Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "ajaa.ib"

نظم کے متعلقہ نتیجہ "ajaa.ib"

نظم

چار باغ اسٹیشن دیکھو
شہر میں ایک نیا پن دیکھو
سجی سجائی دلہن دیکھو
قدم قدم پر فیشن دیکھو
آؤ تمہیں لکھنؤ دکھائیں
اور یہاں کی سیر کرائیں
کتنا اچھا چڑیا گھر ہے
شیر ہرن بھالو بندر ہے
مور کبوتر اور تیتر ہے
اندر مردہ عجائب گھر ہے
آؤ تمہیں لکھنؤ دکھائیں
اور یہاں کی سیر کرائیں
حضرت گنج کی سیر کرائیں
قیصر باغ کی لاٹ دکھائیں
اور امین آباد گھمائیں
شام اودھ رنگین بنائیں
آؤ تمہیں لکھنؤ دکھائیں
اور یہاں کی سیر کرائیں
یہ پوری یوپی کا دل ہے
اس میں ایک چھتر منزل ہے
آرٹ اسکول لب ساحل ہے
ندوہ دیکھنے کے قابل ہے
آؤ تمہیں لکھنؤ دکھائیں
اور یہاں کی سیر کرائیں
چوک نخاس حسین آباد
گولا گنج نظیر آباد
پیار محبت میں آزاد
مرد و زن شیریں فرہاد
آؤ تمہیں لکھنؤ دکھائیں
اور یہاں کی سیر کرائیں
آؤ شہد اسمارک دکھائیں
جھنڈے والے پارک میں جائیں
بیلی گارد کو سمجھائیں
میڈیکل کالج دکھلائیں
آؤ تمہیں لکھنؤ دکھائیں
اور یہاں کی سیر کرائیں
یہ سب شہروں میں نیارا ہے
نام اس کا کتنا پیارا ہے
سب کی آنکھوں کا تارا ہے
امن و سکوں کا گہوارا ہے
آؤ تمہیں لکھنؤ دکھائیں
اور یہاں کی سیر کرائیں

جاوید اقبال
نظم

یہ ماضی جو مری تنہائیوں کے ساتھ رہتا ہے
یہ اک نادان بچے کی طرح تنہائی کو
اشارہ کرتا ہے ٹھوڑی پکڑ کر اور کہتا ہے
وہ دیکھو گاؤں کے سینے پہ سر رکھے ہوئے سرسوں
تمہاری کمسنی کھیلی ہے جس کی گود میں برسوں
نقوش پا سے اب تک ہر گلی کی مانگ روشن ہے
ابھی تک گود پھیلائے ہوئے ڈیرے کا آنگن ہے
رسیلی جامنوں کے پیڑ کی کمزور شاخوں نے
تمہاری انگلیوں کا ہر نشاں محفوظ رکھا ہے
لبوں پر جھیل کی گہرائیوں کے ہے بس اک شکوہ
کہ جب سے تم گئے ہو کوئی بھی ہم تک نہیں پہنچا
کنارے جھیل کے وہ پیڑ اب تک منتظر سا ہے
کب آؤ گے یہاں کپڑے اترو گے نہاؤ گے
یہ ماضی جو مری تنہائیوں کے ساتھ رہتا ہے
یہ اک نادان بچے کی طرح تنہائی کو
اشارہ کرتا ہے ٹھوڑی پکڑ کر اور کہتا ہے
وہ دیکھو گاؤں کے کھلیانوں میں سویا ہوا جادو
نشیلی رات کی رانی وہ لو دیتی ہوئی خوشبو
دیوں کا دھیمی دھیمی روشنی دینا دھواں دینا
شکستہ جھونپڑوں کا زندگی کو لوریاں دینا
کھنکتی ہیں رسوئی گھر میں الھڑ چوڑیاں اب تک
بھرا کی پولیاں لاتی ہیں سر پر بوڑھیاں اب تک
کے کنارے کچی اینٹوں سے بنا مندر
سلگتے کنڈوں سے اٹھتی دھوئیں کی ملگجی چادر
ہرے کھیتوں کی مینڈوں پر سلگتے جسم کے سائے
لرزتے ہونٹھ گھبرائی ہوئی سانسوں کے افسانے
لچکتی آم کی شاخوں پہ بل کھائے ہوئے جھولے
کسی کا بھاگنا یہ کہہ کے کوئی ہے ہمیں چھو لے
یہ دیکھو زندگی کتنی حسیں ہے کتنی بھولی ہے
اسی آغوش میں آ جاؤ جس میں آنکھ کھولی ہے
یہ ماضی جو مری تنہائیوں کے ساتھ رہتا ہے
یہ کہتا ہے کہ میں گزری ہوئی باتوں میں کھو جاؤں
تمہاری زلف سے مہکی ہوئی راتوں میں کھو جاؤں
اسے میں کیسے سمجھاؤں کہ اب یہ سانس کا ڈورا
اک ایسی دھار کی تلوار ہے جس پر گزرنا ہے
مجھے اور زندگی کے زخم کو ٹانکے لگانا ہیں
اسے میں کیسے سمجھاؤں کہ یہ ماضی کی تصویریں
اب اک ایسی امانت ہیں جسے میں رکھ نہیں سکتہ
اگر رکھوں تو ناکارہ نکما کہہ کے یہ دنیا
مجھے ٹھوکر لگا دے اور خود آگے کو بڑھ جائے
مری پس ماندگی پر ہر نذر اٹھے ترس کھائے
مجھے مردہ عجائب گھر کی ایسی مورتی سمجھے
جو سب کو اس لیے پیاری ہے کہ کافی پرانی ہے
یہ ماضی جو مری تنہائیوں کے ساتھ رہتا ہے
اسے میں کیسے سمجھاؤں کہ یہ ماضی کی تصویریں
اب اک ایسی امانت ہیں جسے میں رکھ نہیں سکتہ

