tumhaare liye meri pahli nasri nazm

tum un saarī auratoñ se ziyāda ḳhūbsūrat ho

jinhoñ ne mere ḳhayālāt par sho.aloñ kā ek haala sā banā.e rakkhā

aur jin kī mohabbat kā bojh bardāsht karte hue mere qadam tum tak aa pahuñche

tumhārā chehra bhale merī nazroñ se gurezāñ rahā merī āñkheñ raushan haiñ

us chamkīle galeshīare kī tarah jo dhuup meñ duur se nazar aa jaa.e

yahī vo lamha hai jo vaqt ke samundar meñ jazb huā to use apnī vus.at kā andāza huā

yahī lamha jab mausamoñ kī duniyā meñ dāḳhil huā to ḳhizāñ ko bahār se afzal qarār diyā gayā

mujhe patā hai tumhāre kaan roz-e-avval se ab tak ke shā.iroñ kī lā-yānī taqrīroñ se bhare hue haiñ

tumhārā dil an-ginat āshiqoñ ke bosīda jazboñ se muta.assira sar-zamīn hai

lekin yaqīn karo

is kā.enāt kī har shai aur har vo shai jis se mil kar ye kā.enāt banī hai

qaa.em rahne ke liye tumhāre vajūd kā sahārā letī hai

tumhāre vajūd ke ehsās kā sahārā letī hai

maiñ bhī sirf tumheñ mahsūs hī kar saktā huuñ

tum se baat nahīñ kar saktā

lekin vo log jo tum se ham-kalām hone kī aas pe is duniyā meñ aa.e haiñ

jin ke zehn abhī tak tumhārī āñkhoñ ke sāhiloñ se nā-āshnā haiñ

vo julūsoñ kī shakl meñ tumhārī taraf ā.eñge aur āḳhir-kār ḳhālī haath lauT jā.eñge

merī nazmeñ un ke liye mish.al-e-rāh haiñ

aur ye ḳhāmosh alamiya unheñ har jahān meñ surḳh-rū kar saktā hai

shart ye hai ki maiñ kisī bahāne tumhāre baare meñ likhtā rahūñ

tum un sari auraton se ziyaada KHubsurat ho

jinhon ne mere KHayalat par shoalon ka ek haala sa banae rakkha

aur jin ki mohabbat ka bojh bardasht karte hue mere qadam tum tak aa pahunche

tumhaara chehra bhale meri nazron se gurezan raha meri aankhen raushan hain

us chamkile galeshiare ki tarah jo dhup mein dur se nazar aa jae

yahi wo lamha hai jo waqt ke samundar mein jazb hua to use apni wusat ka andaza hua

yahi lamha jab mausamon ki duniya mein daKHil hua to KHizan ko bahaar se afzal qarar diya gaya

mujhe pata hai tumhaare kan roz-e-awwal se ab tak ke shairon ki la-yani taqriron se bhare hue hain

tumhaara dil an-ginat aashiqon ke bosida jazbon se mutassira sar-zamin hai

lekin yaqin karo

is kaenat ki har shai aur har wo shai jis se mil kar ye kaenat bani hai

qaem rahne ke liye tumhaare wajud ka sahaara leti hai

tumhaare wajud ke ehsas ka sahaara leti hai

main bhi sirf tumhein mahsus hi kar sakta hun

tum se baat nahin kar sakta

lekin wo log jo tum se ham-kalam hone ki aas pe is duniya mein aae hain

jin ke zehn abhi tak tumhaari aankhon ke sahilon se na-ashna hain

wo juluson ki shakl mein tumhaari taraf aaenge aur aaKHir-kar KHali hath lauT jaenge

meri nazmen un ke liye mishal-e-rah hain

aur ye KHamosh alamiya unhen har jahan mein surKH-ru kar sakta hai

shart ye hai ki main kisi bahane tumhaare bare mein likhta rahun