junun

log duniyā ke usūloñ se nibhāte haiñ magar

mujh ko duniyā ke usūloñ ko badal denā hai

log ghuT-ghuT ke bhī jī lete haiñ lekin mujh ko

jo mire dil meñ hai vo zahr ugal denā hai

varna ye zahr mirī ruuh meñ ghul jā.egā

is liye is ko ugalnā hī bahut achchhā hai

zahr ye sabr kī had se na guzar jaa.e kahīñ

dil se ab is kā nikalnā hī bahut achchhā hai

kuchh kī taḳhrīb se tā'mīr bhī ho jaatī hai

ye bhī mumkin hai ki taḳhrīb ye tā'mīr bane

ye bhī mumkin hai ki rishtoñ meñ darāḌ aa jaa.e

ye bhī mumkin hai ki is se mirī taqdīr bane

'ishq pāband-e-rusūmāt-o-rivāyāt nahīñ

mujh se nārāz ho duniyā to koī baat nahīñ

apne jazbāt kā iz.hār to karnā hogā

dil ko haq lene pe tayyār to karnā hogā

tujh ko paanā hai to ik shor machā denā hai

varna ḳhāmosh tujhe dil se bhulā denā hai

log duniya ke usulon se nibhate hain magar

mujh ko duniya ke usulon ko badal dena hai

log ghuT-ghuT ke bhi ji lete hain lekin mujh ko

jo mere dil mein hai wo zahr ugal dena hai

warna ye zahr meri ruh mein ghul jaega

is liye is ko ugalna hi bahut achchha hai

zahr ye sabr ki had se na guzar jae kahin

dil se ab is ka nikalna hi bahut achchha hai

kuchh ki taKHrib se ta'mir bhi ho jati hai

ye bhi mumkin hai ki taKHrib ye ta'mir bane

ye bhi mumkin hai ki rishton mein daraD aa jae

ye bhi mumkin hai ki is se meri taqdir bane

'ishq paband-e-rusumat-o-riwayat nahin

mujh se naraaz ho duniya to koi baat nahin

apne jazbaat ka izhaar to karna hoga

dil ko haq lene pe tayyar to karna hoga

tujh ko pana hai to ek shor macha dena hai

warna KHamosh tujhe dil se bhula dena hai