ek kahani

baat hai kaafī purānī ek chhoTe gaañv meñ

ek sāhab loTte rahte the ThanDī chhāñv meñ

kuchh mashaqqat aur mehnat se na un kā kaam thā

bechte the duudh un kā shaiḳh-chillī naam thā

shaiḳh-chillī be-vaqūfī ke liye mash.hūr the

bhāñg ke nashshe meñ rahte the sadā hī chuur se

ek din vo bālTī ik duudh kī sar par rakhe

jā rahe the shahr ke raste pe kuchh kuchh sochte

der hone kā ḳhayāl aayā to jaldī se baḌhe

aur phir kuchh soch kar khaTke ruke phir chal paḌe

dil meñ ye sochā ki jo kuchh duudh ke paise mileñ

in ko chaT karne ke badle kyoñ na anDe mol leñ

biis anDe to bilā-shakk-o-shub.h mil jā.eñge

aur kuchh din baa'd bachche bhī nikal hī ā.eñge

ḳhuub daana un ko dūñgā aur karūñgā dekh-bhāl

bante bante murġhiyāñ murġhe lagegā ek saal

ḳhuub anDe hoñge kuchh bechūñgā kuchh khā jā.ūñgā

ek do moTe se murġhe bhī safā kar jā.ūñgā

aur phir un murġhiyoñ ko ūñche dāmoñ bech kar

ek gaa.e mol lūñgā moTī-tāzī dekh kar

gaa.e se phir bhaiñs hogī bhaiñs se hogī dukān

dhīre dhīre ek achchhā sā banā lūñgā makān

kuchh dinoñ meñ maiñ baḌā ik aadmī ban jā.ūñgā

shaiḳh-chillī kī bajā.e shaiḳh-jī kahlā.ūñgā

sab mirī 'izzat kareñge ḳhuub hogā merā naam

ye ḳhayāl aate hī gardan zor se un kī hilī

bālTī kā duudh saarā rāste meñ bah gayā

shaiḳh-chillī kā havā.ī mahl saarā Dhah gayā

baat hai kafi purani ek chhoTe ganw mein

ek sahab loTte rahte the ThanDi chhanw mein

kuchh mashaqqat aur mehnat se na un ka kaam tha

bechte the dudh un ka shaiKH-chilli nam tha

shaiKH-chilli be-waqufi ke liye mashhur the

bhang ke nashshe mein rahte the sada hi chur se

ek din wo baalTi ek dudh ki sar par rakhe

ja rahe the shahr ke raste pe kuchh kuchh sochte

der hone ka KHayal aaya to jaldi se baDhe

aur phir kuchh soch kar khaTke ruke phir chal paDe

dil mein ye socha ki jo kuchh dudh ke paise milen

in ko chaT karne ke badle kyon na anDe mol len

bis anDe to bila-shakk-o-shubh mil jaenge

aur kuchh din ba'd bachche bhi nikal hi aaenge

KHub dana un ko dunga aur karunga dekh-bhaal

bante bante murghiyan murghe lagega ek sal

KHub anDe honge kuchh bechunga kuchh kha jaunga

ek do moTe se murghe bhi safa kar jaunga

aur phir un murghiyon ko unche damon bech kar

ek gae mol lunga moTi-tazi dekh kar

gae se phir bhains hogi bhains se hogi dukan

dhire dhire ek achchha sa bana lunga makan

kuchh dinon mein main baDa ek aadmi ban jaunga

shaiKH-chilli ki bajae shaiKH-ji kahlaunga

sab meri 'izzat karenge KHub hoga mera nam

ye KHayal aate hi gardan zor se un ki hili

baalTi ka dudh sara raste mein bah gaya

shaiKH-chilli ka hawai mahl sara Dhah gaya