sarapa

ek hasīna komal komal koñpal ho jaise pīpal kī

rang gulābī halkā halkā laal parī sī shīsh-mahal kī

chaal meñ mastī aañkh meñ Dore jaise gulābī chhalkī chhalkī

siine meñ jazbāt ke tūfāñ shāne se chunrī Dhalkī Dhalkī

chup hai magar ḳhāmosh nahīñ hai hosh hai lekin hosh nahīñ hai

jaise ho bharpūr qayāmat ḳhair manāo ik ik pal kī

bal khaa.e aise matvārī jaise jhūme aam kī Daarī

haa.e re ye āvāz kā jaadū kū-kū ho jaise koyal kī

āñkheñ haiñ yā maiḳhāne haiñ nazreñ haiñ yā paimāne haiñ

ye talvāroñ kī dhāreñ haiñ yā tahrīreñ haiñ kājal kī

tīkhe naināñ bāñkī chitvan gadrāyā gadrāyā yauvan

jaise alhaḌ kī gāgariyā chhalkī ab chhalkī ab chhalkī

chust qabā kā ye 'ālam hai tan kā ik ik til hai numāyāñ

'uryāñ 'uryāñ bāheñ jaise lachkīlī shāḳheñ sandal kī

zulf jo ruḳh ko chuum ga.ī hai saarī mahfil jhuum ga.ī hai

ek nazar jis or bhī Daalī chīḳheñ niklīñ halkī halkī

baiThī hai kis husn adā se bāloñ ko gardan meñ lapeTe

jaise ghaTā ke halqe meñ ho koī surāhī gangā-jal kī

bal haiñ jabīñ ke matla’-e-avval hoñT haiñ jaise matla’-e-sānī

qad kyā kahiye she'r hai mauzūñ 'kāmil' hai tasvīr ġhazal kī

ek hasina komal komal konpal ho jaise pipal ki

rang gulabi halka halka lal pari si shish-mahal ki

chaal mein masti aankh mein Dore jaise gulabi chhalki chhalki

sine mein jazbaat ke tufan shane se chunri Dhalki Dhalki

chup hai magar KHamosh nahin hai hosh hai lekin hosh nahin hai

jaise ho bharpur qayamat KHair manao ek ek pal ki

bal khae aise matwari jaise jhume aam ki Dari

hae re ye aawaz ka jadu ku-ku ho jaise koyal ki

aankhen hain ya maiKHane hain nazren hain ya paimane hain

ye talwaron ki dhaaren hain ya tahriren hain kajal ki

tikhe nainan banki chitwan gadraya gadraya yauwan

jaise alhaD ki gagariya chhalki ab chhalki ab chhalki

chust qaba ka ye 'alam hai tan ka ek ek til hai numayan

'uryan 'uryan bahen jaise lachkili shaKHen sandal ki

zulf jo ruKH ko chum gai hai sari mahfil jhum gai hai

ek nazar jis or bhi Dali chiKHen niklin halki halki

baiThi hai kis husn ada se baalon ko gardan mein lapeTe

jaise ghaTa ke halqe mein ho koi surahi ganga-jal ki

bal hain jabin ke matla’-e-awwal honT hain jaise matla’-e-sani

qad kya kahiye she'r hai mauzun 'kaamil' hai taswir ghazal ki