kaTas

kamāl karte haiñ ishq vaale

ye dāstāñ hai qurūn-e-ūla se peshtar kī

jab ek laḌkī se devtā ne birog paayā

to āñsūoñ kā mahal banāyā

ye ishq thā so

zamīñ kī buniyād hil ga.ī thī

saḌak ke tāroñ se mil ga.ī thī

ye ishq thā so

na us ne lamhoñ se maat khaa.ī

na us ko sadiyāñ bigāḌ pā.īñ

kaTās ab bhī vahīñ khaḌā hai

har ek patthar gavāh ban kar vahīñ paḌā hai

ye ḳhaak pahle hī muztarib thī

ab aur hairān ho ga.ī hai

pujāriyoñ ke nafas kī utran

havā musalmān ho ga.ī hai

mohabbatoñ se bhare sahīfe to tāqchoñ meñ sajā diye haiñ

aqīdatoñ ne shivā ke aañsū vuzū ke qābil banā diye haiñ

nasīb vaale hī āñsūoñ se vuzū kareñge

qabā-e-girya rafū kareñge

kaTās apne hī aap meñ gum

adam se ilhāq kar rahā hai

ka.ī mazāhib kī lau jalā.e

sadā-e-ilhād kar rahā hai

aur is jhamele ke paas baiThā

koī tumheñ yaad kar rahā hai

ajab masāfat se chuur hai ye

ajiib fariyād kar rahā hai

ise nikālo ye is jagah kā

sukūn barbād kar rahā hai

kamāl karte haiñ ishq vaale

ye dāstāñ hai qurūn-e-ūla se peshtar kī jab ek laḌkī

se devtā ne birog paayā

to āñsūoñ kā mahal banāyā

kamal karte hain ishq wale

ye dastan hai qurun-e-ula se peshtar ki

jab ek laDki se dewta ne birog paya

to aansuon ka mahal banaya

ye ishq tha so

zamin ki buniyaad hil gai thi

saDak ke taron se mil gai thi

ye ishq tha so

na us ne lamhon se mat khai

na us ko sadiyan bigaD pain

kaTas ab bhi wahin khaDa hai

har ek patthar gawah ban kar wahin paDa hai

ye KHak pahle hi muztarib thi

ab aur hairan ho gai hai

pujariyon ke nafas ki utran

hawa musalman ho gai hai

mohabbaton se bhare sahife to taqchon mein saja diye hain

aqidaton ne shiwa ke aansu wuzu ke qabil bana diye hain

nasib wale hi aansuon se wuzu karenge

qaba-e-girya rafu karenge

kaTas apne hi aap mein gum

adam se ilhaq kar raha hai

kai mazahib ki lau jalae

sada-e-ilhad kar raha hai

aur is jhamele ke pas baiTha

koi tumhein yaad kar raha hai

ajab masafat se chur hai ye

ajib fariyaad kar raha hai

ise nikalo ye is jagah ka

sukun barbaad kar raha hai

kamal karte hain ishq wale

ye dastan hai qurun-e-ula se peshtar ki jab ek laDki

se dewta ne birog paya

to aansuon ka mahal banaya