کی تلاش کا نتیجه | موضو - نظم, صفحہ buzdil

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "buzdil"

نظم کے متعلقہ نتیجہ "buzdil"

نظم

اے دیکھنے والو
اس حسن کو دیکھو
اس راز کو سمجھو
یہ نقش خیالی
یہ فکرت عالی
یہ پیکر تنویر
یہ کرشن کی تصویر
معنی ہے کہ صورت
صنعت ہے کہ فطرت
ظاہر ہے کہ مستور
نزدیک ہے یا دور
یہ نار ہے یا نور
دنیا سے نرالا
یہ بانسری والا
گوکل کا گوالا
ہے سحر کہ اعجاز
کھلتا ہی نہیں راز
کیا شان ہے واللہ
کیا آن ہے واللہ
حیران ہوں کیا ہے
اک شان خدا ہے
بت خانے کے اندر
خود حسن کا بت گر
بت بن گیا آ کر
وہ طرفہ نظارے
یاد آ گئے سارے
جمنا کے کنارے
سبزے کا لہکنا
پھولوں کا مہکنا
گھنگھور گھٹائیں
سرمست ہوائیں
معصوم امنگیں
الفت کی ترنگیں
وہ گوپیوں کے ساتھ
ہاتھوں میں دیئے ہاتھ
رقصاں ہوا برج ناتھ
بنسی میں جو لے ہے
نشہ ہے نہ مے ہے
کچھ اور ہی شے ہے
اک روح ہے رقصاں
اک کیف ہے لرزاں
ایک عقل ہے مے نوش
اک ہوش ہے مدہوش
اک خندہ ہے سیال
اک گریہ ہے خوش حال
اک عشق ہے مغرور
اک حسن ہے مجبور
اک سحر ہے مسحور
دربار میں تنہا
لاچار ہے کرشنا
آ شیام ادھر آ
سب اہل خصومت
ہیں در پئے عزت
یہ راج دلارے
بزدل ہوئے سارے
پردہ نہ ہو تاراج
بیکس کی رہے لاج
آ جا میرے کالے
بھارت کے اجالے
دامن میں چھپا لے
وہ ہو گئی ان بن
وہ گرم ہوا رن
غالب ہے دریودھن
وہ آ گئے جگدیش
وہ مٹ گئی تشویش
ارجن کو بلایا
اپدیش سنایا
غم زاد کا غم کیا
استاد کا غم کیا
لو ہو گئی تدبیر
لو بن گئی تقدیر
لو چل گئی شمشیر
سیرت ہے عدو سوز
صورت نظر افروز
دل کیفیت اندوز
غصے میں جو آ جائے
بجلی ہی گرا جائے
اور لطف پر آئے
تو گھر بھی لٹا جائے
پریوں میں ہے گلفام
رادھا کے لیے شیام
بلرام کا بھیا
متھرا کا بسیا
بندرا میں کنھیا
بن ہو گئے ویراں
برباد گلستاں
سکھیاں ہیں پریشاں
جمنا کا کنارا
سنسان ہے سارا
طوفان ہیں خاموش
موجوں میں نہیں جوش
لو تجھ سے لگی ہے
حسرت ہی یہی ہے
اے ہند کے راجا
اک بار پھر آ جا
دکھ درد مٹا جا
ابر اور ہوا سے
بلبل کی صدا سے
پھولوں کی ضیا سے
جادو اثری گم
شوریدہ سری گم
ہاں تیری جدائی
متھرا کو نہ بھائی
تو آئے تو شان آئے
تو آئے تو جان آئے
آنا نہ اکیلے
ہوں ساتھ وہ میلے
سکھیوں کے جھمیلے

حفیظ جالندھری

نظم

جیسے اک ناؤ ہو مجھ طالب ساحل کے لئے
خواب کی شمع کسی نیند کی محفل کے لئے
حوصلہ بھیجا ہو رب نے دل بزدل کے لئے
تم محبت سے زیادہ ہو مرے دل کے لئے

