tere karam ne mujhe kar liya qubul magar

tire karam ne mujhe kar liyā qubūl magar

mire junūñ se mohabbat kā haq adā na huā

tire ġhamoñ ne mire har nashāt ko samjhā

mirā nashāt tire ġham se āshnā na huā

kahāñ kahāñ na mire paañv laḌkhaḌā.e magar

tirā sabāt 'ajab thā ki hādisa na huā

tire dukhoñ ne pukārā to maiñ qarīb na thā

mire ġhamoñ ne sadā dī to fāsla na huā

hazār dashna-o-ḳhanjar the mere lahje meñ

tirī zabāñ pe kabhī harf-e-nā-ravā na huā

hazār sham'oñ kā bantā rahā maiñ parvāna

kisī kā ghar tire dil meñ mire sivā na huā

mirī siyāhī-e-dāman ko dekhne par bhī

tire safed dupaTToñ kā dil burā na havā

tere karam ne mujhe kar liya qubul magar

mere junun se mohabbat ka haq ada na hua

tere ghamon ne mere har nashat ko samjha

mera nashat tere gham se aashna na hua

kahan kahan na mere panw laDkhaDae magar

tera sabaat 'ajab tha ki hadisa na hua

tere dukhon ne pukara to main qarib na tha

mere ghamon ne sada di to fasla na hua

hazar dashna-o-KHanjar the mere lahje mein

teri zaban pe kabhi harf-e-na-rawa na hua

hazar sham'on ka banta raha main parwana

kisi ka ghar tere dil mein mere siwa na hua

meri siyahi-e-daman ko dekhne par bhi

tere safed dupaTTon ka dil bura na hawa