waqt

vaqt kī naav meñ sadiyoñ se yahāñ

log aate haiñ kidhar jaate haiñ

vaqt kashtī hai

ki dariyā hai

ki barkhā rut hai

ham to lamhāt kī shabnam se hī ghul jaate haiñ

vaqt to saaz hai

sargam hai

koī giit hai vaqt

ham to lamhāt ke sur-tāl meñ Dhal jaate haiñ

vaqt to aag hai

sho'la hai

kaḌī dhuup hai vaqt

ham to lamhāt kī qindīloñ meñ jal jaate haiñ

vaqt tauret hai

sahrā kā bagūla hai vaqt

vaqt maazī pe paḌī gard kī ik chādar hai

kis qadar naqsh isī gard se dhuñdlā.e haiñ

ham bhī lamhāt kī is gard meñ mil jaate haiñ

vaqt dushman to nahīñ dost hai apnā yaaro

zaḳhm detā hai to marham bhī yahī hai yaaro

ġham ke māroñ kā masīhā bhī yahī hai yaaro

ġham to lamhoñ kī 'ināyāt se pal jaate haiñ

waqt ki naw mein sadiyon se yahan

log aate hain kidhar jate hain

waqt kashti hai

ki dariya hai

ki barkha rut hai

hum to lamhat ki shabnam se hi ghul jate hain

waqt to saz hai

sargam hai

koi git hai waqt

hum to lamhat ke sur-tal mein Dhal jate hain

waqt to aag hai

sho'la hai

kaDi dhup hai waqt

hum to lamhat ki qindilon mein jal jate hain

waqt tauret hai

sahra ka bagula hai waqt

waqt mazi pe paDi gard ki ek chadar hai

kis qadar naqsh isi gard se dhundlae hain

hum bhi lamhat ki is gard mein mil jate hain

waqt dushman to nahin dost hai apna yaro

zaKHm deta hai to marham bhi yahi hai yaro

gham ke maron ka masiha bhi yahi hai yaro

gham to lamhon ki 'inayat se pal jate hain