لاہور کی ہوس ہے نہ ملتان کی ہوس

لاہور کی ہوس ہے نہ ملتان کی ہوس

اٹکی ہوں اک مغل سے ہے توران کی ہوس

رکھا ہے جیسے سوگ دوگانہ نے یار کا

مسی کی کچھ ہوس ہے نہ کچھ پان کی ہوس

مجھ کو چھوا تو کھاؤں گی الماس کوٹ کر

دل کی رہے گی دل ہی میں مرجان کی ہوس

چاندی تو کیا میں سونے میں منڈھوا دوں اے بوا

ہو ڈھولنے کی تجھ کو جو قرآن کی ہوس

عرضی لگا دوں جا کے عدالت میں مہر کی

ہاں لے مروں جو ان کو ہو بہتان کی ہوس

مجھ سے کیا نگوڑے نے بی رات رات بھر

تو بھی مٹی نہ اس موے شیطان کی ہوس

اولاد جیتی جاگتی جم جم ہو اس کے گھر

پوری خدا کرے مرے بے جان کی ہوس

اے جانؔ اب بلا لے وہ دیتی ہے تجھ پہ جان

مٹی میں تو ملا نہ بنی جان کی ہوس