baghair samt hua hun main dar-ba-dar kaisa

baġhair samt huā huuñ maiñ dar-ba-dar kaisā

mujhe bhī ḳhvāb dikhā.ī diyā magar kaisā

ḳhayāl ḳhātir-e-abr-e-bahār kar na sake

ḳhizāñ ne luuT liyā ab ke ghar kā ghar kaisā

na vo hurūf meñ ḳhushbū na vo suḳhan kī miThās

badal diyā hai zamāne ne ham-safar kaisā

ham ahal-e-ḳhair nikal aa.e kis ḳharābe meñ

nizām-e-shar meñ banā.eñ ab apnā ghar kaisā

maiñ apne aap hī apnā vajūd bech aayā

mujhe rakhā mire apnoñ ne be-ḳhabar kaisā

ham apne ghar meñ haiñ zinda misāl shabnam-e-gul

banā hai partav-e-ḳhur ye hisār-e-dar kaisā

gayā jo de ke aziyyat-shanāsā.iyāñ 'manzar'

milā dobāra to aayā tumheñ nazar kaisā

baghair samt hua hun main dar-ba-dar kaisa

mujhe bhi KHwab dikhai diya magar kaisa

KHayal KHatir-e-abr-e-bahaar kar na sake

KHizan ne luT liya ab ke ghar ka ghar kaisa

na wo huruf mein KHushbu na wo suKHan ki miThas

badal diya hai zamane ne ham-safar kaisa

hum ahal-e-KHair nikal aae kis KHarabe mein

nizam-e-shar mein banaen ab apna ghar kaisa

main apne aap hi apna wajud bech aaya

mujhe rakha mere apnon ne be-KHabar kaisa

hum apne ghar mein hain zinda misal shabnam-e-gul

bana hai partaw-e-KHur ye hisar-e-dar kaisa

gaya jo de ke aziyyat-shanasaiyan 'manzar'

mila dobara to aaya tumhein nazar kaisa