بال موہن پانڈے

نظم

راستہ آج بھی سایہ ہے مگر اک نیا سایہ ہے
راہ میں ایک مکان
وہ بھی سایہ ہے اداسی کا گھنیرا سنسان
راہ میں آتی ہوئی ہر مورت
ایک سایہ ہے چڑیل
حور کا اس میں کوئی عکس نظر آتا نہیں
دیکھتے ہی جسے میں کانپ اٹھا کرتا ہوں
آنکھوں میں خون اتر آتا ہے
سامنے دھند سی چھا جاتی ہے
دل دھڑکتا ہی چلا جاتا ہے
اور میں دیکھتا ہوں
سائے ملتے ہوئے گھلتے ہوئے کچھ بھوت سے بن جاتے ہیں
ہنہناتے ہوئے ہنستے ہیں پکار اٹھتے ہیں
دل میں کیا دھیان یہی ہے اب بھی
دل میں کیا دھیان یہی ہے اب بھی
سایہ خاموش رہا کرتا ہے
دیکھ ہم بولتے ہیں بولتے سائے ہیں تمام
ہم سے بچ تو کہاں جائے گا
اور میں کانپ اٹھا کرتا ہوں
اور وہ بولتے ہیں
کانپ اٹھا ہے لرزتا ہے یہ بزدل ناکام
بات کرتا ہی نہیں ہے کوئی
اب بھی شاید یہ سمجھتا ہے لرزتے دل میں
سایہ خاموش رہا کرتا ہے

میراجی

نظم

کہ جیسے واقف نہیں ابھی تک
ستم گروں کی ستم گری سے
فریب نے جن کے آدمی کو
حقیر و بزدل بنا دیا ہے
حقیقتوں کے مقابلے میں
فرار کرنا سکھا دیا ہے

علی سردار جعفری

نظم

میں لاکھ بزدل سہی مگر میں اسی قبیلے کا آدمی ہوں کہ جس کے بیٹوں نے
جو کہا اس پہ جان دے دی
میں جانتا تھا مرے قبیلے کی خیمہ گاہیں جلائی جائیں گی اور تماشائی
رقص شعلہ فشاں پر اصرار ہی کریں گے
میں جانتا تھا مرا قبیلہ بریدہ اور بے ردا سروں کی گواہیاں
لے کے آئے گا پھر بھی لوگ انکار ہی کریں گے
سو میں کمین گاہ عافیت میں چلا گیا تھا
سو میں اماں گاہ مصلحت میں چلا گیا تھا
اور اب مجھے میرے شہسواروں کا خون آواز دے رہا ہے
تو نذر سر لے کے آ گیا ہوں
تباہ ہونے کو ایک گھر لے کے آ گیا ہوں
میں لاکھ بزدل سہی مگر میں اسی قبیلے کا آدمی ہوں!

افتخار عارف

نظم

کیوں حیرت سے تکتی ہے ایک اک چہرے کو
کیا تجھ کو شکوہ ہے تیری گویائی کی طاقت
چھین کے قدرت نے بے انصافی کی ہے؟
کیا تجھ کو احساس ہے تیرے پاس اگر گفتار کی نعمت ہوتی
تو اس چاروں جانب پھیلی ہتھیاروں کی دنیا
سینہ دہلا دینے والے طیاروں کی انساں کش آوازیں
آوازیں جن میں انساں کی روح شبانہ روز دبی جاتی ہے
محشر خیز آوازیں کل پرزوں کی جن سے نفسی نفسی کا عالم پیدا ہو کر
دن پر دن عفریت کی صورت میں بڑھتا جاتا ہے
ان آوازوں کی ہیبت ناکی پر واویلا کرتی
تو آواز اٹھاتی اس فاشی اور تعصب پھیلانے والے عنصر کو بڑھتا پا کر
جو حب الوطنی کے نام پہ انساں کش ہوتا جاتا ہے
تو ان رجحانات کی خوب مذمت کرتی
ان سے لڑتی جو اس دنیا کو پیچھے لے جانے میں کوشاں ہیں
'مذہب اور تہذیب'
'ثقافت' اور 'ترقی' کہہ کر رجعت پرور ہو جاتے ہیں
لے میں تجھ کو اپنی گویائی دیتا ہوں!
یہ میرے کام نہیں آئی کچھ
میں ایسا بزدل ہوں جو ہر بے انصافی کو چپکے چپکے سہتا ہے
جس نے 'مقتل' اور 'قاتل' دونوں دیکھے ہیں
لیکن دانائی کہہ کر
اپنی گویائی کو گونگا کر رکھا ہے!

