husn-e-jaanan ne kiya hai hamein mashur zara

husn-e-jānāñ ne kiyā hai hameñ mas.hūr zarā

dīda-e-shauq ne bhī kar diyā mahsūr zarā

jaan par merī ban aa.ī hai ḳhudā ḳhair kare

chashm-e-qātil ko kare ab koī mastūr zarā

shahr meñ ham se kahāñ pahle koī vāqif thā

nisbat-e-yār se ham bhī hue mash.hūr zarā

ham ne dekhā hai vo sar kaaT diye jaate haiñ

bā-ḳhudā jo bhī yahāñ hote haiñ maġhrūr zarā

har koī jaan hathelī pe yahāñ rakhtā hai

shahr-e-dil kā ba-ḳhudā haT ke he dastūr zarā

ham ko mat sahl samajhnā are nādān kabhī

bas-ki ham vaqt ke hāthoñ hue majbūr zarā

dekhnā kaise tumhārā ye futūr utregā

tum ki tāqat ke nashe meñ ho abhī chuur zarā

har qadam soch ke ham ko ab uThānā hogā

bas-ki manzil hai hamārī abhī kuchh duur zarā

mushkiloñ se kabhī ghabrāte nahīñ 'ash.har' ham

bas-ki hālāt ke hāthoñ hue ranjūr zarā

husn-e-jaanan ne kiya hai hamein mashur zara

dida-e-shauq ne bhi kar diya mahsur zara

jaan par meri ban aai hai KHuda KHair kare

chashm-e-qatil ko kare ab koi mastur zara

shahr mein hum se kahan pahle koi waqif tha

nisbat-e-yar se hum bhi hue mashhur zara

hum ne dekha hai wo sar kaT diye jate hain

ba-KHuda jo bhi yahan hote hain maghrur zara

har koi jaan hatheli pe yahan rakhta hai

shahr-e-dil ka ba-KHuda haT ke he dastur zara

hum ko mat sahl samajhna are nadan kabhi

bas-ki hum waqt ke hathon hue majbur zara

dekhna kaise tumhaara ye futur utrega

tum ki taqat ke nashe mein ho abhi chur zara

har qadam soch ke hum ko ab uThana hoga

bas-ki manzil hai hamari abhi kuchh dur zara

mushkilon se kabhi ghabraate nahin 'ashhar' hum

bas-ki haalat ke hathon hue ranjur zara