وسیم بریلوی
نظم

میں تمہیں
اس نظم سے بناؤں گا
جو میں نے
عجائب گھر کی سیڑھیوں پر
بیٹھ کر لکھی ہے
اس اداسی سے بناؤں گا
جو میری نظم
اور آنکھوں میں موجود ہے

ذیشان ساحل
نظم

حریم محمل میں آ گیا ہوں سلام لے لو
سلام لے لو کہ میں تمہارا امین قاصد خجل مسافر عزا کی وادی سے لوٹ آیا
میں لوٹ آیا مگر سراسیمہ اس طرح سے
کہ پچھلے قدموں پلٹ کے دیکھا نہ گزرے رستوں کے فاصلوں کو
جہاں پہ میرے نشان پا اب تھکے تھکے سے گرے پڑے تھے
حریم محمل میں وہ سفیر نوید پرور
جسے زمانے کے پست و بالا نے اتنے قصے پڑھا دئیے تھے
جو پہلے قرنوں کی تیرگی کو اجال دیتے
تمہیں خبر ہے
یہ میرا سینہ قدیم اہرام میں اکیلا وہ اک حرم تھا
عظیم رازوں کے کہنہ تابوت جس کی کڑیوں میں بس رہے تھے
انہیں ہواؤں کا ڈر نہیں تھا
نہ صحرا زادوں کے نسلی کا ہی ان کی گرد خبر کو پہنچے
حریم محمل میں وہ امانت کا پاسباں ہوں
جو چرم آہو کے نرم کاغذ پہ لکھے نامے کو لے کے نکلا
وہی کہ جس کے سوار ہونے کو تم نے بخشا جہاز صحرا
طویل راہوں میں خالی مشکوں کا بار لے کر ہزار صدیاں سفر میں گرداں
کہیں سرابوں کی بہتی چاندی کہیں چٹانوں کی سخت قاشیں
میان راہ سفر کھڑے تھے جکڑنے والے نظر کے لوبھی
مگر نہ بھٹکا بھٹکنے والا
جو دم لیا تو عزا میں جا کر
حریم محمل سنو فسانے جو سن سکو تو
میں چلتے چلتے سفر کے آخر پہ ایسی وادی میں جا کے ٹھہرا
اور اس پہ گزرے حریص لمحوں کے ان نشانوں کو دیکھ آیا
جہاں کے نقشے بگڑ گئے ہیں
جہاں کے طبقے الٹ گئے ہیں
وہاں کی فصلیں زقوم کی ہیں
ہوائیں کالی ہیں راکھ اڑ کر کھنڈر میں ایسے پھنکارتی ہے
کہ جیسے اژدر چہار جانب سے جبڑے کھولے غدر مچاتے
زمیں پہ کینہ نکالتے ہوں
کثیف زہروں کی تھیلیوں کو غضب سے باہر اچھالتے ہوں
مہیب سائے میں دیوتاؤں کا رقص جاری تھا
ٹوٹے ہاتھوں کی ہڈیوں سے وہ دہل باطل کو پیٹتے تھے
ضعیف کوؤں نے اہل قریہ کی قبریں کھودیں
تو ان کے ناخن نحیف پنجوں سے جھڑ کے ایسے بکھر رہے تھے
چکوندروں نے چبا کے پھینکے ہوں جیسے ہڈی کے خشک ریزے
حریم محمل وہی وہ منزل تھی جس کے سینے پہ میں تمہاری نظر سے پہنچا اٹھائے مہر و وفا کے نامے
وہیں پہ بیٹھا تھا سر بہ زانو تمہارا محرم
کھنڈر کے بوسیدہ پتھروں پر حزین و غمگیں
وہیں پہ بیٹھا تھا
قتل ناموں کے محضروں کو وہ پڑھ رہا تھا
جو پستیوں کے کوتاہ ہاتھوں نے اس کی قسمت میں لکھ دئیے تھے
حریم محمل میں اپنے ناقہ سے نیچے اترا تو میں نے دیکھا کہ اس کی آنکھیں خموش و ویراں
غبار صحرا مژہ پہ لرزاں تھا ریت دیدوں میں اڑ رہی تھی
مگر شرافت کی ایک لو تھی کہ اس کے چہرے پہ نرم ہالہ کیے ہوئے تھی
وہ میرے لہجے کو جانتا تھا
ہزار منزل کی دوریوں کے ستائے قاصد کے اکھڑے قدموں کی چاپ سنتے ہی اٹھ کھڑا تھا
دیار وحشت میں بس رہا تھا
پہ تیری سانسوں کے زیر و بم سے اٹھی حرارت سے آشنا تھا
وہ کہہ رہا تھا یہاں سے جاؤ کہ یاں خرابوں کے کارخانے ہیں
روز و شب کے جو سلسلے ہیں کھلے خساروں کی منڈیاں ہیں
وہ ڈر رہا تھا تمہارا قاصد کہیں خساروں میں بٹ نہ جائے
حریم محمل میں کیا بتاؤں وہیں پہ کھویا تھا میرا ناقہ
فقط خرابے کے چند لمحے ہی اس کے گودے کو کھا گئے تھے
اسی مقام طلسم گر میں وہ استخوانوں میں ڈھل گیا تھا
جہاں پہ بکھرا پڑا تھا پہلے تمہارے محرم کا اسپ تازی
اور اب وہ ناقہ کے استخواں بھی
تمہارے محرم کے اسپ تازی کے استخوانوں میں مل گئے ہیں
حریم محمل وہی وہ پتھر تھے جن پہ رکھے تھے میں نے مہر و وفا کے نامے
جہاں پہ زندہ رتوں میں باندھے تھے تم نے پیمان و عہد اپنے
مگر وہ پتھر کہ اب عجائب کی کار گہہ ہیں
تمہارے نامے کی اس عبارت کو کھا گئے ہیں
شفا کے ہاتھوں سے جس کو تم نے رقم کیا تھا
سو اب نہ ناقہ نہ کوئی نامہ نہ لے کے آیا جواب نامہ
میں نامراد و خجل مسافر
مگر تمہارا امین قاصد عزا کی وادی سے لوٹ آیا
اور اس نجیب و کریم محرم وفا کے پیکر کو دیکھ آیا
جو آنے والے دنوں کی گھڑیاں ابد کی سانسوں سے گن رہا ہے

