ek naya manzar har ek kawish ke pas-manzar mein tha

ik nayā manzar har ik kāvish ke pas-manzar meñ thā

koh-paimānī kā saudā kohkan ke sar meñ thā

har izāfat se judā hotā to tujh ko jāntā

aadmī vaqt-o-makāñ ke gumbad-e-be-dar meñ thā

dast-e-qātil kā irāda sab pe zāhir thā magar

sab se poshīda thā vo mafhūm jo ḳhanjar meñ thā

kaun batlā.e ki be-mā'nī hai ashyā kā tazād

ye haqīqat hai ki har zarḳhez ik banjar meñ thā

jism kī dīvār se Takrā ke nazreñ muḌ ga.iiñ

log bāhar DhūñDhte the aur maiñ apne ghar meñ thā

chashm-e-basta se thā maiñ āvāra-e-dasht-o-jabal

jab khulīñ āñkheñ to maiñ leTā huā bistar meñ thā

ek naya manzar har ek kawish ke pas-manzar mein tha

koh-paimani ka sauda kohkan ke sar mein tha

har izafat se juda hota to tujh ko jaanta

aadmi waqt-o-makan ke gumbad-e-be-dar mein tha

dast-e-qatil ka irada sab pe zahir tha magar

sab se poshida tha wo mafhum jo KHanjar mein tha

kaun batlae ki be-ma'ni hai ashya ka tazad

ye haqiqat hai ki har zarKHez ek banjar mein tha

jism ki diwar se Takra ke nazren muD gain

log bahar DhunDhte the aur main apne ghar mein tha

chashm-e-basta se tha main aawara-e-dasht-o-jabal

jab khulin aankhen to main leTa hua bistar mein tha