اختر الایمان

نظم

ہے آدمی ہزاروں کا اور ایک پائی کا
آدھا ہے اپنی ماں کا تو آدھا ہے دائی کا
پیشہ بھی آدمی نے سنبھالا گدائی کا
دعویٰ بھی آدمی نے کیا ہے خدائی کا
گورا بھی آدمی ہے تو کالا بھی آدمی
بزدل بھی آدمی ہے جیالا بھی آدمی

سید محمد جعفری

نظم

خدا اس قوم کو عزت نہیں دیتا زمانے میں
جسے قومی بزرگوں کا ادب کرنا نہیں آتا
یقیناً ہوتی ہے مرنے سے بد تر زندگی اس کی
جسے ملک و وطن کے واسطے مرنا نہیں آتا
بتوں کا خوف رکھتا ہے اسے لرزہ بہ تن ہر دم
خدا کے خوف سے جس شخص کو ڈرنا نہیں آتا
جواں مردوں ہی کا ہے کام قطع راہ حریت
کہ اس منزل میں بزدل کو قدم دھرنا نہیں آتا
مقدر میں ہے اس کے عمر بھر پامال غم رہنا
جسے پامالیٔ ملت کا غم کرنا نہیں آتا
اسے زندہ نہ سمجھو سانس ہے گو جس کے سینے میں
مگر آزادیٔ ملت کا دم بھرنا نہیں آتا
بقول حضرت اکبر فنا میں ہے بقا مضمر
اسے جینا نہیں آتا جسے مرنا نہیں آتا

احمق پھپھوندوی

نظم

ہجوم سنگ انا اور ضبط پیہم نے
مثال ریگ رواں بے قرار رکھا ہے
مرے وجود کی وحشت نے رات بھر مجھ کو
غبار قافلۂ انتظار رکھا ہے
بہ پیش خدمت چشم سراب آلودہ
ہوا نے دست طلب بار بار رکھا ہے

امجد اسلام امجد

نظم

آج اک افسروں کے حلقے میں
ایک معتوب ماتحت آیا
اپنے افکار کا حساب لیے
اپنے ایمان کی کتاب لیے

مصطفی زیدی

نظم

تم کس سے ملنے آئے ہو
اس انساں سے جس کے اندر
ایک قاتل زانی سارق کے
تینوں چہرے ایک ہوئے ہیں
لیکن اس کے ہاتھ بندھے ہیں
پیروں میں زنجیریں پڑی ہیں
اور وہ قاتل اب بزدل ہے
اور وہ زانی اب شوہر ہے
اور وہ سارق اب منصف ہے

سلیمان اریب حیدرآبادی

نظم

انہیں بھی بلانے کو جی چاہتا ہے
نہر میں نہانے کو جی چاہتا ہے
نہ پوری نہ حلوہ نہ لڈو نہ برفی
مرا کھیر کھانے کو جی چاہتا ہے
جہاں دودھ کی دیکھتا ہوں کڑاہی
وہیں بیٹھ جانے کو جی چاہتا ہے
وہ جن میں ہے کچھ کھانے پینے کا قصہ
وہ باتیں بنانے کو جی چاہتا ہے
میں بزدل ہوں موجوں سے گھبرا رہا ہوں
کنارے پہ آنے کو جی چاہتا ہے
جو استاد کہتا ہے پڑھنے کو ہم سے
بہانہ بنانے کو جی چاہتا ہے
جہاں ہو نہ پانی نہ تالاب کوئی
وہیں ڈوب جانے کو جی چاہتا ہے
فلک سے یہ رنگین تاروں کی گیندیں
مرا توڑ لانے کو جی چاہتا ہے
غزل کوئی سبطینؔ سنتا نہیں ہے
اور اپنا سنانے کو جی چاہتا ہے

