chand sawalat

ai ḳhudā-e-do-jahāñ ai mālik-e-har-do-sarā

kyā tujhe aadam kī laġhzish kā zarā ehsās hai

kyā tujhe 'aurat kī mazlūmī kā chandāñ paas hai

ai ḳhudā tere jalāl-o-manzilat kī ḳhair hai

kyā 'adālat ko tirī 'aurat se koī bair hai

kyā ye chīḳheñ āh-o-nāle tujh talak jaate nahīñ

kyā tire arz-o-samāñ ye dekh tharrāte nahīñ

kyā tire nazdīk 'aurat kī yahī auqāt hai

kyā tirī ḳhilqat meñ shāmil mard hī kī zaat hai

ai ḳhudā-e-do-jahāñ ai mālik-e-har-do-sarā

tū to vo hai bin kahe suntā hai jo dil kī pukār

tujh talak pahuñchī na kyoñ phir us kī aahoñ kī pukār

ham to sunte haiñ baḌī sab se 'adālat hai tirī

zālim-o-be-rahm logoñ se 'adāvat hai tirī

phir bhī itne zulm par kyoñ āsmāñ phaTtā nahīñ

is tirī duniyā se āḳhir zulm kyoñ ghaTtā nahīñ

zulm baḌhtā jā rahā hai zulm baḌhtā hī rahā

ḳhauf ghaTtā jā rahā hai ḳhauf ghaTtā hī rahā

ai ḳhudā-e-do-jahāñ ai mālik-e-har-do-sarā

mard ke siine meñ yā-rab tū ne dil rakkhā bhī hai

is kī taqdīroñ meñ lafz-e-mo'tadil rakkhā bhī hai

is kī āñkhoñ meñ hayā aur sharm kyoñ Daalī nahīñ

is kī niyyat kyoñ havas se hirs se ḳhālī nahīñ

bhar gayā hai dil magar is kī havas bhartī nahīñ

is ke vahshī-pan kī āḳhir bhuuk kyoñ miTtī nahīñ

jānvar is ko kaheñ yā phir kaheñ shaitān hai

ai ḳhudā ye kaun hai insān hai haivān hai

ai ḳhudā-e-do-jahāñ ai mālik-e-har-do-sarā

kyā isī din ke liye havvā ko yaañ laayā gayā

kyā isī din ke liye aadam ko bahlāyā gayā

kyoñ isī ke jism-o-jāñ ke saath khelā jā.egā

kyoñ isī ke ḳhvāb ko ḳhvāhish ko relā jā.egā

kyoñ libās is kā sar-e-bāzār utārā jā.egā

kyoñ isī ko maar kar dariyā meñ pheñkā jā.egā

kyoñ tujhe is kī ye lāchārī nazar aatī nahīñ

kyoñ madad terī taraf se is ko dī jaatī nahīñ

ai ḳhudā-e-do-jahāñ ai mālik-e-har-do-sarā

kaun hai is kī batā āḳhir rag-e-jāñ se qarīb

kis ne likkhā hai batā āḳhir ye 'aurat kā nasīb

ai KHuda-e-do-jahan ai malik-e-har-do-sara

kya tujhe aadam ki laghzish ka zara ehsas hai

kya tujhe 'aurat ki mazlumi ka chandan pas hai

ai KHuda tere jalal-o-manzilat ki KHair hai

kya 'adalat ko teri 'aurat se koi bair hai

kya ye chiKHen aah-o-nale tujh talak jate nahin

kya tere arz-o-saman ye dekh tharraate nahin

kya tere nazdik 'aurat ki yahi auqat hai

kya teri KHilqat mein shamil mard hi ki zat hai

ai KHuda-e-do-jahan ai malik-e-har-do-sara

tu to wo hai bin kahe sunta hai jo dil ki pukar

tujh talak pahunchi na kyon phir us ki aahon ki pukar

hum to sunte hain baDi sab se 'adalat hai teri

zalim-o-be-rahm logon se 'adawat hai teri

phir bhi itne zulm par kyon aasman phaTta nahin

is teri duniya se aaKHir zulm kyon ghaTta nahin

zulm baDhta ja raha hai zulm baDhta hi raha

KHauf ghaTta ja raha hai KHauf ghaTta hi raha

ai KHuda-e-do-jahan ai malik-e-har-do-sara

mard ke sine mein ya-rab tu ne dil rakkha bhi hai

is ki taqdiron mein lafz-e-mo'tadil rakkha bhi hai

is ki aankhon mein haya aur sharm kyon Dali nahin

is ki niyyat kyon hawas se hirs se KHali nahin

bhar gaya hai dil magar is ki hawas bharti nahin

is ke wahshi-pan ki aaKHir bhuk kyon miTti nahin

jaanwar is ko kahen ya phir kahen shaitan hai

ai KHuda ye kaun hai insan hai haiwan hai

ai KHuda-e-do-jahan ai malik-e-har-do-sara

kya isi din ke liye hawwa ko yan laya gaya

kya isi din ke liye aadam ko bahlaya gaya

kyon isi ke jism-o-jaan ke sath khela jaega

kyon isi ke KHwab ko KHwahish ko rela jaega

kyon libas is ka sar-e-bazar utara jaega

kyon isi ko mar kar dariya mein phenka jaega

kyon tujhe is ki ye lachaari nazar aati nahin

kyon madad teri taraf se is ko di jati nahin

ai KHuda-e-do-jahan ai malik-e-har-do-sara

kaun hai is ki bata aaKHir rag-e-jaan se qarib

kis ne likkha hai bata aaKHir ye 'aurat ka nasib