dip yaadon ke dafinon pe jala kar soe

diip yādoñ ke dafīnoñ pe jalā kar so.e

ḳhud pe uftād na.ī roz uThā kar so.e

dil ke armān ka.ī ahl-e-suḳhan raat ga.e

ek gumnām udāsī ko sunā kar so.e

phir shab-e-hijr ke siine pe lagā.ī Thokar

sher do-chār na.e phir se banā kar so.e

mujh ko ik bahr-e-aziyyat kā havāla de kar

shab kahīñ vasl ke dariyā meñ nahā kar so.e

vo tirī haañ meñ sadā haañ hī milāne vaale

ḳhud pe ab daaġh munāfiq kā sajā kar so.e

kal ga.e raat javānī se rihā.ī māñgī

bachpane daur ko pahlū meñ liTā kar so.e

rabb-ul-arbāb kī jaarī hoñ atā.eñ mujh pe

mere ahbāb agar mujh ko duā kar so.e

din kisī yaad ke saa.e meñ guzārā lekin

raat ham dard ke qadmoñ meñ bichhā kar so.e

tere atrāf hī ghūme hai taḳhayyul merā

merī har ek ġhazal tujh ko sulā kar so.e

raat bhar niiñd se rahtī hai laḌā.ī merī

tū mire yaar agar mujh ko bhulā kar so.e

ishq to ḳhair 'ḳhalīl' ab bhī bulā.e lekin

kis meñ himmat hai shab-e-hijr manā kar so.e

dip yaadon ke dafinon pe jala kar soe

KHud pe uftad nai roz uTha kar soe

dil ke arman kai ahl-e-suKHan raat gae

ek gumnam udasi ko suna kar soe

phir shab-e-hijr ke sine pe lagai Thokar

sher do-chaar nae phir se bana kar soe

mujh ko ek bahr-e-aziyyat ka hawala de kar

shab kahin wasl ke dariya mein naha kar soe

wo teri han mein sada han hi milane wale

KHud pe ab dagh munafiq ka saja kar soe

kal gae raat jawani se rihai mangi

bachpane daur ko pahlu mein liTa kar soe

rabb-ul-arbab ki jari hon ataen mujh pe

mere ahbab agar mujh ko dua kar soe

din kisi yaad ke sae mein guzara lekin

raat hum dard ke qadmon mein bichha kar soe

tere atraf hi ghume hai taKHayyul mera

meri har ek ghazal tujh ko sula kar soe

raat bhar nind se rahti hai laDai meri

tu mere yar agar mujh ko bhula kar soe

ishq to KHair 'KHalil' ab bhi bulae lekin

kis mein himmat hai shab-e-hijr mana kar soe