ek ajab hi silsila tha main na tha

ik ajab hī silsila thā maiñ na thā

mujh meñ koī rah rahā thā maiñ na thā

maiñ kisī kā aks huuñ mujh par khulā

aa.ine kā aa.ina thā maiñ na thā

maiñ tumhārā mas.ala hargiz na thā

ye tumhārā mas.ala thā maiñ na thā

phir khulā maiñ donoñ ke mābain huuñ

ik zarā sā fāsla thā maiñ na thā

ek ziine par qadam jaise rukeñ

tirī rah kā marhala thā maiñ na thā

vo jo ik gum-karda-rah thā dasht meñ

vo to merā rahnumā thā maiñ na thā

ūñchī nīchī raah mahv-e-raqs thī

Dagmagātā rāsta thā maiñ na thā

tum ne jis se samt pūchhī dasht meñ

vo koī qibla-numā thā maiñ na thā

ye kahānī thī magar merī na thī

vo jo mard-e-mājrā thā maiñ na thā

maiñ to apnī shāḳh se thā muttasil

paat jo vaqf-e-havā thā maiñ na thā

ḳhud se mil kar bujh gayā thā maiñ to kal

diip jo shab bhar jalā thā maiñ na thā

maiñ na thā kahtā thā jo har baat par

vo to koī dūsrā thā maiñ na thā

maiñ to 'ahmad' kab se mahv-e-yās huuñ

kal jo mahfil meñ hañsā thā maiñ na thā

ek ajab hi silsila tha main na tha

mujh mein koi rah raha tha main na tha

main kisi ka aks hun mujh par khula

aaine ka aaina tha main na tha

main tumhaara masala hargiz na tha

ye tumhaara masala tha main na tha

phir khula main donon ke mabain hun

ek zara sa fasla tha main na tha

ek zine par qadam jaise ruken

teri rah ka marhala tha main na tha

wo jo ek gum-karda-rah tha dasht mein

wo to mera rahnuma tha main na tha

unchi nichi rah mahw-e-raqs thi

Dagmagata rasta tha main na tha

tum ne jis se samt puchhi dasht mein

wo koi qibla-numa tha main na tha

ye kahani thi magar meri na thi

wo jo mard-e-majra tha main na tha

main to apni shaKH se tha muttasil

pat jo waqf-e-hawa tha main na tha

KHud se mil kar bujh gaya tha main to kal

dip jo shab bhar jala tha main na tha

main na tha kahta tha jo har baat par

wo to koi dusra tha main na tha

main to 'ahmad' kab se mahw-e-yas hun

kal jo mahfil mein hansa tha main na tha