TuTe hue diye ko sunsan shab mein rakkha

TuuTe hue diye ko sunsān shab meñ rakkhā

us par mirī zabāñ ko hadd-e-adab meñ rakkhā

kis ne sikhāyā saa.il ko bhuuk kā tarāna

phir kis ne lā ke kaasa dast-e-talab meñ rakkhā

muflis kī chhat ke nīche kumhlā ga.e haiñ bachche

phūloñ ko lā ke kis ne chashm-e-ġhazab meñ rakkhā

parvardigār ne to taqvā kī baat kī thī

tum ne fazīlatoñ ko nām-o-nasab meñ rakkhā

dar-asl tum se mil kar maiñ ḳhud se mil sakūñgā

bas ek hī sabab hai dārussabab meñ rakkhā

bas dil kī anjuman hai yādoñ ke nastaran haiñ

ab aur kyā hai baaqī is jāñ-ba-lab meñ rakkhā

'ahmad' meñ baat dil kī kahtā to kis se kahtā

naġhma sukūt kā thā shor-o-shaġhab meñ rakkhā

TuTe hue diye ko sunsan shab mein rakkha

us par meri zaban ko hadd-e-adab mein rakkha

kis ne sikhaya sail ko bhuk ka tarana

phir kis ne la ke kasa dast-e-talab mein rakkha

muflis ki chhat ke niche kumhla gae hain bachche

phulon ko la ke kis ne chashm-e-ghazab mein rakkha

parwardigar ne to taqwa ki baat ki thi

tum ne fazilaton ko nam-o-nasab mein rakkha

dar-asl tum se mil kar main KHud se mil sakunga

bas ek hi sabab hai darussabab mein rakkha

bas dil ki anjuman hai yaadon ke nastaran hain

ab aur kya hai baqi is jaan-ba-lab mein rakkha

'ahmad' mein baat dil ki kahta to kis se kahta

naghma sukut ka tha shor-o-shaghab mein rakkha