bila-‘unwan

ye ehsās jazba ḳhayāl aur sapne

gulsitān-e-hastī ke vo phuul haiñ

jo badalte haiñ rangat

ki is vaqt kī dhuup meñ saat rangoñ kī duniyā basī hai

to ehsās jazba ḳhayāl aur sapne kī tashrīh mumkin nahīñ hai

hameñ zo'm thā ye

ki ham to

baḌe gyaan vaale haiñ

lekin

agar gyaan hotā

to āḳhir

harī chhāoñ kī justujū meñ

ye bheḌoñ kā ġhalla bhaTakte bhaTakte

yahāñ to na aatā

ye jangal baḌā hai

magar is kī hariyālī bheḌoñ ke ġhalle ko nigle chalī jā rahī hai

hameñ maaoñ ne jo sikhāyā thā bachpan meñ lafzoñ kā matlab

vo matlab yahāñ kho chuke haiñ

vafā aur mohabbat

ḳhulūs aur 'aqīdat ke alfāz jin par hameñ naaz thā

aaj anDe ke chhilke ke mānind pichke paḌe haiñ

har ik samt shak ke añdheroñ ke ḳheme gaḌe haiñ

vafāoñ kī chhātī pe

vahmoñ kā 'ifrīt

be-nāche chaltā chalā aa rahā hai

diloñ meñ

hasad kī añgīThī jalā kar

anā kī razā.ī meñ dubke hue log

lafzoñ ke tīroñ par ‘ayyāriyoñ kā halāhal chaḌhā.e chale jā rahe haiñ

kisī ko kisī par bharosa nahīñ hai

sabhī apne ḳhuuñ meñ nahā.e khaḌe haiñ

hameñ ye ḳhabar hī nahīñ hai

ki jo tiir ham ne

chalā.e the auroñ pe

vo saare nāvak

hamāre hī apne diloñ kā lahū pī rahe haiñ

na maiñ maiñ rahā huuñ na tum tum rahe ho

ki us aadmī kā janāza haiñ ham tum

harī chhāñv kī justujū meñ

bhaTakte bhaTakte

yahāñ aa ke jo bhiiḌ meñ kho gayā hai

ye ehsas jazba KHayal aur sapne

gulsitan-e-hasti ke wo phul hain

jo badalte hain rangat

ki is waqt ki dhup mein sat rangon ki duniya basi hai

to ehsas jazba KHayal aur sapne ki tashrih mumkin nahin hai

hamein zo'm tha ye

ki hum to

baDe gyan wale hain

lekin

agar gyan hota

to aaKHir

hari chhaon ki justuju mein

ye bheDon ka ghalla bhaTakte bhaTakte

yahan to na aata

ye jangal baDa hai

magar is ki hariyali bheDon ke ghalle ko nigle chali ja rahi hai

hamein maon ne jo sikhaya tha bachpan mein lafzon ka matlab

wo matlab yahan kho chuke hain

wafa aur mohabbat

KHulus aur 'aqidat ke alfaz jin par hamein naz tha

aaj anDe ke chhilke ke manind pichke paDe hain

har ek samt shak ke andheron ke KHeme gaDe hain

wafaon ki chhati pe

wahmon ka 'ifrit

be-nache chalta chala aa raha hai

dilon mein

hasad ki angiThi jala kar

ana ki razai mein dubke hue log

lafzon ke tiron par ‘ayyariyon ka halahal chaDhae chale ja rahe hain

kisi ko kisi par bharosa nahin hai

sabhi apne KHun mein nahae khaDe hain

hamein ye KHabar hi nahin hai

ki jo tir hum ne

chalae the auron pe

wo sare nawak

hamare hi apne dilon ka lahu pi rahe hain

na main main raha hun na tum tum rahe ho

ki us aadmi ka janaza hain hum tum

hari chhanw ki justuju mein

bhaTakte bhaTakte

yahan aa ke jo bhiD mein kho gaya hai