dasht roz-o-shab mein dil-e-betab ko taza rakhna

dasht roz-o-shab meñ dil-e-betāb ko taaza rakhnā

āñkheñ be-shak jhaḌ jaa.eñ ik ḳhvāb ko taaza rakhnā

maiñ bhī apnī pyaas nahīñ bujhne dūñgā aur tum bhī

apne sahrā ke har ek sarāb ko taaza rakhnā

jazboñ kī is jhiil meñ soch kī kaa.ī na jamne paa.e

apnī tamannā ke aks-e-mahtāb ko taaza rakhnā

shāḳh hunar se toḌ ke sher kā phuul maiñ us ko de duuñ

us kī zulf ko hai ma.alūm gulāb ko taaza rakhnā

is tārīk udaas aur band galī meñ rahte log

rāste raushnī aur ḳhushbū ke ḳhvāb ko taaza rakhnā

dasht roz-o-shab mein dil-e-betab ko taza rakhna

aankhen be-shak jhaD jaen ek KHwab ko taza rakhna

main bhi apni pyas nahin bujhne dunga aur tum bhi

apne sahra ke har ek sarab ko taza rakhna

jazbon ki is jhil mein soch ki kai na jamne pae

apni tamanna ke aks-e-mahtab ko taza rakhna

shaKH hunar se toD ke sher ka phul main us ko de dun

us ki zulf ko hai malum gulab ko taza rakhna

is tarik udas aur band gali mein rahte log

raste raushni aur KHushbu ke KHwab ko taza rakhna