dhund chhaTne lagi

mujh ko ye jānñe meñ bhī 'umreñ lagīñ

ki jo rāteñ december kī giilī sī maddham sī is chāñdnī meñ kaTīñ

vo jo rāteñ hamāre milan kī rutoñ meñ hasīñ ḳhvāb bunte hue gahrī āñkhoñ meñ bas jāgte hī bitā.ī ga.iiñ

un kī saarī haqīqat mohabbat nahīñ thī faqat ek dhoka thī bas

dhund rastoñ meñ gaaḌī ke shīshoñ pe jamtī huī vo harārat jo sāñsoñ kī thī

bhaap uḌte hī shīshoñ pe kuchh na rahā

bas namī rah ga.ī

hañste hañste fajīra kī saḌkoñ pe gaaḌī meñ coffē ke cup se uThī bhaap meñ saare lamhe namī kī nazar ho ga.e

january farvarī march april may

jab may aa gayā

to fajīra kī saḌkoñ pe bikhre hue munjamid ḳhvāb paanī hue

dhuup niklī to āñkhoñ se ashkoñ kī sūrat hasīñ-ḳhvāb bah kar nikalne lage

vo december kī rātoñ meñ dekhe hue ḳhvāb yak-dam sabhī phir pighalne lage

dhund chhaTne lagī to dikhā.ī diyā

sāmne apne kāñToñ bhare haath khole hue

ik bhayānak sī sūrat meñ tanhā khaḌī thī mirī zindagī

aur tum jā chuke the kahīñ

chand qadam kī masāfat thī aur us masāfat meñ 'umroñ kā thā fāsla

phir tumhāre chale jaane ke baa'd to kitnī tanhā thī maiñ

is bhayānak sī sūrat meñ tanhā khaḌī zindagī ke gale lag ke rotī rahī barsoñ rotī rahī

jo bhī manzar pas-e-dhund the

saare dhuñdlā ga.e

maiñ vo manzar suhāne unheñ DhūñDne jab fajīra ga.ī lambe ūñche pahāḌoñ se Takrā ke merī sadā gūñjtī hī rahī

dhund ke mausam palaT aa.e haiñ phir suno

phir december kī rut meñ chalo

un fajīra ke ūñche pahāḌoñ kī us oT meñ koī vā'da karo

āḳhirī saañs tak vo nibhāne kā vā'da koī

haañ magar mujh ko ye jānñe meñ bhī 'umreñ lagīñ

ki vo vā'de faqat dhund chhaTne se pahle talak the sabhī

dhund chhaTne lagī to yaqīñ ho gayā

ab na aaoge tum haañ magar mujh ko ye jānñe meñ bhī 'umreñ lagīñ

aur kitne december guzarte rahe

bas guzarte rahe

mujh ko ye jaanne mein bhi 'umren lagin

ki jo raaten december ki gili si maddham si is chandni mein kaTin

wo jo raaten hamare milan ki ruton mein hasin KHwab bunte hue gahri aankhon mein bas jagte hi bitai gain

un ki sari haqiqat mohabbat nahin thi faqat ek dhoka thi bas

dhund raston mein gaDi ke shishon pe jamti hui wo hararat jo sanson ki thi

bhap uDte hi shishon pe kuchh na raha

bas nami rah gai

hanste hanste fajira ki saDkon pe gaDi mein coffee ke cup se uThi bhap mein sare lamhe nami ki nazar ho gae

january farwari march april may

jab may aa gaya

to fajira ki saDkon pe bikhre hue munjamid KHwab pani hue

dhup nikli to aankhon se ashkon ki surat hasin-KHwab bah kar nikalne lage

wo december ki raaton mein dekhe hue KHwab yak-dam sabhi phir pighalne lage

dhund chhaTne lagi to dikhai diya

samne apne kanTon bhare hath khole hue

ek bhayanak si surat mein tanha khaDi thi meri zindagi

aur tum ja chuke the kahin

chand qadam ki masafat thi aur us masafat mein 'umron ka tha fasla

phir tumhaare chale jaane ke ba'd to kitni tanha thi main

is bhayanak si surat mein tanha khaDi zindagi ke gale lag ke roti rahi barson roti rahi

jo bhi manzar pas-e-dhund the

sare dhundla gae

main wo manzar suhane unhen DhunDne jab fajira gai lambe unche pahaDon se Takra ke meri sada gunjti hi rahi

dhund ke mausam palaT aae hain phir suno

phir december ki rut mein chalo

un fajira ke unche pahaDon ki us oT mein koi wa'da karo

aaKHiri sans tak wo nibhane ka wa'da koi

han magar mujh ko ye jaanne mein bhi 'umren lagin

ki wo wa'de faqat dhund chhaTne se pahle talak the sabhi

dhund chhaTne lagi to yaqin ho gaya

ab na aaoge tum han magar mujh ko ye jaanne mein bhi 'umren lagin

aur kitne december guzarte rahe

bas guzarte rahe