nazr-e-mirza-ghaalib

vo ġhālib kal bhī thā aur aaj bhī kal bhī vahī ġhālib

nahīñ hai hone vaalā dūsrā ab koī bhī 'ġhālib'

vo kal kī shā'irī ho aaj kī ho yā kabhī kī ho

hai ġhālib har zamāne meñ tumhārī shā'irī 'ġhālib'

tumhāre she'r meñ mafhūm-o-mā’nī kā jahāñ pinhāñ

hai bahr-e-bekarāñ sach-much tumhārī guftanī 'ġhālib'

koī bhī she'r fitrat se alag ho kar nahīñ likkhā

haqīqat par tumhārī shā'irī mabnī rahī 'ġhālib'

tumhārī gul-fishānī thī ḳhizāñ ke daur meñ jaarī

kaTī kitnī musībat meñ tumhārī zindagī ġhālib

ka.ī beToñ kī pai-dar-pai judā.ī bhī sahī tum ne

tumhāre sabr-o-zabt-e-nafs ke qaa.il sabhī ġhālib

tumhārā lahja bhī andāz bhī uslūb bhī be-misl

tumhārī jaisī maiñ DhūñDūñ kahāñ se shā'irī 'ġhālib'

latāfat kā fasāhat kā balāġhat kā hai tū mūjid

tū lafzoñ kā ishāroñ kā kināyoñ kā dhanī 'ġhālib'

davā-e-dard-e-dil ke tum na minnat-kash hue chūñki

tumhāre 'ishq meñ tum par rahī apnī ḳhudī ġhālib

hai fariyādī tumhārā naqsh har fariyād par bhārī

sadāoñ par tumhārī hai sadā-e-dā.imī 'ġhālib'

mare but-ḳhāna meñ to gaaḌo kā'be meñ barahman ko

junūn-e-'ishq aisā kaun ab paa.e kabhī 'ġhālib'

tumhārī shā'irī kī dhuum hai saare zamāne meñ

bahādur shaah kī mahfil meñ bhī sab par rahī ġhālib

haiñ bālā-tar tumhāre she'r kitne 'aam zehnoñ se

magar hotī rahī alfāz kī jādūgarī ġhālib

tumhārī nazroñ se koī na sūrat bach sakī 'ġhālib'

tumhāre zauq kī vijdānī-o-nudrat kā kyā kahnā

ki zaḳhmoñ ke namak palkoñ se chunte the kabhī 'ġhālib'

uThāyā sang thā to kyoñ nahīñ pheñkā thā majnūñ par

laḌakpan hī se tum par fikr kyoñ sar kī rahī 'ġhālib'

na chhūTī mai kabhī chakkar na kū-e-yār kā chhūTā

magar chhūTā nahīñ hāthoñ se dāmān-e-ḳhudī 'ġhālib'

hazāroñ shā'iroñ ne kitne dīvān apne chhapvā.e

magar ik dhaak bas dīvān-e-'ġhālib' kī rahī ġhālib

tasavvur aaj 'ġhālib' kā 'hasan' ke zehn par ġhālib

ba-nām-e-mirzā-'ġhālib' sab pe ye mahfil huī ġhālib

wo ghaalib kal bhi tha aur aaj bhi kal bhi wahi ghaalib

nahin hai hone wala dusra ab koi bhi 'ghaalib'

wo kal ki sha'iri ho aaj ki ho ya kabhi ki ho

hai ghaalib har zamane mein tumhaari sha'iri 'ghaalib'

tumhaare she'r mein mafhum-o-ma’ni ka jahan pinhan

hai bahr-e-bekaran sach-much tumhaari guftani 'ghaalib'

koi bhi she'r fitrat se alag ho kar nahin likkha

haqiqat par tumhaari sha'iri mabni rahi 'ghaalib'

tumhaari gul-fishani thi KHizan ke daur mein jari

kaTi kitni musibat mein tumhaari zindagi ghaalib

kai beTon ki pai-dar-pai judai bhi sahi tum ne

tumhaare sabr-o-zabt-e-nafs ke qail sabhi ghaalib

tumhaara lahja bhi andaz bhi uslub bhi be-misl

tumhaari jaisi main DhunDun kahan se sha'iri 'ghaalib'

latafat ka fasahat ka balaghat ka hai tu mujid

tu lafzon ka ishaaron ka kinayon ka dhani 'ghaalib'

dawa-e-dard-e-dil ke tum na minnat-kash hue chunki

tumhaare 'ishq mein tum par rahi apni KHudi ghaalib

hai fariyaadi tumhaara naqsh har fariyaad par bhaari

sadaon par tumhaari hai sada-e-daimi 'ghaalib'

mare but-KHana mein to gaDo ka'be mein barahman ko

junun-e-'ishq aisa kaun ab pae kabhi 'ghaalib'

tumhaari sha'iri ki dhum hai sare zamane mein

bahadur shah ki mahfil mein bhi sab par rahi ghaalib

hain baala-tar tumhaare she'r kitne 'am zehnon se

magar hoti rahi alfaz ki jadugari ghaalib

tumhaari nazron se koi na surat bach saki 'ghaalib'

tumhaare zauq ki wijdani-o-nudrat ka kya kahna

ki zaKHmon ke namak palkon se chunte the kabhi 'ghaalib'

uThaya sang tha to kyon nahin phenka tha majnun par

laDakpan hi se tum par fikr kyon sar ki rahi 'ghaalib'

na chhuTi mai kabhi chakkar na ku-e-yar ka chhuTa

magar chhuTa nahin hathon se daman-e-KHudi 'ghaalib'

hazaron sha'iron ne kitne diwan apne chhapwae

magar ek dhak bas diwan-e-'ghaalib' ki rahi ghaalib

tasawwur aaj 'ghaalib' ka 'hasan' ke zehn par ghaalib

ba-nam-e-mirza-'ghaalib' sab pe ye mahfil hui ghaalib