کی تلاش کا نتیجه | موضو - نظم, صفحہ dak

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "dak"

نظم کے متعلقہ نتیجہ "dak"

نظم

عشق کا نام فقط آہ و فغاں تھا پہلے
ڈاک خانے میں یہ آرام کہاں تھا پہلے

خالد عرفان

نظم

میں تمہیں ایک خط لکھوں گا
مگر اسے ڈاک میں نہیں ڈالوں گا
میں بناؤں گا اس کی ایک ناؤ
جس پہ سوار کر کے اپنی سوچ
ٹھیل دوں گا برسات کے پانی میں
تمہاری اور
تم بھی ایک خط لکھنا
جوابی
مگر اسے ڈاک میں مت ڈال دینا
ناؤ پہنچنے سے پہلے ہی
جب ڈوب جائے گی
تم تک نہیں پہنچ پائے گی
میری سوچ
تم جھجھلانا مجھ پر
اور غصے میں آ کر
پھاڑ دینا اس خط کو
جو تم نے ابھی نہیں لکھا

ارشاد کامل

نظم

دھوپ لگے آکاش پہ جب
دن میں چاند نظر آیا تھا
ڈاک سے آیا مہر لگا
ایک پرانا سا تیرا چٹھی کا لفافہ یاد آیا
چٹھی گم ہوئے تو عرصہ بیت چکا
مہر لگا بس مٹیالا سا
اس کا لفافہ رکھا ہے!

