tamam dard ko chehre pe iqtibas kiya

tamām dard ko chehre pe iqtibās kiyā

ki ik hañsī ne har ik ġham ko be-libās kiyā

tumhārā hausla rakhne ko hañs diye varna

tumhārī baat ne ham ko sivā udaas kiyā

na rāste kī ḳhabar hī rahī na manzil kī

safar ke shauq ne kis darja bad-havās kiyā

jahāñ se uTh ke chale the jahāñ-navardī ko

safar tamām usī dar ke ās-pās kiyā

faqat ḳhushī hī se vāqif thī nā-samajh ab tak

nazar ko kitnī mashaqqat se ġham-shanās kiyā

vo jis ko kah ke koī bhuul bhī gayā kab kā

tamām 'umr us ik baat kā hī paas kiyā

har ek shai kī zarūrat paḌī kahānī meñ

kabhī ḳhushī to kabhī ġham se iltimās kiyā

tamam dard ko chehre pe iqtibas kiya

ki ek hansi ne har ek gham ko be-libas kiya

tumhaara hausla rakhne ko hans diye warna

tumhaari baat ne hum ko siwa udas kiya

na raste ki KHabar hi rahi na manzil ki

safar ke shauq ne kis darja bad-hawas kiya

jahan se uTh ke chale the jahan-nawardi ko

safar tamam usi dar ke aas-pas kiya

faqat KHushi hi se waqif thi na-samajh ab tak

nazar ko kitni mashaqqat se gham-shanas kiya

wo jis ko kah ke koi bhul bhi gaya kab ka

tamam 'umr us ek baat ka hi pas kiya

har ek shai ki zarurat paDi kahani mein

kabhi KHushi to kabhi gham se iltimas kiya