ahl-e-hind

inqilāb-e-dahr se sab shaan vaale miT ga.e

ruum vaale miT ga.e yūnān vaale miT ga.e

syria vaale miTe tūrān vaale miT ga.e

kaun kahtā hai ki hindustān vaale miT ga.e

naqsh-e-bātil ham nahīñ jis ko miTā.e āsmāñ

ham nahīñ miTne ke jab tak hai binā-e-āsmāñ

ham ne ye maanā hamāre aan vaale miT ga.e

bhoj se vikram se 'ālī-shān vaale miT ga.e

bhīshm-o-arjun se yodhdhā baan vaale miT ga.e

akbar-o-partāp se maidān vaale miT ga.e

nām-levā un ke ham zer-e-falak baaqī to haiñ

miTte miTte bhī jahāñ meñ aaj tak baaqī to haiñ

ḳhaak se is desh kī paidā hue vo nāmvar

naqsh jin ke kārnāme haiñ bisāt-e-dahr par

dabdabe se jin ke jhukte the sar-afrāzoñ ke sar

jin kā lohā mānte haiñ hukmrān-e-bahr-o-bar

teġh-o-tarkash ke dhanī the razm-gah meñ fard the

is shujā'at par ye turra hai sarāpā dard the

āshnā-e-rāz-e-vahdat falsafī-e-be-misāl

gauhar-e-dariyā-e-dānish nukta-dān-e-bā-kamāl

māhir-e-‘ilm-o-hunar sheva-bayāñ shīrīñ-maqāl

rāst-bāzū sulh-jū pākīza-ḳhū raushan-ḳhayāl

bāda-e-tahzīb se vo sar-ba-sar maḳhmūr the

qalb-e-raushan mā'rifat ke nuur se pur-nūr the

kyā the ahl-e-hind ye charḳh-e-kuhan se pūchh lo

yā himāla kī guphāoñ ke dahan se pūchh lo

apnā afsāna lab-e-gang-o-jaman se pūchh lo

pūchh lo har zarra-e-ḳhāk-e-vatan se pūchh lo

apne muñh se kyā batā.eñ ham ki kyā vo log the

nafs-kush nekī ke putle the mujassam yog the

ham mu’arra ho ke in ausāf se pastī meñ haiñ

daulat-e-‘ilm-o-‘amal kho kar tahī-dastī meñ haiñ

shohra-e-āfāq ab mastī-o-bad-mastī meñ haiñ

sham'-e-afsurda kī sūrat mahfil-e-hastī meñ hai

daur-e-rafta kā magar saudā hamāre sar meñ hai

bāda-e-hubb-e-vatan chhalke hue sāġhar meñ hai

phir hameñ hogā mayassar dahr meñ jāh-o-jalāl

chaar din meñ gulshan-e-hastī meñ phir hoñge nihāl

'barq' ye zarbul-masal hogī hamāre hasb-e-hāl

har kamāle rā zavāle har zavāle rā kamāl

nayyar-e-iqbāl chamkegā hamārā ek din

auj par is desh kā hogā sitārā ek din

inqilab-e-dahr se sab shan wale miT gae

rum wale miT gae yunan wale miT gae

syria wale miTe turan wale miT gae

kaun kahta hai ki hindustan wale miT gae

naqsh-e-baatil hum nahin jis ko miTae aasman

hum nahin miTne ke jab tak hai bina-e-asman

hum ne ye mana hamare aan wale miT gae

bhoj se wikram se 'ali-shan wale miT gae

bhishm-o-arjun se yodhdha ban wale miT gae

akbar-o-partap se maidan wale miT gae

nam-lewa un ke hum zer-e-falak baqi to hain

miTte miTte bhi jahan mein aaj tak baqi to hain

KHak se is desh ki paida hue wo namwar

naqsh jin ke karname hain bisat-e-dahr par

dabdabe se jin ke jhukte the sar-afraazon ke sar

jin ka loha mante hain hukmran-e-bahr-o-bar

tegh-o-tarkash ke dhani the razm-gah mein fard the

is shuja'at par ye turra hai sarapa dard the

aashna-e-raaz-e-wahdat falsafi-e-be-misal

gauhar-e-dariya-e-danish nukta-dan-e-ba-kamal

mahir-e-‘ilm-o-hunar shewa-bayan shirin-maqal

rast-bazu sulh-ju pakiza-KHu raushan-KHayal

baada-e-tahzib se wo sar-ba-sar maKHmur the

qalb-e-raushan ma'rifat ke nur se pur-nur the

kya the ahl-e-hind ye charKH-e-kuhan se puchh lo

ya himala ki guphaon ke dahan se puchh lo

apna afsana lab-e-gang-o-jaman se puchh lo

puchh lo har zarra-e-KHak-e-watan se puchh lo

apne munh se kya bataen hum ki kya wo log the

nafs-kush neki ke putle the mujassam yog the

hum mu’arra ho ke in ausaf se pasti mein hain

daulat-e-‘ilm-o-‘amal kho kar tahi-dasti mein hain

shohra-e-afaq ab masti-o-bad-masti mein hain

sham'-e-afsurda ki surat mahfil-e-hasti mein hai

daur-e-rafta ka magar sauda hamare sar mein hai

baada-e-hubb-e-watan chhalke hue saghar mein hai

phir hamein hoga mayassar dahr mein jah-o-jalal

chaar din mein gulshan-e-hasti mein phir honge nihaal

'barq' ye zarbul-masal hogi hamare hasb-e-haal

har kamale ra zawale har zawale ra kamal

nayyar-e-iqbaal chamkega hamara ek din

auj par is desh ka hoga sitara ek din