mahatma budh

buddhā 'azīm shaḳhs thā

jo taḳht-o-tāj chhoḌ kar

butān-e-nasl-o-qaumiyat

vaqār-e-‘izz-o-saltanat

ġhurūr-e-jāh-o-martabat

ke bandhanoñ ko toḌ kar

ba-zer-e-sāya-e-shajar

tapasyā meñ mahv thā

giyān dhyān meñ magan

na.ī ravish ḳhayāl meñ

jo aadmī ko aadmī ke zulm se najāt de

jo zaat paat ke tilism-e-sāmarī ko maat de

barahmanoñ kī qadġhanoñ kā zor pāsh-pāsh ho

jahāñ meñ jo añdher hai use shikast-e-fāsh ho

vo sochtā chalā gayā use surāġh mil gayā

mahātmā mahātmā 'azīm us kī aatmā

ki jis ke dil meñ karb-e-kā.enāt thā

satūda-e-sifāt thā

pukār kar kahā ki ai jahān-e-ġham ke bāsiyo

mirī sadā ko to suno

ahinsā-parmo-dharmā ik usūl-e-lā-zavāl hai

ye fikr be-nazīr hai ye soch be-misāl hai

kisī ko dukh na do ki ye gunāh hai vabāl hai

jo is se munharif hue to zindagī muhāl hai

yahī hai rāz-e-zindagī

tarīq-e-sulh-o-āshtī

yahī najāt-e-rūh hai

yahī hai dil kī shāñtī

mahātmā 'azīm thā

mahātmā ne sach kahā

buddha 'azim shaKHs tha

jo taKHt-o-taj chhoD kar

butan-e-nasl-o-qaumiyat

waqar-e-‘izz-o-saltanat

ghurur-e-jah-o-martabat

ke bandhanon ko toD kar

ba-zer-e-saya-e-shajar

tapasya mein mahw tha

giyan dhyan mein magan

nai rawish KHayal mein

jo aadmi ko aadmi ke zulm se najat de

jo zat pat ke tilism-e-samari ko mat de

barahmanon ki qadghanon ka zor pash-pash ho

jahan mein jo andher hai use shikast-e-fash ho

wo sochta chala gaya use suragh mil gaya

mahatma mahatma 'azim us ki aatma

ki jis ke dil mein karb-e-kaenat tha

satuda-e-sifat tha

pukar kar kaha ki ai jahan-e-gham ke basiyo

meri sada ko to suno

ahinsa-parmo-dharma ek usul-e-la-zawal hai

ye fikr be-nazir hai ye soch be-misal hai

kisi ko dukh na do ki ye gunah hai wabaal hai

jo is se munharif hue to zindagi muhaal hai

yahi hai raaz-e-zindagi

tariq-e-sulh-o-ashti

yahi najat-e-ruh hai

yahi hai dil ki shanti

mahatma 'azim tha

mahatma ne sach kaha