charson ki hifazat

ki laao kahīñ se

ḳhalā se kahīñ se

na.e auzān aur alfāz

hoñ jazbāt bhī taaza na.e bilkul

nayā do kuchh hameñ ab sab purānā ho chukā hai

ḳhair tum uktā ga.e ho in manāzir se dafātir se

hukūmat se kitāboñ se tanāzur se

nayā in meñ kahīñ kuchh bhī nahīñ

sab kuchh purānā hai shafaq sūraj zamīñ taare

kisī paikar meñ Dhalte hī nahīñ

sabhī kuchh dekh baiThe ho

na.ī tārīḳh likhnā chāhte ho

sab purānā lag rahā hai rivāyat kyā samā'at kyā

tarāsho ek chehra aur banāo ek mūrat

ik badan aisā ghaḌo

charsoñ meñ jis kī

ik nagīna ho na.e alfāz kā na.e auzān kā

sote kañval ko thaam lenā aur bonā tuḳhm us meñ

aur utar jaanā jilau meñ naaf tak us kī

zarā bhī shor mat karnā

zarā sī buuñd Tapkegī

pasīna poñchh lenā 'arq-rezī kī zarūrat hī nahīñ

nauzā.ida bachcha tumhāre sāmne hogā

na.e auzān kī barkat

na.e alfāz kā samra

na.ī taḳhlīq kā paikar

ki lao kahin se

KHala se kahin se

nae auzan aur alfaz

hon jazbaat bhi taza nae bilkul

naya do kuchh hamein ab sab purana ho chuka hai

KHair tum ukta gae ho in manazir se dafatir se

hukumat se kitabon se tanazur se

naya in mein kahin kuchh bhi nahin

sab kuchh purana hai shafaq suraj zamin tare

kisi paikar mein Dhalte hi nahin

sabhi kuchh dekh baiThe ho

nai tariKH likhna chahte ho

sab purana lag raha hai riwayat kya sama'at kya

tarasho ek chehra aur banao ek murat

ek badan aisa ghaDo

charson mein jis ki

ek nagina ho nae alfaz ka nae auzan ka

sote kanwal ko tham lena aur bona tuKHm us mein

aur utar jaana jilau mein naf tak us ki

zara bhi shor mat karna

zara si bund Tapkegi

pasina ponchh lena 'arq-rezi ki zarurat hi nahin

nauzaida bachcha tumhaare samne hoga

nae auzan ki barkat

nae alfaz ka samra

nai taKHliq ka paikar