گلزار

نظم

نغمہ در جاں رقص برپا خندہ بر لب
دل تمناؤں کے بے پایاں الاؤ کے قریب
دل مرے صحرا نورد پیر دل
ریگ کے دل شاد شہری ریگ تو
اور ریگ ہی تیری طلب
ریگ کی نکہت ترے پیکر میں تیری جاں میں ہے
ریگ صبح عید کے مانند زرتاب و جلیل
ریگ صدیوں کا جمال
جشن آدم پر بچھڑ کر ملنے والوں کا وصال
شوق کے لمحات کے مانند آزاد و عظیم
ریگ نغمہ زن
کہ ذرے ریگ زاروں کی وہ پازیب قدیم
جس پہ پڑ سکتا نہیں دست لئیم
ریگ صحرا زرگری کی ایک کی لہروں سے دور
چشمۂ مکر و ریا شہروں سے دور
ریگ شب بیدار ہے سنتی ہے ہر جابر کی چاپ
ریگ شب بیدار ہے نگراں ہے مانند نقیب
دیکھتی ہے سایۂ آمر کی چاپ
ریگ ہر عیار غارت گر کی موت
ریگ استبداد کے طغیاں کے شور و شر کی موت
ریگ جب اٹھتی ہے اڑ جاتی ہے ہر فاتح کی نیند
ریگ کے نیزوں سے زخمی سب شہنشاہوں کے خواب
ریگ اے صحرا کی ریگ
مجھ کو اپنے جاگتے ذروں کے خوابوں کی
نئی تعبیر دے
ریگ کے ذروں ابھرتی صبح تم
آؤ صحرا کی حدوں تک آ گیا روز طرب
دل مرے صحرا نورد پیر دل
آ چوم ریگ
ہے خیالوں کے پری زادوں سے بھی معصوم ریگ
ریگ رقصاں ماہ و سال نور تک رقصاں رہے
اس کا ابریشم ملائم نرم خو خنداں رہے
دل مرے صحرا نورد پیر دل
یہ تمناؤں کا بے پایاں الاؤ
راہ گم کر دوں کی مشعل اس کے لب پر آؤ آؤ
تیرے ماضی کے خذف ریزوں سے جاگی ہے یہ آگ
آگ کی قرمز زباں پر انبساط نو کے راگ
دل مرے صحرا نورد پیر دل
سرگرانی کی شب رفتہ سے جاگ
کچھ شرر آغوش صرصر میں ہیں گم
اور کچھ زینہ بہ زینہ شعلوں کے مینار پر چڑھتے ہوئے
اور کچھ تہہ میں الاؤ کی ابھی
مضطرب لیکن مذبذب طفل کمسن کی طرح
آگ زینہ آگ رنگوں کا خزینہ
آگ ان لذات کا سر چشمہ ہے
جس سے لیتا ہے غذا عشاق کے دل کا تپاک
چوب خشک انگور اس کی مے ہے آگ
سرسراتی ہے رگوں میں عید کے دن کی طرح
آگ کاہن یاد سے اتری ہوئی صدیوں کی یہ افسانہ خواں
آنے والے قرنہا کی داستانیں لب پہ ہیں
دل مرا صحرا نورد پیر دل سن کر جواں
آگ آزادی کا دل شادی کا نام
آگ پیدائش کا افزائش کا نام
آگ کے پھولوں میں نسریں یاسمن سنبل شفیق و نسترن
آگ آرائش کا زیبائش کا نام
آگ وہ تقدیس دھل جاتے ہیں جس سے سب گناہ
آگ انسانوں کی پہلی سانس کے مانند اک ایسا کرم
عمر کا اک طول بھی جس کا نہیں کافی جواب
یہ تمناؤں کا بے پایاں الاؤ گر نہ ہو
اس لق و دق میں نکل آئیں کہیں سے بھیڑیے
اس الاؤ کو سدا روشن رکھو
ریگ صحرا کو بشارت ہو کہ زندہ ہے الاؤ
بھیڑیوں کی چاپ تک آتی نہیں
آگ سے صحرا کا رشتہ ہے قدیم
آگ سے صحرا کے ٹیڑھے رینگنے والے
گرہ آلود ژولیدہ درخت
جاگتے ہیں نغمہ در جاں رقص برپا خندہ بر لب
اور منا لیتے ہیں تنہائی میں جشن ماہتاب
ان کی شاخیں غیر مرئی طبل کی آواز پر دیتی ہیں تال
بیخ و بن سے آنے لگتی ہے خداوندی جلاجل کی صدا
آگ سے صحرا کا رشتہ ہے قدیم
رہروؤں صحرا نوردوں کے لیے ہے رہنما
کاروانوں کا سہارا بھی ہے آگ
اور صحراؤں کی تنہائی کو کم کرتی ہے آگ
آگ کے چاروں طرف پشمینہ و دستار میں لپٹے ہوئے
افسانہ گو
جیسے گرد چشم مژگاں کا ہجوم
ان کے حیرت ناک دل کش تجربوں سے
جب دمک اٹھتی ہے ریت
ذرہ ذرہ بجنے لگتا ہے مثال ساز جاں
گوش بر آواز رہتے ہیں درخت
اور ہنس دیتے ہیں اپنی عارفانہ بے نیازی سے کبھی
یہ تمناؤں کا بے پایاں الاؤ گر نہ ہو
ریگ اپنی خلوت بے نور و خودبیں میں رہے
اپنی یکتائی کی تحسیں میں رہے
اس الاؤ کو سدا روشن رکھو
یہ تمناؤں کا بے پایاں الاؤ گر نہ ہو
ایشیا افریقہ پہنائی کا نام
بے کار پہنائی کا نام
یورپ اور امریکہ دارائی کا نام
تکرار دارائی کا نام
میرا دل صحرا نورد پیر دل
جاگ اٹھا ہے مشرق و مغرب کی ایسی یک دلی
کے کاروانوں کا نیا رویا لیے
یک دلی ایسی کہ ہوگی فہم انساں سے ورا
یک دلی ایسی کہ ہم سب کہہ اٹھیں
اس قدر عجلت نہ کر
اژدہام گل نہ بن
کہہ اٹھیں ہم
تو غم کل تو نہ تھی
اب لذت کل بھی نہ بن
روز آسائش کی بے دردی نہ بن
یک دلی بن ایسا سناٹا نہ بن
جس میں تابستاں کی دوپہروں کی
بے حاصل کسالت کے سوا کچھ بھی نہ ہو
اس جفا گر یک دلی کے کارواں یوں آئیں گے
دست جادو گر سے جیسے پھوٹ نکلے ہوں طلسم
عشق حاصل خیز سے یا زور پیدائی سے جیسے ناگہاں
کھل گئے ہوں مشرق و مغرب کے جسم
جسم صدیوں کے عقیم
کارواں فرخندہ پے اور ان کا بار
کیسہ کیسہ تخت جم اور تاج کے
کوزہ کوزہ فرد کی سطوت کی مے
جامہ جامہ روز و شب محنت کا خے
نغمہ نغمہ حریت کی گرم لے
سالکو فیروز بختو آنے والے قافلو
شہر سے لوٹو گے تم تو پاؤ گے
ریت کے سرحد پہ جو روح ابد خوابیدہ تھی
جاگ اٹھی ہے شکوہ ہائے نے سے وہ
ریت کی تہہ میں جو شرمیلی سحر روئیدہ تھی
جاگ اٹھی ہے حریت کی لے سے وہ
اتنی دوشیزہ تھی اتنی مرد نا دیدہ تھی صبح
پوچھ سکتے تھے نہ اس کی عمر ہم
درد سے ہنستی نہ تھی
ذروں کی رعنائی پہ بھی ہنستی نہ تھی
ایک محجوبانہ بے خبری میں ہنس دیتی تھی صبح
اب مناتی ہے وہ صحرا کا جلال
جیسے عز و جل کے پاؤں کی یہی محراب ہو
زیر محراب آ گئی ہو اس کو بے داری کی رات
خود جناب عز و جل سے جیسے امید زفاف
سارے ناکردہ گناہ اس کے معاف
صبح صحرا شادباد
اے عروس عز و جل فرخندہ رو تابندہ کھو
تو اک ایسے حجرۂ شب سے نکل کر آئی ہے
دست قاتل نے بہایا تھا جہاں ہر سیج پر
سینکڑوں تاروں کا رخشندہ لہو پھولوں کے پاس
صبح صحرا سر مرے زانو پہ رکھ کر داستاں
ان تمنا کے شہیدوں کی نہ کہہ
ان کی نیمہ رس امنگوں آرزوؤں کی نہ کہہ
جن سے ملنے کا کوئی امکاں نہیں
شہد تیرا جن کو نش جاں نہیں
آج بھی کچھ دور اس صحرا کے پار
دیو کی دیوار کے نیچے نسیم
روز و شب چلتی ہے مبہم خوف سے سہمی ہوئی
جس طرح شہروں کی راہوں پر یتیم
نغمہ بر لب تاکہ ان کی جاں کا سناٹا ہو دور
آج بھی اس ریگ کے ذروں میں ہیں
ایسے ذرے آپ ہی اپنے غنیم
آج بھی اس آگ کے شعلوں میں ہیں
وہ شرر جو اس کی تہہ میں پر بریدہ رہ گئے
مثل حرف ناشنیدہ رہ گئے
صبح صحرا اے عروس عز و جل
آ کہ ان کی داستاں دہرائیں ہم
ان کی عزت ان کی عظمت گائیں ہم
صبح ریت اور آگ ہم سب کا جلال
یک دلی کے کارواں ان کا جمال
آؤ
اس تحلیل کے حلقے میں ہم مل جائیں
آؤ
شاد باغ اپنی تمناؤں کا بے پایاں الاؤ