علی اکبر ناطق
نظم

سفیر لیلیٰ یہ کیا ہوا ہے
شبوں کے چہرے بگڑ گئے ہیں
دلوں کے دھاگے اکھڑ گئے ہیں
شفیق آنسو نہیں بچے ہیں غموں کے لہجے بدل گئے ہیں
تمہی بتاؤ کہ اس کھنڈر میں جہاں پہ مکڑی کی صنعتیں ہوں
جہاں سمندر ہوں تیرگی کے
سیاہ جالوں کے بادباں ہوں
جہاں پیمبر خموش لیٹے ہوں باتیں کرتی ہوں مردہ روحیں
سفیر لیلیٰ تمہی بتاؤ جہاں اکیلا ہو داستاں گو
وہ داستاں گو جسے کہانی کے سب زمانوں پہ دسترس ہو
شب رفاقت میں طول قصہ چراغ جلنے تلک سنائے
جسے زبان ہنر کا سودا ہو زندگی کو سوال سمجھے
وہی اکیلا ہو اور خموشی ہزار صدیوں کی سانس روکے
وہ چپ لگی ہو کہ موت بام فلک پہ بیٹھی زمیں کے سائے سے کانپتی ہو
سفیر لیلیٰ تمہی بتاؤ وہ ایسے دوزخ سے کیسے نپٹے
دیار لیلیٰ سے آئے نامے کی نو عبارت کو کیسے پڑھ لے
پرانے لفظوں کے استعاروں میں گم محبت کو کیونکے سمجھے
سفیر لیلیٰ ابھی ملامت کا وقت آئے گا دیکھ لینا
اگر مصر ہو تو آؤ دیکھو
یہاں پہ بیٹھو یہ نامے رکھ دو
یہیں پہ رکھ دو انہی سلوں پر
کہ اس جگہ پر ہماری قربت کے دن ملے تھے
وہ دن یہیں پر جدا ہوئے تھے انہی سلوں پر
اور اب ذرا تم نظر اٹھاؤ مجھے بتاؤ تمہارا ناقہ کہاں گیا ہے
بلند ٹخنوں سے زرد ریتی پہ چلنے والا صبیح ناقہ
وہ سرخ ناقہ سوار ہو کر تم آئے جس پر بری سرا میں
وہی، کہ جس کی مہار باندھی تھی تم نے بوسیدہ استخواں سے
وہ اسپ تازی کے استخواں تھے
مجھے بتاؤ سفیر لیلیٰ کدھر گیا وہ
ادھر تو دیکھو وہ ہڈیوں کا ہجوم دیکھو
وہی تمہارا عزیز ساتھی سفر کا مونس
پہ اب نہیں ہے
اور اب اٹھاؤ سلوں سے نامے
پڑھو عبارت جو پڑھ سکو تو
کیا ڈر گئے ہو کہ سطح کاغذ پہ جز سیاہی کے کچھ نہیں ہے
خجل ہو اس پر کہ کیوں عبارت غبار ہو کر نظر سے بھاگی
سفیر لیلیٰ یہ سب کرشمے اسی کھنڈر نے مری جبیں پر لکھے ہوئے ہیں
یہی عجائب ہیں جن کے صدقے یہاں پرندے نہ دیکھ پاؤ گے
اور صدیوں تلک نہ اترے گی یاں سواری
نہ چوب خیمہ گڑے گی یاں پر
سفیر لیلیٰ یہ میرے دن ہیں
سفیر لیلیٰ یہ میری راتیں
اور اب بتاؤ کہ اس اذیت میں کس محبت کے خواب دیکھوں
