ban gaya sina mera madfan dil-e-betab ka

ban gayā siina mirā madfan dil-e-betāb kā

dekhiye anjām kyā ho dīda-e-ḳhūñ-nāb kā

dil pe kyā guzrī dam-e-furqat batā.ūñ kis tarah

haal dekhā hai nā tum ne māhī-e-be-āb kā

bech aa.e ho suḳhan bhī az-rah-e-nām-o-numūd

kis qadar hai shauq tum ko tamġha-o-alqāb kā

raas aatā hī nahīñ dil ko hujūm-e-dostāñ

muḳhtasar hai is liye halqa mire ahbāb kā

bulbul-e-ḳhush-lahn kī bhī naġhmagī jaatī rahī

yaar kitnā talḳh hai lahja tirī mizrāb kā

bā-ḳhudā us shaḳhs kī raushan jabīñ ke sāmne

rang phīkā paḌ gayā thā ‘āriz-e-mahtāb kā

raat us vahshat-sifat ko muskurātā dekh kar

sub.h-dam sadqa utārā ham ne apne ḳhvāb kā

ban gaya sina mera madfan dil-e-betab ka

dekhiye anjam kya ho dida-e-KHun-nab ka

dil pe kya guzri dam-e-furqat bataun kis tarah

haal dekha hai na tum ne mahi-e-be-ab ka

bech aae ho suKHan bhi az-rah-e-nam-o-numud

kis qadar hai shauq tum ko tamgha-o-alqab ka

ras aata hi nahin dil ko hujum-e-dostan

muKHtasar hai is liye halqa mere ahbab ka

bulbul-e-KHush-lahn ki bhi naghmagi jati rahi

yar kitna talKH hai lahja teri mizrab ka

ba-KHuda us shaKHs ki raushan jabin ke samne

rang phika paD gaya tha ‘ariz-e-mahtab ka

raat us wahshat-sifat ko muskuraata dekh kar

subh-dam sadqa utara hum ne apne KHwab ka