ن م راشد

نظم

ندی کے لرزتے ہوئے پانیوں پر
تھرکتی ہوئی شوخ کرنوں نے چنگاریاں گھول دی ہیں
تھکی دھوپ نے آ کے لہروں کی پھیلی ہوئی ننگی بانہوں پہ اپنی لٹیں کھول دی ہیں
یہ جوئے رواں ہے
کہ بہتے ہوئے پھول ہیں جن کی خوشبوئیں گیتوں کی سسکاریاں ہیں
یہ پگھلے ہوئے زرد تانبے کی چادر پہ الجھی ہوئی سلوٹیں ہیں
کہ زنجیر ہائے رواں ہیں
بس اک شور طوفاں
کنارا نہ ساحل
نگاہوں کی حد تک
سلاسل سلاسل
کہ جن کو اٹھائے ہوئے ڈولتی پنکھڑیوں کے سفینے بہے جا رہے ہیں
بہے جا رہے ہیں
کہیں دور ان گھور اندھیروں میں جو فاصلوں کی ردائیں لپیٹے کھڑے ہیں
جہاں پر ابد کا کنارا ہے اور اک وہ گاؤں
وہ گنے کے کیاروں پہ آتی ہوئی ڈاک گاڑی کے بھورے دھوئیں کی چھچھلتی سی چھاؤں

مجید امجد

نظم

اسی پہ آتا ہے ایک موٹر بھی ڈاک خانے کی ڈاک لینے
اسی پہ جاتے ہیں کچھ دیہاتی لدی ہوئی گاڑیاں ہکائے

نشور واحدی

نظم

باغ ہندوستان جن جن کے خون سے سینچا گیا
دار ناقدری پہ بالآخر انہیں کھینچا گیا

غوث خواہ مخواہ حیدرآبادی

نظم

جس وقت شہر نے یہ خط لکھنا شروع کیا
شاید وہ رو رہا تھا
نیلی روشنائی سے لکھے گئے لفظ
جگہ جگہ سے پھیل گئے ہیں
اور کاغذ اتنا خستہ ہے کہ اگر خط زیادہ دیر ڈاک میں رہتا تو شاید
لفافے کے اندر ہی کٹ پھٹ جاتا

ذیشان ساحل

نظم

دسمبر کی گھنی راتوں میں
جب بادل برستا ہے
لرزتی خامشی
جب بال کھولے
کاریڈوروں میں سسکتی ہے
تو آتش دان کے آگے
کہیں سے وہ دبے پاؤں
مرے پہلو میں آتی ہے
اور اپنے مرمریں ہاتھوں سے
میرے بال سلجھاتے ہوئے
سرگوشیوں میں درد کے قصے سناتی ہے
جولائی کی دوپہریں
ممٹیوں سے جب اتر کر
آنگنوں میں پھیل جاتی ہیں
اور اک آوارہ سناٹا
چھتوں پر بھاری قدموں سے
بڑی آہستگی کے ساتھ چلتا ہے
تو وہ چپکے سے میرے پاس آتی ہے
اور اپنے دھیمے لہجے میں
وہ ساری داستانیں کہہ سناتی ہے
جنہیں سن کر میں دھیمی آنچ پر
پہروں سلگتا ہوں
کسی گرجے کے ویراں لان میں
جب جنوری
اپنے سنہری گیسوؤں کو کھول کر
کوئی پرانا گیت گاتی ہے
تو وہ اک ان چھوئی نن کی طرح
پتھر کے بنچوں پر
مرے کاندھے پہ سر رکھے
مرے چہرے پہ اپنی انگلیوں سے
سوگ لکھتی ہے
کسی وادی کے تنہا ڈاک بنگلے میں
کبھی جب شام روتی ہے
سیہ کافی کے پیالوں سے
لپکتی بھاپ میں
باتوں کے بسکٹ پھول جاتے ہیں
تو وہ بھی جنگلی بیلوں سے
اٹھتی خوشبوؤں سے جسم پاتی ہے
مرے نزدیک آتی ہے
مری سانسوں کی پگڈنڈی پہ
دھیرے دھیرے چلتی ہے
مرے اندر اترتی ہے

انوار فطرت

نظم

کبھی ایسا بھی ہوتا ہے
میں انجانے پتے پر ایک خط لکھ کر
سپرد ڈاک کرتی ہوں
جو دل میں معاملات دل ہیں سب
صد چاک کرتی ہوں
میں لکھ دیتی ہوں ان کے نام بھی جن سے شکایت ہے
بتا دیتی ہوں کس کس سے مجھے کتنی محبت ہے
تعارف ان کا بھی جن سے بہت نقصان پہنچا ہے
جنہیں پانے کو صحرا تک دل ویران پہنچا ہے
رقم کرتی ہوں کس کا دل دکھا ہے واقعی مجھ سے
بیاں کرتی ہوں کیوں روٹھی رہی ہے زندگی مجھ سے
غلطیاں ہیں جو میری سب سر اوراق رکھتی ہوں
اور ہر صفحے پہ اپنے دستخط مصداق رکھتی ہوں
مگر ایسا بھی ہوتا ہے
کوئی دستک سی ہوتی ہے
نہ جانے درمیان شب یہاں پر کون آتا ہے
مری دہلیز پر آ کر مرا خط ڈال جاتا ہے