سبطین شاہجہانی

نظم

چڑیا گھر میں بسنے والی
کیسا مزاج عالی ہے
منو بھیا پوچھ رہے ہیں
کیا کوئی پنجرہ خالی ہے
دوڑ میں سب سے اول چیتا
جنگل کی ہر ریس میں جیتا
جلدی جلدی بول رے ساتھی
کچا پپیتا پکا پپیتا
جنگل کے سلطان کو دیکھو
شیر ببر کی شان کو دیکھو
ایسا بہادر کوئی نہیں ہے
دل والے مہمان کو دیکھو
بھاگ رہا ہے ہانپ رہا ہے
ڈر کے مارے کانپ رہا ہے
بزدل گیدڑ نام ہے اس کا
دیکھو کیسا بھانپ رہا ہے
ہاتھی سونڈ ہلانے والے
لمبے دانت دکھانے والے
دریا دریا جنگل جنگل
بھاری بوجھ اٹھانے والے
باتوں میں بے باک بہت ہے
سب پر اس کی دھاک بہت ہے
بچو اس کا نام بتاؤ
یہ بی بی چالاک بہت ہے
بن مانس کے کھیل عجب ہیں
سرکس جیسے سارے ڈھب ہیں
ایسے کھیل کہاں سے سیکھے
دیکھنے والے حیراں سب ہیں
ناچ دکھانے والے بھالو
تو کالا تیرا نام ہے کالو
کس سے ہے تری رشتہ داری
تو آخر ہے کس کا خالو
ڈگ ڈگ ڈگ ڈگ بندر آئے
خوشی خوشی سسرال کو جائے
چھن چھن چھن چھن ناچے بندریا
جیسے مداری چاہے نچائے
زیبرا دیکھو دھاریوں والا
پایا جس نے روپ نرالا
صبح بھی اس کی شام بھی اس کی
آدھا گورا آدھا کالا
یہ کچھوے سے ہارنے والا
جھوٹی شیخی بگھارنے والا
آخر منہ کی کھا جاتا ہے
اوروں کو للکارنے والا
سانپ جو پل پل بل کھاتے ہیں
بین بجے تو لہراتے ہیں
لہرائیں تو جاگے سوئے
لاکھوں رنگ نظر آتے ہیں
کنٹھی پہنے طوطے آئے
ہرے ہرے سے پر پھیلائے
مٹھو بیٹا پڑھ لیتے ہیں
کوئی ان کو اگر پڑھائے
سارس دیکھو کتنا بڑا ہے
بادل جیسے آن پڑا ہے
مچھلی آئے اور پکڑ لوں
پانی میں چپ چاپ کھڑا ہے
وہ دیکھو وہ آیا زرافہ
جیسے کوئی بیرنگ لفافہ
ہم دیتے ہیں اس کو دعائیں
گردن میں ہو اور اضافہ

رئیس فروغ

نظم

یہ ڈر جو ساتھ چلتا ہے
مری ماں کی امانت ہے
میں جب چھوٹی سی بچی تھی
تو میری ماں نے
اس ڈر کو مرے دل کے
کسی سنسان گوشے میں
بڑی مشکل سے ڈالا تھا
وہ کہتی تھی
کہ میں تنہا کہیں باہر نہ جاؤں
کیوں نہ جاؤں
بحث کرتی میں
وہاں پر بھیڑیے پھرتے ہیں
انسانوں کی صورت میں
میں اس کی بات سن کر
دل میں ہنس پڑتی
وہ کہتی تھی
دوپٹہ سر پہ لوں
اپنی نگاہیں نیچی رکھوں
اور
ہر اک حکم پر سر کو جھکاؤں
اور میں کہتی
سراسر بزدلی ہے یہ
وہ کہتی
ہاں تو بزدل لڑکیاں ہی شاد رہتی ہیں
سدا آباد رہتی ہیں
ہمیشہ شاد رہنا تھا
سدا آباد رہنا تھا
سو میں نے اپنی ماں کی اس امانت کو
سدا آنچل سے اپنے باندھ کر رکھا

حمیرا راحتؔ

نظم

جیسی زندگی ہم گزارتے ہیں ویسی موت ہمیں ملتی ہے
ہم بزدل آدمی کی زندگی گزارتے ہیں
تو ہمیں موت بھی ویسی ہی بزدل نصیب ہوتی ہے
ہم خوب صورت زندگی جیتے ہیں
تو موت بھی خوب صورت ملتی ہے
ہم محبت کی زندگی گزارتے ہیں
تو موت بھی محبوبہ کی طرح ہمیں ملتی ہے
انسان نے ہر شے کو گدلا کیا ہے
ہر قیمتی آدرش کو میلا کیا ہے
ہر لفظ کو بے معنی کیا ہے
اللہ کی بنائی ہوئی چیزوں کو مسخ کرنے کی کوشش کی ہے
لیکن انسان موت کو گدلا نہیں کر سکا
میلا نہیں کر سکا
بے معنی نہیں کر سکا
مسخ نہیں کر سکا
موت سے زیادہ خالص شے دنیا میں نہیں ہے
اس سے زیادہ با معنی شے موجود نہیں ہے
مگر میں کیوں ایسا کہہ رہا ہوں
مجھے تو ایک بہت ہی خوب صورت زندگی بسر کرنی ہے
محبت سے لبریز
رقص کرتی ہوئی زندگی
جس میں رقاص غائب ہو جاتا ہے
اور صرف رقص باقی رہتا ہے
مجھے ایک بے حد لذت بھری
رسیلی زندگی سے گلے ملنا ہے
تاکہ میری موت بھی خوب صورت ہو

اصغر ندیم سید

نظم

نجمی فہمی عظمیٰ رعنا
آؤ دیکھیں چڑیا خانہ
جن کے نام سنا کرتے ہو
آج انہیں نزدیک سے دیکھو
ایک سے ایک پرندے دیکھو
آدم خور درندے دیکھو
مور سروں پر تاج سجائے
ناچ رہے ہیں پر پھیلائے
بلبل دیکھو طوطا دیکھو
کوئل دیکھو مینا دیکھو
خوش آواز پپیہا دیکھو
حد حد اور گوریا دیکھو
بھونرا دیکھو تتلی دیکھو
شیر کی خالہ بلی دیکھو
زیبرا گھوڑا ٹٹو خچر
باز کبوتر کوا تیتر
وہ دیکھو خرگوش گلہری
بارہ سنگھا اور وہ ہرنی
بن مانس اور بھالو بھی ہے
نیولا اور کنگارو بھی ہے
بندر کی نقالی دیکھو
پیٹ رہے ہیں تالی دیکھو
دو دو ہاتھی جھوم رہے ہیں
دور گدھے بھی گھوم رہے ہیں
شیروں کا غرانا دیکھو
تندوے کا بل کھانا دیکھو
وہ دیکھو افریقی گینڈا
اور یہ ہندوستانی چیتا
پھن کاڑھے اک ناگن بھی ہے
لومڑی اک مکارن بھی ہے
بزدل گیدڑ لکڑ بگھا
کون بنے گا لیڈر اس کا
دل کش طائر آبی دیکھو
کیسی ہے مرغابی دیکھو
مچھلی کو لہراتے دیکھو
مینڈک کو ٹراتے دیکھو
ایک مگرمچھ جاگ رہا ہے
دیکھ کے کچھوا بھاگ رہا ہے
آج فراغؔ انکل نے دیکھا
کلکتے کا چڑیا خانہ

فراغ روہوی

نظم

رات سے پہلے مجھے فیصلہ کرنا ہے کوئی
رات آئے گی تو پھر ساتھ ہی آ جائیں گے
سارے اندیشے مرے اور مرے وسوسے سب
دہری سوچیں مری
ساتھ تذبذب میرا
رات کا سحر و فسوں
مجھے بے یار و مددگار سا کر ڈالے گا
مجھے کر دے گا وہ کمزور بھی اور بزدل بھی
مرے معبود
آج کے دن کو ٹھہر جانے کے احکام سنا

شبنم شکیل

نظم

خداوندا وہ کیسا مرحلہ تھا!
اب یہ کیسا مرحلہ ہے!
ایک سنسانی کا عالم ہے
گلی چپ ہے
کسی ذی روح کی آہٹ نہیں آتی
یہ کیسی ساعت منحوس ہے
جس میں ابھی تک
کوئی ننھا سا پرندہ یا پتنگا
یا کوئی موہوم چیونٹی ہی نہیں گزری
کسی بھی مرد و زن کی
میں نے صورت ہی نہیں دیکھی
سواری اونٹ کی ہے
اور میں شہر شکستہ کی
کسی سنساں گلی میں سر جھکائے
ہاتھ میں بد رنگ چمڑے کی مہاریں تھام کر
اس گھر کی جانب جا رہا ہوں
یا کسی محشر
خموشی کے کسی محشر کی جانب جا رہا ہوں
ہچکیوں اور سسکیوں کے بعد کا محشر
کوئی منظر
کوئی منظر کہ جس میں اک گلی ہے
ایک بھورا اونٹ ہے
اور ایک بزدل شخص کی ڈھیلی رفاقت ہے
سفر نا مختتم
جیسے ابد تک کی کوئی لمبی مسافت ہے!

رفیق سندیلوی

نظم

بھلے کو برا کر دکھاتی ہے غربت
بہادر کو بزدل بناتی ہے غربت
برائی کی رغبت دلاتی ہے غربت
ضلالت میں آخر گراتی ہے غربت
غریبوں کی دنیا میں راحت نہ ڈھونڈھو
غریبوں کی دنیا میں راحت نہیں ہے

نور لدھیانوی

نظم

لے چبا یہ سر
جو اب جبڑوں میں ہے تیرے
اگر تو واقعی میں شیر ہے تو
شیر بن کر آج دکھلا دے
مجھے جوکر سمجھتا تھا
ارے میں تو فقط اس پیٹ کی خاطر
ہنسانے کے لیے سب کو
تیرے جبڑوں میں سر دینے سے پہلے بھاگ جاتا تھا
مجھے اس کھیل کی تنخواہ ملتی تھی
یہی کردار سرکس میں مرے حصے میں آیا تھا
مگر میں آج تجھ کو دیکھ لوں گا
دکھا دوں گا زمانے کو کہ بزدل میں نہیں بزدل تو ہے
لے چبا
اب جوکروں سا
منہ کو پھاڑے کیوں کھڑا ہے

شارق کیفی

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے