dasht-e-ehsas junun-KHez hai KHak uDti hai
dasht-e-ehsās junūñ-ḳhez hai ḳhaak uḌtī hai
kyā kiyā jaa.e havā tez hai ḳhaak uḌtī hai
paañv rakhtā hai koī vahshī zamīn-e-dil par
aur zamīñ ḳhaak se labrez hai ḳhaak uḌtī hai
pur-sukūñ ḳhaak pe sayyāh qabīla utrā
jiskā har fard safar-ḳhez hai ḳhaak uḌtī hai
ek bhīgā huā sahrā hai mire ghar ke qarīb
ek sūkhī huī kārez hai ḳhaak uḌtī hai
phir vahī hijr vahī yaad ke sahrā kā safar
phir vahī kursī vahī mez hai ḳhaak uḌtī hai
ḳhaak uḌāte haiñ man-o-tū kī zamāne vaale
koī ruumī koī tabrez hai ḳhaak uḌtī hai
in dinoñ sab pe junūñ taarī hai 'āzar' sar-e-ḳhāk
in dinoñ amn se parhez hai ḳhaak uḌtī hai
dasht-e-ehsas junun-KHez hai KHak uDti hai
kya kiya jae hawa tez hai KHak uDti hai
panw rakhta hai koi wahshi zamin-e-dil par
aur zamin KHak se labrez hai KHak uDti hai
pur-sukun KHak pe sayyah qabila utra
jiska har fard safar-KHez hai KHak uDti hai
ek bhiga hua sahra hai mere ghar ke qarib
ek sukhi hui karez hai KHak uDti hai
phir wahi hijr wahi yaad ke sahra ka safar
phir wahi kursi wahi mez hai KHak uDti hai
KHak uDate hain man-o-tu ki zamane wale
koi rumi koi tabrez hai KHak uDti hai
in dinon sab pe junun tari hai 'azar' sar-e-KHak
in dinon amn se parhez hai KHak uDti hai
- Book : Sooraj Mukhi Ka Phool (Pg. 50)
- Author : Dilawar Ali Aazar
- Publication : Rekhta Publications (2022)
- Edition : 2nd
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