میں کن خداؤں سے نور مانگوں
مگر یہ سب کچھ پرانے قصے پرائی بستی کے مردہ قضیے
تمہیں فسانوں سے کیا لگاؤ
تمہیں تو مطلب ہے اپنے ناقہ سے اور نامے کی اس عبارت سے
سطح کاغذ سے جو اڑی ہے
سفیر لیلیٰ تمہارا ناقہ
میں اس کے مرنے پر غم زدہ ہوں
تمہارے رنج و الم سے واقف بڑے خساروں کو دیکھتا ہوں
سو آؤ اس کی تلافی کر دوں یہ میرے شانے ہیں بیٹھ جاؤ
تمہیں خرابے کی کار گہہ سے نکال آؤں
دیار لیلیٰ کو جانے والی حبیب راہوں پہ چھوڑ آؤں

علی اکبر ناطق
نظم

یہ دنیا تو ان شعلہ سامان لوگوں نے آپس میں تقسیم کر لی
جو ہتھیار کی شکل میں رنج و غم ڈھالتے ہیں
یا گولہ بارود کے کارخانوں کے مالک ہیں
یا پھر ثنا خواں ہیں ان کے
ہمارے لیے صرف نعرے بچے ہیں
صنعتی دور کے کج کلاہوں کی داد و دہش روح پرور ہو یا جان لیوا
مگر زندہ باد، آفریں، مرحبا، کے سوا کچھ نہیں پاس اپنے
یہ سب جانتا ہے ہماری شجاعت کی پرواز کیا ہے
ہماری جواں مردی اک صوبہ جاتی تعصب سے
یا فرقہ واری فسادات سے آگے کچھ بھی نہیں ہے
فتوحات اسکندری ہم نے تختی پہ لکھ کر مٹا دی ہیں کب کی
ہمارے بعد زمیں کے تلے سو رہے ہیں
عجائب گھروں میں لٹکتی ہیں تلواریں ان کی
اور ان کے زریں لبادوں کو گھن کھا گیا ہے
ذرہ بکتروں پر کلونس آ گئی ہے
یہ سب جانتا ہے ہماری تگ و تاز کیا ہے
ہمارے شکم گر ہمارے سروں پہ نہ ہوتے
اور چہروں میں اعضائے جنسی
تو ہم اچھے انسان بنتے
ہمارے گھروں کے کم و بیش سب عقبی دروازے پیہم کھلے ہیں
ہمارے لہو میں ہرے لال پیلے بہت سارے پرچم کھلے ہیں
کہیں سے مگر حق کی آواز آتی نہیں ہے
ہماری زباں دل کی ساتھی نہیں ہے
ہمارے لیے کھوکھلا لفظ جمہوریت ہے، تقاریر ہیں لیڈروں کی
ہمارے لیے روز ناموں کے صفحات ہیں، اشتہارات ہیں نیم جنسی
ہمارے لیے دیوتاؤں کے بت ہیں، خدا کے فرامین ہیں اور عقبیٰ
جو بد رنگ ہے حال کی طرح اور کورے لٹھے کی بو سے بھری ہے
ہمارے لیے صرف روٹی کی جد و جہد
عورتوں کے برہنہ بدن کی تمنا سے آگے کہیں کچھ نہیں ہے
ہماری رگوں میں جو تیزاب ہے اس کی شدت کبھی کم نہ ہوگی!