اسنی بدر

نظم

لق و دق صحرا میں یا میدان میں
یا عرب کے گرم ریگستان میں
سایہ افگن ہے نہ واں کوئی چٹان
سرد پانی کا نہ دریا کا نشان
چلچلاتی دھوپ ہے اور چپ ہوا
واں پرندہ بھی نہیں پر مارتا
تو وہاں کے مرحلے کرتا ہے طے
دن بہ دن اور ہفتہ ہفتہ پے بہ پے
قیمتی اشیا ہیں تیری پشت پر
تاجروں کا ریشم اور شاہوں کا زر
تودہ تودہ تیرے اوپر لد رہا
ہے بھرا گویا جہاز پر بہا
چند ہفتے جب کہ جاتے ہیں گزر
اور تھکا دیتا ہے راکب کو سفر
اونٹ! گھبراتا نہیں تو بار سے
دیکھتا ہے اس کی جانب پیار سے
گویا کہتا ہے کہ اے میرے سوار
ایک دن تو اور بھی ہمت نہ ہار
ہاں نہ بے دل ہو نہ رستے میں ٹھٹک
صاف سر چشمہ ہے آگے دھر لپک
مجھ کو آتی ہے ہوا سے بوئے آب
ناامیدی سے نہ کر تو اضطراب
اونٹ تو کرتا ہے اس کی رہبری
یوں بنا دیتا ہے راکب کو جری
آخرش منزل پہ پہنچاتا ہے تو
اور سوکھے خار و خس کھاتا ہے تو
صبر سے کرتا ہے طے راہ دراز
سچ کہا ہے تو ہے خشکی کا جہاز
الغرض تو ہے حلیم و خوش خصال
تربیت میں چھوٹے بچوں کی مثال

اسماعیل میرٹھی

نظم

سکوت کھلنے لگا ہے
تنہائی چہچہاتی ہے بام و در پر
میں اپنے آبائی گھر کی پچھلی شکستہ سیڑھی پہ سر جھکائے
گزشتہ صدیوں کو گن رہی ہوں

عشرت آفریں

نظم

اک ٹھٹھرتی صبح ہے
ڈاک خانے کی گلی میں
زرد پتے اڑ رہے ہیں
کپکپاتی انگلیوں سے لکھا ایڈریس
ہر کوئی پڑھ لیتا ہے

یامین

نظم

تمہیں خواہش کو چھونے کی تمنا ہے
خواہشیں تو اڑتی‌ پھرتی تتلیاں ہیں
ڈاک کی ناکارہ ٹکٹیں تو نہیں ہیں
جنہیں البم میں رکھ کر تم یہ سمجھو
کہ یہ نایاب چیزیں اب تمہاری دسترس میں ہیں
تمہیں سپنے پکڑنے کی تمنا ہے
نہیں یہ غیر ممکن ہے
کہ سپنے ان چھوئے لمحوں کے نازک عکس ہیں
آرائشی بیلیں نہیں
جو کمرے کی کسی دیوار پر سج کر
تمہاری دید کا احساں اٹھائیں
تمہیں کہرے کے بھیگے پھول چننے کی تمنا ہے
یہ کہرا تو چراغ‌ موسم گل کا دھواں ہے
کوئی دیوار برلن پر کھنچی تحریر یا نقشہ نہیں
جسے جس وقت جو چاہے بدل دے
یا مٹا دے
سبز رو کہرا پکڑنا اس قدر آساں نہیں
سنو
دیوانگی چھوڑو
چلو واپس حقیقت میں چلیں

