nasl-e-nau ke liye

zindagī kyoñ milī is kā maqsad hai kyā

ham ne jaanā nahīñ

zindagī sirf rangīñ fasāna nahīñ

is kī nazroñ meñ sho'loñ kī garmī bhī hai

ham ko jhulsā na de

is ke har moḌ par hādsoñ ke bhañvar

gher leñge hameñ

phir bhī har moḌ par muskurāte hue

hausloñ ke diye ham jalāte chaleñ

jaane vāloñ ne ham ko diye haiñ charāġh

ham laveñ aur in kī baḌhāte chaleñ

aane vāloñ ko ghereñ na tārīkiyāñ

is zamāne ko raushan banāte chaleñ

har añdhere ke sar ko qalam kar ke ham

is jahāñ meñ ujāle basāte chaleñ

jaane vāloñ ne jhele haiñ sadme ka.ī

ġham nahīñ ham bhī kuchh ġham uThāte chaleñ

qaum-o-maz.hab kī takrār be-faiz hai

parcham-e-amn ko lahlahāte chaleñ

ham ko apne se jaisā zamāna milā

ham use aur dilkash banāte chaleñ

apne hoñToñ pe har baat sauġhāt ho

ham vafāoñ kī fasleñ ugāte chaleñ

dil se jab dil mileñ phuul in meñ khileñ

pyaar kī bastiyāñ ham basāte chaleñ

zindagī ke liye maut kī raah se bhī

guzarnā paḌe to guzar jaa.eñ ham

apnī manzil ko har haal meñ paa.eñ ham

zindagī kī ye rāheñ bahut saḳht haiñ

ham ko chalnā bhī hai

vaqt jismoñ ko jhulsā rahā hai to kyā

ham ko chalnā bhī hai

zindagī chaar din hī sahī

chand pal hī sahī

sāthiyo ik hasīñ kaam kar jaa.eñ ham

nasl-e-nau ke liye ḳhvāb koī buneñ

koī ḳhāka hasīñ us ko de jaa.eñ ham

nasl-e-nau ārzūeñ na.ī lā.egī

ham se jo ho na paayā vo kar jā.egī

apne ḳhāke meñ vo rang bhar jā.egī

zindagi kyon mili is ka maqsad hai kya

hum ne jaana nahin

zindagi sirf rangin fasana nahin

is ki nazron mein sho'lon ki garmi bhi hai

hum ko jhulsa na de

is ke har moD par hadson ke bhanwar

gher lenge hamein

phir bhi har moD par muskuraate hue

hauslon ke diye hum jalate chalen

jaane walon ne hum ko diye hain charagh

hum lawen aur in ki baDhate chalen

aane walon ko gheren na tarikiyan

is zamane ko raushan banate chalen

har andhere ke sar ko qalam kar ke hum

is jahan mein ujale basate chalen

jaane walon ne jhele hain sadme kai

gham nahin hum bhi kuchh gham uThate chalen

qaum-o-mazhab ki takrar be-faiz hai

parcham-e-amn ko lahlahate chalen

hum ko apne se jaisa zamana mila

hum use aur dilkash banate chalen

apne honTon pe har baat saughat ho

hum wafaon ki faslen ugate chalen

dil se jab dil milen phul in mein khilen

pyar ki bastiyan hum basate chalen

zindagi ke liye maut ki rah se bhi

guzarna paDe to guzar jaen hum

apni manzil ko har haal mein paen hum

zindagi ki ye rahen bahut saKHt hain

hum ko chalna bhi hai

waqt jismon ko jhulsa raha hai to kya

hum ko chalna bhi hai

zindagi chaar din hi sahi

chand pal hi sahi

sathiyo ek hasin kaam kar jaen hum

nasl-e-nau ke liye KHwab koi bunen

koi KHaka hasin us ko de jaen hum

nasl-e-nau aarzuen nai laegi

hum se jo ho na paya wo kar jaegi

apne KHake mein wo rang bhar jaegi