اختر الایمان
نظم

او مٹیالی!
تیرے جسم کی سوندھی خوشبو
روئیں روئیں میں سانولی رت بیدار کرے
دل کی اور سے گہری گھور گھٹائیں امڈیں
اور میرے یہ پیاسے ہونٹ
تیرے سینے کے پیالوں میں
تیرتے انگوروں کے رس کے لمس میں بھیگیں
تیری ہری بھری سانسوں کی مشک نچوڑیں
او مٹیالی
تیرے جوبن کے موسم میں
دل کے اندر غیبی سورج کے گل رنگ عجائب جاگیں
پنج پوروں پر پانچ حسوں کے پھول کھلیں
اور تو ہولے ہولے اپنے
پیار بھرے ہونٹوں سے میرا
شہد کشید کرے

سرمد صہبائی
نظم

مرا وجود
دیکھتے ہی دیکھتے
ایک عجائب خانے میں ڈھل رہا ہے
کہ میرے لا شعور نے
آثار قدیمہ کی نادر عنایتوں کو
چھپا کے مجھ سے
مجھ ہی میں جمع کر دیا ہے
یہاں کہیں کسی ریک میں
مرے حنوط شدہ حرف اور لمحے
پڑے ہوئے ہیں
جنہیں نہ جانے کون سا مسالہ لگا دیا گیا ہے
کہ مرے جسم کی حرارت سے بھی وہ
گل نہیں رہے ہیں
ان المایوں سے
مری ٹوٹی ہوئی چوڑیوں کے ساز کی
آواز آ رہی ہے
یہ دیکھو شیلف میں
میری بچپن کی گڑیا کا
ٹوٹا ہوا جسم سو رہا ہے
کہیں میری سنگھار میز کا آئینہ
بے رنگ ہو کر چٹخ گیا ہے
مگر اب بھی
میرے عذاب لمحوں کا
عکس دے رہا ہے
کہیں کسی سرمہ دانی میں
شاید کبھی میں نے اپنی آنکھ چھوڑ دی تھی
جو اس میں سے مجھے گھورتی ہے
اور میری زندگی
میرے زنگ آلود زیوروں میں
دب کے چیختی ہے
اور پائلوں کی آواز سے ڈر رہی ہے
ایک ٹوٹی ہوئی کنگھی سے
مرے بال الجھے ہوئے ہیں
اور کنارے پہ رکھی ہوئی
صراحی سے پیاس کی بو
رس رہی ہے
کسی گھڑیال کی ٹوٹی ہوئی سوئی
اک عذاب لمحے میں مرتعش ہے
اور قریب ہی
میرے جذبوں کے تالاب سے
باس اٹھ رہی ہے
اور تماش بین،
جوق در جوق میرے عجائب خانے کو
دیکھنے کو آ رہے ہیں
ان میں سے کوئی تماش بین
اس عجائب خانے کی
سانس لیتی ہوئی موت کو
تضحیک سے دیکھ کر
نظر انداز کرتا ہوا جا رہا ہے
اور کوئی عجائبات کا شوقین
ان تمام اشیاء پہ تحقیق کر کے
اپنا آپ ثابت کرنا چاہتا ہے
مگر ان کو دھول میں پڑی ہوئی
تاریخ کی الجھی ہوئی ڈور کا
کوئی سرا نہیں مل رہا ہے
اور میں کنارے پہ کھڑی ہوئی
اپنے اسی ایک سرے کے ملنے کی منتظر ہوں
کہ مرا وجود دیکھتے ہی دیکھتے
ایک عجائب خانے میں ڈھل چکا ہے

ثروت زہرا
نظم

حسن جس شہر میں
تو گیلی مٹی سے
کبھی کوزے بناتا تھا
تجھے اس شہر میں مٹی نہیں
اب سر ملیں گے
ہزاروں خستہ تن
لاشوں سے رستا خون
تیرے شہر کی مٹی کو
یوں سیراب کرتا ہے
کہ اب جو تو کبھی
مٹی سے کھیلے گا
تو ہر کوزہ صراحی جام و مینا
لہو کے رنگ کے ہوں گے
تری نقش و نگاری
اور ترے ہاتھوں کی صناعی
نہ ان کوزوں کو بخشے گی وہ حیرت
وہ ندرت اور وہ نقاشی
جو بس تیرا ہی حصہ تھی
وہ اس مٹی کی سوندھی تیز خوشبو
پرانے خون کی بدبو میں مل کر
ایسی بدلی ہے
تجھے محسوس ہوگا
تو کسی مرگھٹ میں بیٹھا ہے
تجھے دجلہ کا وہ شفاف پانی یاد ہے کیا
وہ جس سے تیرے کوزوں کی ضیا تھی
وہ جس سے پیاس بجھتی تھی
ترے سوکھے بدن کی
وہ دجلہ سرخ ہے
معصوم بچوں کے لہو سے
حسن عطا یوسف کی دکاں کے سامنے
کل بم پھٹا تھا
نہ جانے کتنے کوزہ گر مرے
جن کے گھروں میں
اسی مٹی کے پیالے ہیں مگر خالی
تڑپتی بھوک ہے اور لب سوالی
نہ جانے کتنے کاری گر مرے
اب کون گنتا ہے
حسن اس شہر میں اب کوئی مرجینہ نہیں ہے
نہ دنیا زاد، نہ حاسب کریم الدین کا گھر ہے
عجائب گھر ہیں نہ وہ درس گاہیں
کتب خانوں میں لشکر سو رہے ہیں
کوئی زندہ نہیں اس شہر میں
بس موت زندہ ہے
حسن تو مجھ سے وعدہ کر
کہ چاہے کچھ بھی ہو جائے
پلٹ کر اس شہر میں
پھر کبھی واپس نہ آئے گا

سلمان انصاری
نظم

اٹھو
سیلے کمرے سے باہر کو نکلو
وہاں ہے زمانہ تغیر پذیر
کہ ہم چاہ تاریک میں
اپنی آنکھیں نہ کھو دیں
اٹھیں جب
تو سب چیزیں بدلی ملیں
اور سارے تماشے ہمیں
اجنبی آنکھ سے گھورتے ہم سے پوچھیں
کہ تم کون ہو
کس عجائب کدے سے نکل آئے ہو
اور جب
اپنی جیبیں ٹٹولیں
تو سکے ہمارے زر و سیم کے
قیمتیں کھو چکے ہوں
ہمیں یہ خبر مل رہی ہو
کہ ہم عہد رفتہ کے صحرائے ہو میں کہیں
اپنے موہوم و مبہم ہیولے کی بھی
جانے کب کی نفی کر چکے

انور شمیم
نظم

ایک لمحہ بھی اک زمانہ ہے
یاد رکھنا کہ بھول جانا ہے
لب و رخسار و گیسوئے خم دار
وہ لچکتی ہوئی باہیں وہ ہم آغوش بدن
وہ چھلکتے ہوئے پیمانوں کی محفل وہ ارم
نغمہ و رقص فسوں کارئ فن
شہر آرائش جنت ہے زمیں پر کہ نہیں
یہ نمائش گہ تعمیر و ترقی یہ زمیں
زندگی محنت و قدرت کے عجائب
یہ مشینیں خود کار
دھات کے پرزے جو ہیں فرض شناس و ہشیار
اے خدا یہ ترے سیاروں کے رکھوالے
ایک لمحہ بھی اک زمانہ ہے
یاد رکھنا کہ بھول جانا ہے
آج موسم بہت سہانا ہے
جی کرے ہے کہ جان دے ڈالیں
آج موسم بہت سہانا ہے
کٹ گئے قاتلوں کے ہات کہیں
پائی محکوم نے نجات کہیں
بادشاہت زمیں پہ دے ماری
چھین لی ہے عنان مختاری
ہر طرف انقلاب کے آثار
ہیں کہاں پرچم شہ خوں خوار
رشک جمشید فخر اسکندر
قید محلوں میں یا کہ ملک بدر
ڈگمگاتا ہے تخت شاہانہ
شہریاروں کا ختم افسانہ
ان گنت بجلیاں گریں لیکن
چار تنکوں کا آشیانہ ہے
اے خدائے ابد خدائے ازل
تیرے گھر میں پہنچ گئی ہلچل

نیاز حیدر
نظم

تم اسے جانتے ہو یہ کیا ہے
پیارے بچوں یہ لال قلعہ ہے
لال پتھر کے ہیں در و دیوار
اس میں کرتے تھے بادشاہ دربار
پہلے جیسی نہ اب حکومت ہے
پہلے جیسی نہ اب حفاظت ہے
ہاں مگر اس کے گیٹ کے باہر
کچھ سپاہی ہیں اب بھی پہرے پر
دیکھتے ہیں اسے ٹکٹ لے کر
اس کے اندر ہے اک عجائب گھر
جس میں سکے ہیں بادشاہوں کے
جس میں کپڑے ہیں بادشاہوں کے
جس میں رکھے ہیں انگنت ہتھیار
جیسے بندوق ڈھال اور تلوار
لال قلعہ جہاں میں ہے مشہور
جامع مسجد سے ہے یہ تھوڑی دور

مرتضیٰ ساحل تسلیمی
نظم

تو کھلی کتاب عجائب کی
ترا ورق ورق طوفان لگے
تری کتھا میں رمزیں شہد بھری
تو نفس نفس انسان لگے

مسعود منور
نظم

عجائب گھر کی سیڑھی پر
کوئی عینک اتارے رو رہا ہے
گزرے وقتوں پر
مگر مہندی لگے ہاتھوں کو اس سے کیا غرض ہوگی
کواڑوں پر جمی کائی کسی کی دستکوں سے صاف ہونی ہے
نہیں معلوم کتنے دن ہماری رات ہونی ہے

سیف علی
نظم

چلتی پھرتی اک دیوار
دیکھی عجائب گھر میں نثارؔ
ہلتی تھی وہ ادھر ادھر
چلتی تھی وہ کھمبوں پر
چار جڑے تھے اس میں کھمبے
موٹے موٹے لمبے سے
دیوار سے تھا گنبد جو لگا
پائپ تھا اس سے جڑا ہوا
ادھر ادھر وہ ہلتا تھا
موٹا موٹا بھدا سا
بھالا لے کر بیٹھے تھے
میاں مہاوت اکڑے ہوئے
گنبد میں تھے دروازے
چھوٹے چھوٹے بھورے سے
کہتے ہیں یہ اہل زباں
ہوتے ہیں دیوار کے کان
کان تھے اس کے جیسے سوپ
بھورا بھورا رنگ اور روپ
گدا تھا دیوار کے اوپر
چمک رہی تھی چم چم چادر
ننھے منے بیٹھے تھے
پھولوں کے گلدستے تھے
گنبد میں سے دو بھالے
ادھر ادھر تھے نکلے ہوئے
چمک رہے تھے ایسے ساتھی
دانت دکھائے جیسے ہاتھی
اب یہ بتاؤ ننھے ساتھی
دیکھی تھی دیوار کہ ہاتھی

نثار عباسی
نظم

اے حضرت متل یہ کرم ہے کہ ستم ہے
کیوں لطف نظر آپ کا نا چیز پہ کم ہے
واللہ کہ ہیں آپ بھی اک زندہ عجائب
صحرا میں اذاں دے کے کہاں ہو گئے غائب
مانا کہ مرے شہر سے دلی ہے بہت دور
جیسے کہ رہ و رسم وفا سے دل مخمور
یہ بات کہے کون
جنگل میں اگر بیل پکا ہے تو چکھے کون
صحرا میں جو گونجی ہے وہ آواز سنے کون
جب تک نہیں پہنچے دل صاحب نظر ان تک
شوریدہ سراں تک
آواز اذاں کیا
گل بانگ فغاں کیا
میں کان میں انگلی دیے بیٹھا تو نہیں ہوں
بہرا تو نہیں ہوں
گو ہاتھ میں جنبش نہیں آنکھوں میں تو دم ہے
پھر غیب سبب کیوں
اس بندۂ ناچیز پہ تخفیف کرم ہے
یہ بھی نہیں کہتا کہ مجھے مفت ہی بھیجیں
توفیق باندازۂ ہمت کا ہوں قائل
میں آپ کی دیرینہ شرافت کا ہوں قائل
ہر حال میں راضی بہ رضا ہوں
ہدیہ بھی ادا کرنے سے انکار نہیں ہے
آپس میں تکلف کی دیوار نہیں ہے
پھر مجھ پہ تغافل کی نظر کیوں ہے جفا کیوں
یہ حضرت مخمورؔ سعیدی کی ادا ہے