حامد یزدانی

نظم

میرے بدن کی چار دیواری کے لئے
کھنکتی ہوئی مٹی کم تھی
اس لئے خدا نے آنکھوں میں کانچ بھر دیا
اور جہنم کے لپکتے ہوئے شعلوں کی جلن لہو میں رکھ دی
میرے ہاتھوں میں لق و دق صحراؤں کی رتیلی وحشت
چبائے ہوئے عکس کی لکیریں بناتی رہتی ہے
اور ذہن کے رستے ہوئے پتیلے میں
دن بھر برداشت کا لاوا کھولتا ہے

سدرہ سحر عمران

نظم

۱
شہر خالی کروا لیا جاتا ہے
اور وبا کے دنوں میں محبت
ممنوع قرار پاتی ہے
کرایہ ناموں سے
کئی شہروں کے نام غائب ہو
جاتے ہیں
اور
ساحلی آنکھیں
ڈاک کے انتظار میں
بوڑھی ہونے لگتی ہیں
مارچ کی سدا بہار سہ پہروں میں
وقت
کبھی کبھی
جھرجھری لے کر اٹھتا ہے
اور پھر اونگھنے لگ جاتا ہے
ٹرین ایک سنسان اسٹیشن پر روک لی جاتی ہے

احتشام علی

نظم

ہمیں ہر روز
پھول خریدنے چاہئیں
اور موم بتیاں
اور پانی کی خالی بوتلیں
اور پلاسٹک کے برتن
جنگ میں کوئی بھی چیز کام آ سکتی ہے
ہمیں کھلونے نہیں خریدنے چاہئیں
کتابوں کی طرف نہیں دیکھنا چاہیئے
دھوپ کے چشمے اور چھتریاں چھپا دینی چاہئیں
گیس لائٹر بھی چھپا دینے چاہئیں
ہمیں اپنی جیب میں بسکٹ
اور ماچس کی ڈبیا ہمیشہ رکھنی چاہیئے
کسی کو دینے یا کچھ جلانے کے لیے
ایک رومال بھی ضروری ہے
زخمی انگلیوں یا جلتی ہوئی آنکھوں کے لیے
ایک پوسٹ کارڈ روزانہ
لیٹر بکس میں ڈال دینے چاہیئے
ڈاک نظام بحال ہونے پر
ہماری خیریت دوستوں تک پہنچ جائے گی
شاید وہ ہماری تلاش میں ادھر آ جائیں
جہاں بار بار ڈھونے والے لوگ
کھوئے ہوئے ہیں

ذیشان ساحل

نظم

جیسے سرابوں کا پیچھا کرتے کرتے لق و دق صحرا میں
اچانک نخلستان مل جاتا ہے
جیسے کوڑے کرکٹ کے ڈھیر میں
خوب صورت پھول کھل جاتے ہیں
جیسے ٹنڈمنڈ درختوں پر
نئی کونپلیں پھوٹ نکلتی ہیں
جیسے چار سو چھائی ہوئی خاموشی میں
دیوانی کوئل کوک اٹھتی ہے
جیسے مایوسیوں اور تنہائیوں میں
محبوب کی بھولی بسری یاد آ جاتی ہے
جیسے کالے بادلوں کے پیچھے سے
چمکتا چاند نکل آتا ہے
جیسے ہجر کی لمبی رات کے بعد
صبح وصال طلوع ہو جاتی ہے
ویسے ہی زندگی کا بوجھ سہتے سہتے
موت ایک سہانا خواب بن جاتی ہے
اور خدا کی نعمتوں میں سے
ایک نعمت

محمد حنیف رامے

نظم

ڈاک خانہ اپنا ریل اپنی نہیں اب کوئی ڈر
اب تو میں بےرنگ خط بھیجوں گا بے خوف و خطر
ٹھاٹ سے اب بے ٹکٹ ہوگا ٹرینوں میں سفر
یہ تمہیں معلوم ہے بھائی وطن آزاد ہے

استاد رامپوری

نظم

روز اڑا دے نیند
تلخی بھرا اک خواب
خواب کے پردے پر
روز یہ فلم چلے
ایک لق و دق دشت
اس پہ کڑکتی دھوپ
بار گراں بر دوش
اک ننھی سی جان
تشنہ تھکن سے چور
اور فقط امید
اک بے سایہ پیڑ

کاشف رفیق

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے