barae lail-o-nahaar aaine se guzrega

barā.e lail-o-nahār aa.ine se guzregā

jahāñ kā gard-o-ġhubār aa.ine se guzregā

lipaT lipaT ke judā hogā 'aks-e-ḳhush-andāz

ulajh ulajh ke ye taar aa.ine se guzregā

kisī bhī naqsh ko zanjīr kī nahīñ hājat

ḳhud aap chal ke shikār aa.ine se guzregā

nazar na ho to savāl uThtā hai nazāre par

badan na ho to ġhubār aa.ine se guzregā

sabab banā to khulegī girah tasavvur kī

madad milī to madār aa.ine se guzregā

uThā ke dhund zamānoñ kī ḳhāl-o-ḳhad se udhar

charāġh-e-'aks guzār aa.ine se guzregā

maiñ kis tarah use pahchān pā.ūñgā 'āzar'

jo ek ho ke hazār aa.ine se guzregā

barae lail-o-nahaar aaine se guzrega

jahan ka gard-o-ghubar aaine se guzrega

lipaT lipaT ke juda hoga 'aks-e-KHush-andaz

ulajh ulajh ke ye tar aaine se guzrega

kisi bhi naqsh ko zanjir ki nahin hajat

KHud aap chal ke shikar aaine se guzrega

nazar na ho to sawal uThta hai nazare par

badan na ho to ghubar aaine se guzrega

sabab bana to khulegi girah tasawwur ki

madad mili to madar aaine se guzrega

uTha ke dhund zamanon ki KHal-o-KHad se udhar

charagh-e-'aks guzar aaine se guzrega

main kis tarah use pahchan paunga 'azar'

jo ek ho ke hazar aaine se guzrega