رضا نقوی واہی
نظم

آفرینش سمے ڈال دیجے خدایا
بدن میں تنوع کی حیرت گری
میری موروثیت کی جڑوں میں ہر اک سانس لیتی اکائی کے خلیوں کی مٹی بنے
ریڑھ کی مرکزی جالیوں میں عجائب کدوں کا خزانہ چھپے
میرے ہاتھوں پہ بھٹکے ہوئے راہ گیروں کی منزل کا نقشہ بنے
اور آنکھوں کی ان پتلیوں میں طلسمی چراغوں کا جنگل بسے
اپنی آنکھوں کی اس روشنی سے زمیں کی تہوں کو فروزاں کروں
اور فاقہ کشوں کی زمینوں میں گیہوں کی صورت اگوں
بے وطن کشتیوں کے مہاجر قبیلوں کا مانجھی بنوں
سرد پربت کی تیکھی ہواؤں کو سہتے مکینوں کا سورج بنوں
اور ازل سے گپھاؤں کے تاریک منظر میں پہلی شعاعوں کا مژدہ بنوں
ہڈیاں نوچ کھاتے ہوئے دیوتاؤں کے سینوں میں پلتی ہوس کا صفایا کروں
کھردرے پاؤں والوں کے پاؤں تلے
مخملیں سبز سپنے بچھاتی ہوئی گھاس کا ایک رستہ بنوں
یہ جو ممکن نہ ہو تو مری خاک سے چند گرتے مکانوں کی دیوار کو ہی اٹھا دیجیے
میری مٹی سے مسکن بنا دیجیے

عرفان شہود
نظم

کچھ دیر کو
پرس کندھے سے اتارو
گاڑی کی چابی
اتنی حفاظت سے رکھو
کہ ڈھونڈنے میں وقت لگے
مجبوراً رکنا پڑے
آؤ
ان لمحوں میں گھر کر لیں
وہ جو تم کو نہ کر سکیں
آج کر ڈالو
برسوں کے خواب
دماغ جو ایک لمحہ میں
خواب کرتا ہے
حقیقت کر ڈالو
انعام میں جو ملے
کوکھ میں صدیوں بعد
جنم دینے کو چھپا رکھنا
آنے والے وقتوں میں
شاید ہم
صرف عجائب گھروں میں ملیں

ایرج مبارک
نظم

یاد ہے
اک دن عجائب خانے کی
خاموش و بوسیدہ عمارت دیکھ کر
تم نے کہا تھا
یہ اک ایسا کل ہے
جس کو اہل دنیا
آج میں زندہ نہ رکھ پائے

شہرام سرمدی
نظم

ہماری رسم ہے
تم جانتے ہو
کئی صدیوں سے ہم یہ کر رہے ہیں
بڑی محنت سے خون دل جلا کر
صبح و شب نور آنکھوں کو پلا کر
تراشے سنگ مرمر سخت پتھر
اور ان سے خوبصورت بت بنائے
بٹھا کر مندروں میں ویدیوں پر
انہیں پوجا انہیں سجدے کیے ہیں
ہماری رسم ہے
تم جانتے ہو
کہ کھنڈت ہو گئی ہے مورتی جب
تو ہم نے تج دیا
دیکھا نہ مڑ کر
وہ تنہا رہ گئے یگ کی ڈگر پر
نہ کوئی بھکت نہ کوئی پجاری
نہ کوئی آرتی
نہ دھوپ دیپک
زیادہ سے زیادہ یہ ہوا ہے
عجائب گھر کی زینت ہو گئے ہیں
ہماری رسم ہی چونکہ یہی ہے
تمہارا فرض ہے
محتاط رہنا
شکست و ریخت سے خود کو بچانا
صنم ہو گوشت کے زندہ
یا پتھر
خراش آئی اگر رخ پر بدن پر
تو کوئی بھی تمہیں سجدہ نہ ہوگا
اگر سالم رہے
سجدے بھی ہوں گے

کرن کاشمیری
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے