badla hua hai rang-e-gulistan mere liye

badlā huā hai rañg-e-gulistāñ mire liye

ḳhuuñ ro rahī hai chashm-e-bahārāñ mire liye

faiz-e-junūn-e-shauq ke qurbān jā.iye

vus.at hai do-jahān kī zindāñ mire liye

sab ahl-e-dil haiñ terī nigāhoñ se faizyāb

ab tū kahāñ hai sirf mirī jaañ mire liye

maiñ ḳhud hī chhoḌ jā.ūñgā ye mahfil-e-hayāt

kyoñ ho rahe ho itne pareshāñ mire liye

vo zindagī jise tirī mahfil meñ baar thā

ab ho ga.ī hai ḳhvāb-e-gurezāñ mire liye

ai mere chāk-chāk garebāñ se be-ḳhabar

tū bhī phiregā chāk-garebāñ mire liye

phūloñ ke naaz ahl-e-chaman ko raheñ nasīb

ḳhandāñ haiñ ḳhārh-ā-e-bayābāñ mire liye

badla hua hai rang-e-gulistan mere liye

KHun ro rahi hai chashm-e-bahaaran mere liye

faiz-e-junun-e-shauq ke qurban jaiye

wusat hai do-jahan ki zindan mere liye

sab ahl-e-dil hain teri nigahon se faizyab

ab tu kahan hai sirf meri jaan mere liye

main KHud hi chhoD jaunga ye mahfil-e-hayat

kyon ho rahe ho itne pareshan mere liye

wo zindagi jise teri mahfil mein bar tha

ab ho gai hai KHwab-e-gurezan mere liye

ai mere chaak-chaak gareban se be-KHabar

tu bhi phirega chaak-gareban mere liye

phulon ke naz ahl-e-chaman ko rahen nasib

KHandan hain KHarh-a-e-bayaban mere liye