harf-e-aKHir

nazar uThā ke zarā dekh ai matā'-e-jāñ

hamāre sar pe judā.ī kā vaqt aa pahuñchā

maiñ kyā batā.ūñ ki is pal ko Tālne ke liye

du'ā vazīfe bhalā kaun se jatan na kiye

‘azīz-e-man jo bhī āyāt mujh ko azbar thiiñ

bas ek saañs meñ paḌh paḌh ke sab kī sab phūñkī

magar ai jān-e-tamannā ye shūmī-e-qismat

likhī hai apne muqaddar meñ bas tirī furqat

so bas yahīñ se hameñ rasta bāñTnā hogā

aur is ke aage safar tanhā kāTnā hogā

tumhāre baa'd agarche haiñ manzileñ mā'dūm

kidhar se jaanā hai kis samt ko ḳhudā mā'lūm

mirī to ḳhair hai lekin tum ai mire hamdam

damakte rahnā har ik bazm meñ yūñhī har dam

matā'-e-jāñ mirā hargiz na ġham satā.e tumheñ

du'ā hai har ḳhushī jīvan kī raas aa.e tumheñ

bas iltijā hai kabhī ḳhvāb meñ milā karnā

agar jo bhūle se yaad aa.uuñ to du'ā karnā

magar ai dost ye mumkin hī kis tarah hai bhalā

ki apnī tīra-nasībī kā hai 'ajab qissa

ham aise log sadā be-murād rahte haiñ

hamāre jaise kise yād-vād rahte haiñ

nazar uTha ke zara dekh ai mata'-e-jaan

hamare sar pe judai ka waqt aa pahuncha

main kya bataun ki is pal ko Talne ke liye

du'a wazife bhala kaun se jatan na kiye

‘aziz-e-man jo bhi aayat mujh ko azbar thin

bas ek sans mein paDh paDh ke sab ki sab phunki

magar ai jaan-e-tamanna ye shumi-e-qismat

likhi hai apne muqaddar mein bas teri furqat

so bas yahin se hamein rasta banTna hoga

aur is ke aage safar tanha kaTna hoga

tumhaare ba'd agarche hain manzilen ma'dum

kidhar se jaana hai kis samt ko KHuda ma'lum

meri to KHair hai lekin tum ai mere hamdam

damakte rahna har ek bazm mein yunhi har dam

mata'-e-jaan mera hargiz na gham satae tumhein

du'a hai har KHushi jiwan ki ras aae tumhein

bas iltija hai kabhi KHwab mein mila karna

agar jo bhule se yaad aaun to du'a karna

magar ai dost ye mumkin hi kis tarah hai bhala

ki apni tira-nasibi ka hai 'ajab qissa

hum aise log sada be-murad rahte hain

hamare jaise kise yaad-wad rahte hain