qismat

jitne din tū saath rahā hai

shāmoñ ne mad.hosh havā ke hāthoñ

shafaq kī laalī bhejī thī

jis meñ pyaar ḳhumār basā thā

bhīge gītoñ ke gajre the

Dhaltā din parbat ke pīchhe chhup kar

ham ko hañste dekhā kartā

aur havā kā ḳhud-sar jhoñkā

ham donoñ ko chhū kar

jaane kyoñ be-ḳhud sā ho kar

phūloñ kī āġhosh meñ jā girtā

jhīloñ ke ā.īne

dekh ke ham ko hairāñ hote

baat baat par qurbāñ hote

aur ab terā saath nahīñ hai

hāthoñ kī rekhā.eñ bolīñ

qismat tere haath nahīñ hai

jitne din tu sath raha hai

shamon ne madhosh hawa ke hathon

shafaq ki lali bheji thi

jis mein pyar KHumar basa tha

bhige giton ke gajre the

Dhalta din parbat ke pichhe chhup kar

hum ko hanste dekha karta

aur hawa ka KHud-sar jhonka

hum donon ko chhu kar

jaane kyon be-KHud sa ho kar

phulon ki aaghosh mein ja girta

jhilon ke aaine

dekh ke hum ko hairan hote

baat baat par qurban hote

aur ab tera sath nahin hai

hathon ki rekhaen bolin

qismat tere hath nahin hai