phir yun hua ki saya daraKHton ka jal gaya

phir yuuñ huā ki saaya daraḳhtoñ kā jal gayā

garmī se mere paañv kī rasta pighal gayā

phir yuuñ huā ki chīḳh uThā bām-e-āsmāñ

aur āftāb roz-e-judā.ī kā Dhal gayā

phir yuuñ huā ki paḌ gayā zanjīr meñ shigāf

aur us shigāf se mirā nauha nikal gayā

phir yuuñ huā ki shāḳh-e-badan sansanā uThī

maiñ ne ye samjhā goyā koī tiir chal gayā

phir yuuñ huā ki surḳh daraḳhtoñ kī chhāoñ meñ

mere safed 'ishq kā mausam badal gayā

phir yuuñ huā ki dā.ere meñ aag lag ga.ī

kyā jaane 'ishq kaun sā kar ke 'amal gayā

phir yuuñ huā ki chaḌh gayā tezāb kā nasha

apne hī ḳhuun par mirā paañv phisal gayā

phir yuuñ huā ki chalne lagīñ goliyāñ 'shafaq'

maiñ us galī meñ lauT ke ghuTnoñ ke bal gayā

phir yun hua ki saya daraKHton ka jal gaya

garmi se mere panw ki rasta pighal gaya

phir yun hua ki chiKH uTha baam-e-asman

aur aaftab roz-e-judai ka Dhal gaya

phir yun hua ki paD gaya zanjir mein shigaf

aur us shigaf se mera nauha nikal gaya

phir yun hua ki shaKH-e-badan sansana uThi

main ne ye samjha goya koi tir chal gaya

phir yun hua ki surKH daraKHton ki chhaon mein

mere safed 'ishq ka mausam badal gaya

phir yun hua ki daere mein aag lag gai

kya jaane 'ishq kaun sa kar ke 'amal gaya

phir yun hua ki chaDh gaya tezab ka nasha

apne hi KHun par mera panw phisal gaya

phir yun hua ki chalne lagin goliyan 'shafaq'

main us gali mein lauT ke ghuTnon ke bal gaya