-suKHan-sazi

koi koi hai jo taza lakir khinchta hai

jab aur koi madad ke liye nahin aata

to 'ishq dasht mein tanha lakir khinchta hai

main daere ke tasallut se jab nikalta hun

wo ism paDh ke dobara lakir khinchta hai

'ajab nahin hai ki hum KHak par juda ho jaen

ghazab nahin hai ki lamha lakir khinchta hai

wo apne baKHt ka likkha bhi kaT sakta tha

jo apne hath pe taza lakir khinchta hai

qubuliyat ki ghaDi hai du'a karen 'azar'

falak pe surKH sitara lakir khinchta hai