ek ariza hai dil-e-mushtaq mein rakkha hua

ik arīza hai dil-e-mushtāq meñ rakkhā huā

āftāb-e-ishq hai āfāq meñ rakkhā huā

zindagī kā zā.iqa mujh ko tavātur se milā

zahr meñ rakhā huā tiryāq meñ rakkhā huā

nafratoñ ke sab navishte us ne azbar kar liye

hai mohabbat kā sahīfa taaq meñ rakhā huā

balva-e-bātil meñ haq kī ḳhāmushī kā saath do

ye bhī nukta hai mire mīsāq meñ rakkhā huā

raakh uḌtī dekh kar mujh se gurezāñ kyoñ hue

ek sho.ala hai abhī chaqmāq meñ rakkhā huā

maiñ ne dekhā merā qātil mubtalā-e-ḳhauf hai

sar mirā thā jis ghaḌī itbāq meñ rakkhā huā

lau na maddham hogī 'manzar' bujh na pā.egā kabhī

ye diyā hai sīna-e-ushshāq meñ rakkhā huā

ek ariza hai dil-e-mushtaq mein rakkha hua

aaftab-e-ishq hai aafaq mein rakkha hua

zindagi ka zaiqa mujh ko tawatur se mila

zahr mein rakha hua tiryaq mein rakkha hua

nafraton ke sab nawishte us ne azbar kar liye

hai mohabbat ka sahifa taq mein rakha hua

balwa-e-baatil mein haq ki KHamushi ka sath do

ye bhi nukta hai mere misaq mein rakkha hua

rakh uDti dekh kar mujh se gurezan kyon hue

ek shoala hai abhi chaqmaq mein rakkha hua

main ne dekha mera qatil mubtala-e-KHauf hai

sar mera tha jis ghaDi itbaq mein rakkha hua

lau na maddham hogi 'manzar' bujh na paega kabhi

ye diya hai sina-e-ushshaq mein rakkha hua