tarana-e-watan

terī dhartī ko jhuk jhuk ke chūme gagan zindabād ai vatan

tere zarroñ meñ haiñ chāñd sūraj magan zindabād ai vatan

terī nadiyoñ meñ amrit kī maujeñ ravāñ

terī jhīloñ meñ āb-e-shifā kā samāñ

terī nahroñ meñ hai daulat-e-jāvedāñ

tere jharnoñ meñ kundan kā nikhre badan zindabād ai vatan

ye himāla tirā jis ko chūme falak

husn-e-kashmīr hai ḳhuld kī ik jhalak

taaj kī zau pe hairāñ haiñ jinn-o-malak

terī 'azmat kī shobhā ajantā kā fan zindabād ai vatan

husn-e-charḳh-e-barīñ terī parchhā.iyāñ

jannatoñ kā yaqīñ terī rā'nā.iyāñ

rāhatoñ kā amiiñ terī purvā.iyāñ

terī añgḌā.iyāñ amn kā bāñkpan zindabād ai vatan

terī shāmoñ se jashn-e-charāġhāñ kī lau

terī sub.hoñ kī muskān meñ kaif-e-nau

terī rātoñ ke jalvoñ meñ fitrat kī zau

terī tanhā.ī hai rashk-e-sad-anjuman zindabād ai vatan

terī hoñToñ ko puuje madhur bāñsurī

terī godī meñ kheleñ kalā rāgnī

shyām liilā adā terī muskān kī

tere naġhmoñ kī lai rādhīkā kī lagan zindabād ai vatan

tere mizhgāñ pe kailāsh kā naaz ḳham

tere māthe ko chūme jamāl-e-iram

paaoñ dho.e tirā husn-e-rameshwaram

terī bāñhoñ kā ehsān gang-o-jaman zindabād ai vatan

tere bangāl-o-madras fikr-o-nazar

'azm punjab gujrāt ḳhūn-e-jigar

terī u.p zabāñ nutq dillī nagar

bamba.ī shaan armān arz-e-dakan zindabād ai vatan

zehn keral to mysore tadbīr hai

rājpūtāna baazū kī shamshīr hai

madhya pardesh ḳhvāboñ kī tā'bīr hai

tere an-miT bihār-o-uḌīsa haiñ dhan zindabād ai vatan

giit tagore ke har ġhazal 'mīr' kī

yā'nī parchhā.iyāñ husn-e-tanvīr kī

yā lakīreñ hasīñ terī tasvīr kī

terā har naqsh mauzū'-e-she'r-o-suḳhan zindabād ai vatan

tere ehsās-e-vahdat meñ nānak pale

rāste meñ ahinsā ke 'gautam' chale

bazm-e-chishtī meñ tere hī dīpak jale

tujh se duniyā ne apnā sañvārā chalan zindabād ai vatan

motiyoñ kī tire khet meñ bāliyāñ

tere khaliyān hīroñ bharī thāliyāñ

jhūleñ bāġhoñ meñ yāqūt kī Dāliyāñ

terī miTTī se laa'l aur javāhar kā pan zindabād ai vatan

teri dharti ko jhuk jhuk ke chume gagan zindabaad ai watan

tere zarron mein hain chand suraj magan zindabaad ai watan

teri nadiyon mein amrit ki maujen rawan

teri jhilon mein aab-e-shifa ka saman

teri nahron mein hai daulat-e-jawedan

tere jharnon mein kundan ka nikhre badan zindabaad ai watan

ye himala tera jis ko chume falak

husn-e-kashmir hai KHuld ki ek jhalak

taj ki zau pe hairan hain jinn-o-malak

teri 'azmat ki shobha ajanta ka fan zindabaad ai watan

husn-e-charKH-e-barin teri parchhaiyan

jannaton ka yaqin teri ra'naiyan

rahaton ka amin teri purwaiyan

teri angDaiyan amn ka bankpan zindabaad ai watan

teri shamon se jashn-e-charaghan ki lau

teri subhon ki muskan mein kaif-e-nau

teri raaton ke jalwon mein fitrat ki zau

teri tanhai hai rashk-e-sad-anjuman zindabaad ai watan

teri honTon ko puje madhur bansuri

teri godi mein khelen kala ragni

shyam lila ada teri muskan ki

tere naghmon ki lai radhika ki lagan zindabaad ai watan

tere mizhgan pe kailash ka naz KHam

tere mathe ko chume jamal-e-iram

paon dhoe tera husn-e-rameshwaram

teri banhon ka ehsan gang-o-jaman zindabaad ai watan

tere bangal-o-madras fikr-o-nazar

'azm punjab gujraat KHun-e-jigar

teri up zaban nutq dilli nagar

bambai shan arman arz-e-dakan zindabaad ai watan

zehn keral to mysore tadbir hai

rajputana bazu ki shamshir hai

madhya pardesh KHwabon ki ta'bir hai

tere an-miT bihaar-o-uDisa hain dhan zindabaad ai watan

git tagore ke har ghazal 'mir' ki

ya'ni parchhaiyan husn-e-tanwir ki

ya lakiren hasin teri taswir ki

tera har naqsh mauzu'-e-she'r-o-suKHan zindabaad ai watan

tere ehsas-e-wahdat mein nanak pale

raste mein ahinsa ke 'gautam' chale

bazm-e-chishti mein tere hi dipak jale

tujh se duniya ne apna sanwara chalan zindabaad ai watan

motiyon ki tere khet mein baaliyan

tere khaliyan hiron bhari thaaliyan

jhulen baghon mein yaqut ki Daliyan

teri miTTi se la'l aur jawahar ka pan zindabaad ai watan