کی تلاش کا نتیجه | موضو - نظم, صفحہ firqa

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "firqa"

نظم کے متعلقہ نتیجہ "firqa"

نظم

دل سے جو بات نکلتی ہے اثر رکھتی ہے
پر نہیں طاقت پرواز مگر رکھتی ہے
قدسی الاصل ہے رفعت پہ نظر رکھتی ہے
خاک سے اٹھتی ہے گردوں پہ گزر رکھتی ہے
عشق تھا فتنہ گر و سرکش و چالاک مرا
آسماں چیر گیا نالۂ بیباک مرا
پیر گردوں نے کہا سن کے کہیں ہے کوئی
بولے سیارے سر عرش بریں ہے کوئی
چاند کہتا تھا نہیں اہل زمیں ہے کوئی
کہکشاں کہتی تھی پوشیدہ یہیں ہے کوئی
کچھ جو سمجھا مرے شکوے کو تو رضواں سمجھا
مجھ کو جنت سے نکالا ہوا انساں سمجھا
تھی فرشتوں کو بھی حیرت کہ یہ آواز ہے کیا
عرش والوں پہ بھی کھلتا نہیں یہ راز ہے کیا
تا سر عرش بھی انساں کی تگ و تاز ہے کیا
آ گئی خاک کی چٹکی کو بھی پرواز ہے کیا
غافل آداب سے سکان زمیں کیسے ہیں
شوخ و گستاخ یہ پستی کے مکیں کیسے ہیں
اس قدر شوخ کہ اللہ سے بھی برہم ہے
تھا جو مسجود ملائک یہ وہی آدم ہے
عالم کیف ہے دانائے رموز کم ہے
ہاں مگر عجز کے اسرار سے نامحرم ہے
ناز ہے طاقت گفتار پہ انسانوں کو
بات کرنے کا سلیقہ نہیں نادانوں کو
آئی آواز غم انگیز ہے افسانہ ترا
اشک بیتاب سے لبریز ہے پیمانہ ترا
آسماں گیر ہوا نعرۂ مستانہ ترا
کس قدر شوخ زباں ہے دل دیوانہ ترا
شکر شکوے کو کیا حسن ادا سے تو نے
ہم سخن کر دیا بندوں کو خدا سے تو نے
ہم تو مائل بہ کرم ہیں کوئی سائل ہی نہیں
راہ دکھلائیں کسے رہرو منزل ہی نہیں
تربیت عام تو ہے جوہر قابل ہی نہیں
جس سے تعمیر ہو آدم کی یہ وہ گل ہی نہیں
کوئی قابل ہو تو ہم شان کئی دیتے ہیں
ڈھونڈنے والوں کو دنیا بھی نئی دیتے ہیں
ہاتھ بے زور ہیں الحاد سے دل خوگر ہیں
امتی باعث رسوائی پیغمبر ہیں
بت شکن اٹھ گئے باقی جو رہے بت گر ہیں
تھا براہیم پدر اور پسر آزر ہیں
بادہ آشام نئے بادہ نیا خم بھی نئے
حرم کعبہ نیا بت بھی نئے تم بھی نئے
وہ بھی دن تھے کہ یہی مایۂ رعنائی تھا
نازش موسم گل لالۂ صحرائی تھا
جو مسلمان تھا اللہ کا سودائی تھا
کبھی محبوب تمہارا یہی ہرجائی تھا
کسی یکجائی سے اب عہد غلامی کر لو
ملت احمد مرسل کو مقامی کر لو
کس قدر تم پہ گراں صبح کی بیداری ہے
ہم سے کب پیار ہے ہاں نیند تمہیں پیاری ہے
طبع آزاد پہ قید رمضاں بھاری ہے
تمہیں کہہ دو یہی آئین وفاداری ہے
قوم مذہب سے ہے مذہب جو نہیں تم بھی نہیں
جذب باہم جو نہیں محفل انجم بھی نہیں
جن کو آتا نہیں دنیا میں کوئی فن تم ہو
نہیں جس قوم کو پروائے نشیمن تم ہو
بجلیاں جس میں ہوں آسودہ وہ خرمن تم ہو
بیچ کھاتے ہیں جو اسلاف کے مدفن تم ہو
ہو نکو نام جو قبروں کی تجارت کر کے
کیا نہ بیچوگے جو مل جائیں صنم پتھر کے
صفحۂ دہر سے باطل کو مٹایا کس نے
نوع انساں کو غلامی سے چھڑایا کس نے
میرے کعبے کو جبینوں سے بسایا کس نے
میرے قرآن کو سینوں سے لگایا کس نے
تھے تو آبا وہ تمہارے ہی مگر تم کیا ہو
ہاتھ پر ہاتھ دھرے منتظر فردا ہو
کیا کہا بہر مسلماں ہے فقط وعدۂ حور
شکوہ بے جا بھی کرے کوئی تو لازم ہے شعور
عدل ہے فاطر ہستی کا ازل سے دستور
مسلم آئیں ہوا کافر تو ملے حور و قصور
تم میں حوروں کا کوئی چاہنے والا ہی نہیں
جلوۂ طور تو موجود ہے موسیٰ ہی نہیں
منفعت ایک ہے اس قوم کا نقصان بھی ایک
ایک ہی سب کا نبی دین بھی ایمان بھی ایک
حرم پاک بھی اللہ بھی قرآن بھی ایک
کچھ بڑی بات تھی ہوتے جو مسلمان بھی ایک
فرقہ بندی ہے کہیں اور کہیں ذاتیں ہیں
کیا زمانے میں پنپنے کی یہی باتیں ہیں
کون ہے تارک آئین رسول مختار
مصلحت وقت کی ہے کس کے عمل کا معیار
کس کی آنکھوں میں سمایا ہے شعار اغیار
ہو گئی کس کی نگہ طرز سلف سے بے زار
قلب میں سوز نہیں روح میں احساس نہیں
کچھ بھی پیغام محمد کا تمہیں پاس نہیں
جا کے ہوتے ہیں مساجد میں صف آرا تو غریب
زحمت روزہ جو کرتے ہیں گوارا تو غریب
نام لیتا ہے اگر کوئی ہمارا تو غریب
پردہ رکھتا ہے اگر کوئی تمہارا تو غریب
امرا نشۂ دولت میں ہیں غافل ہم سے
زندہ ہے ملت بیضا غربا کے دم سے
واعظ قوم کی وہ پختہ خیالی نہ رہی
برق طبعی نہ رہی شعلہ مقالی نہ رہی
رہ گئی رسم اذاں روح بلالی نہ رہی
فلسفہ رہ گیا تلقین غزالی نہ رہی
مسجدیں مرثیہ خواں ہیں کہ نمازی نہ رہے
یعنی وہ صاحب اوصاف حجازی نہ رہے
شور ہے ہو گئے دنیا سے مسلماں نابود
ہم یہ کہتے ہیں کہ تھے بھی کہیں مسلم موجود
وضع میں تم ہو نصاریٰ تو تمدن میں ہنود
یہ مسلماں ہیں جنہیں دیکھ کے شرمائیں یہود
یوں تو سید بھی ہو مرزا بھی ہو افغان بھی ہو
تم سبھی کچھ ہو بتاؤ تو مسلمان بھی ہو
دم تقریر تھی مسلم کی صداقت بیباک
عدل اس کا تھا قوی لوث مراعات سے پاک
شجر فطرت مسلم تھا حیا سے نمناک
تھا شجاعت میں وہ اک ہستی فوق الادراک
خود گدازی نم کیفیت صہبایش بود
خالی از خویش شدن صورت مینا یش بود
ہر مسلماں رگ باطل کے لیے نشتر تھا
اس کے آئینۂ ہستی میں عمل جوہر تھا
جو بھروسا تھا اسے قوت بازو پر تھا
ہے تمہیں موت کا ڈر اس کو خدا کا ڈر تھا
باپ کا علم نہ بیٹے کو اگر ازبر ہو
پھر پسر قابل میراث پدر کیونکر ہو
ہر کوئی مست مئے ذوق تن آسانی ہے
تم مسلماں ہو یہ انداز مسلمانی ہے
حیدری فقر ہے نے دولت عثمانی ہے
تم کو اسلاف سے کیا نسبت روحانی ہے
وہ زمانے میں معزز تھے مسلماں ہو کر
اور تم خوار ہوئے تارک قرآں ہو کر
تم ہو آپس میں غضب ناک وہ آپس میں رحیم
تم خطا کار و خطا بیں وہ خطا پوش و کریم
چاہتے سب ہیں کہ ہوں اوج ثریا پہ مقیم
پہلے ویسا کوئی پیدا تو کرے قلب سلیم
تخت فغفور بھی ان کا تھا سریر کے بھی
یوں ہی باتیں ہیں کہ تم میں وہ حمیت ہے بھی
خودکشی شیوہ تمہارا وہ غیور و خوددار
تم اخوت سے گریزاں وہ اخوت پہ نثار
تم ہو گفتار سراپا وہ سراپا کردار
تم ترستے ہو کلی کو وہ گلستاں بکنار
اب تلک یاد ہے قوموں کو حکایت ان کی
نقش ہے صفحۂ ہستی پہ صداقت ان کی
مثل انجم افق قوم پہ روشن بھی ہوئے
بت ہندی کی محبت میں برہمن بھی ہوئے
شوق پرواز میں مہجور نشیمن بھی ہوئے
بے عمل تھے ہی جواں دین سے بدظن بھی ہوئے
ان کو تہذیب نے ہر بند سے آزاد کیا
لا کے کعبے سے صنم خانے میں آباد کیا
قیس زحمت کش تنہائی صحرا نہ رہے
شہر کی کھائے ہوا بادیہ پیما نہ رہے
وہ تو دیوانہ ہے بستی میں رہے یا نہ رہے
یہ ضروری ہے حجاب رخ لیلا نہ رہے
گلۂ جور نہ ہو شکوۂ بیداد نہ ہو
عشق آزاد ہے کیوں حسن بھی آزاد نہ ہو
عہد نو برق ہے آتش زن ہر خرمن ہے
ایمن اس سے کوئی صحرا نہ کوئی گلشن ہے
اس نئی آگ کا اقوام کہن ایندھن ہے
ملت ختم رسل شعلہ بہ پیراہن ہے
آج بھی ہو جو براہیم کا ایماں پیدا
آگ کر سکتی ہے انداز گلستاں پیدا
دیکھ کر رنگ چمن ہو نہ پریشاں مالی
کوکب غنچہ سے شاخیں ہیں چمکنے والی
خس و خاشاک سے ہوتا ہے گلستاں خالی
گل بر انداز ہے خون شہدا کی لالی
رنگ گردوں کا ذرا دیکھ تو عنابی ہے
یہ نکلتے ہوئے سورج کی افق تابی ہے
امتیں گلشن ہستی میں ثمر چیدہ بھی ہیں
اور محروم ثمر بھی ہیں خزاں دیدہ بھی ہیں
سیکڑوں نخل ہیں کاہیدہ بھی بالیدہ بھی ہیں
سیکڑوں بطن چمن میں ابھی پوشیدہ بھی ہیں
نخل اسلام نمونہ ہے برومندی کا
پھل ہے یہ سیکڑوں صدیوں کی چمن بندی کا
پاک ہے گرد وطن سے سر داماں تیرا
تو وہ یوسف ہے کہ ہر مصر ہے کنعاں تیرا
قافلہ ہو نہ سکے گا کبھی ویراں تیرا
غیر یک بانگ درا کچھ نہیں ساماں تیرا
نخل شمع استی و در شعلہ دو ریشۂ تو
عاقبت سوز بود سایۂ اندیشۂ تو
تو نہ مٹ جائے گا ایران کے مٹ جانے سے
نشۂ مے کو تعلق نہیں پیمانے سے
ہے عیاں یورش تاتار کے افسانے سے
پاسباں مل گئے کعبے کو صنم خانے سے
کشتئ حق کا زمانے میں سہارا تو ہے
عصر نو رات ہے دھندلا سا ستارا تو ہے
ہے جو ہنگامہ بپا یورش بلغاری کا
غافلوں کے لیے پیغام ہے بیداری کا
تو سمجھتا ہے یہ ساماں ہے دل آزاری کا
امتحاں ہے ترے ایثار کا خودداری کا
کیوں ہراساں ہے صہیل فرس اعدا سے
نور حق بجھ نہ سکے گا نفس اعدا سے
چشم اقوام سے مخفی ہے حقیقت تیری
ہے ابھی محفل ہستی کو ضرورت تیری
زندہ رکھتی ہے زمانے کو حرارت تیری
کوکب قسمت امکاں ہے خلافت تیری
وقت فرصت ہے کہاں کام ابھی باقی ہے
نور توحید کا اتمام ابھی باقی ہے
مثل بو قید ہے غنچے میں پریشاں ہو جا
رخت بر دوش ہوائے چمنستاں ہو جا
ہے تنک مایہ تو ذرے سے بیاباں ہو جا
نغمۂ موج ہے ہنگامۂ طوفاں ہو جا
قوت عشق سے ہر پست کو بالا کر دے
دہر میں اسم محمد سے اجالا کر دے
ہو نہ یہ پھول تو بلبل کا ترنم بھی نہ ہو
چمن دہر میں کلیوں کا تبسم بھی نہ ہو
یہ نہ ساقی ہو تو پھر مے بھی نہ ہو خم بھی نہ ہو
بزم توحید بھی دنیا میں نہ ہو تم بھی نہ ہو
خیمہ افلاک کا استادہ اسی نام سے ہے
نبض ہستی تپش آمادہ اسی نام سے ہے
دشت میں دامن کہسار میں میدان میں ہے
بحر میں موج کی آغوش میں طوفان میں ہے
چین کے شہر مراقش کے بیابان میں ہے
اور پوشیدہ مسلمان کے ایمان میں ہے
چشم اقوام یہ نظارہ ابد تک دیکھے
رفعت شان رفعنا لک ذکرک دیکھے
مردم چشم زمیں یعنی وہ کالی دنیا
وہ تمہارے شہدا پالنے والی دنیا
گرمی مہر کی پروردہ ہلالی دنیا
عشق والے جسے کہتے ہیں بلالی دنیا
تپش اندوز ہے اس نام سے پارے کی طرح
غوطہ زن نور میں ہے آنکھ کے تارے کی طرح
عقل ہے تیری سپر عشق ہے شمشیر تری
مرے درویش خلافت ہے جہانگیر تری
ما سوا اللہ کے لیے آگ ہے تکبیر تری
تو مسلماں ہو تو تقدیر ہے تدبیر تری
کی محمد سے وفا تو نے تو ہم تیرے ہیں
یہ جہاں چیز ہے کیا لوح و قلم تیرے ہیں

علامہ اقبال

نظم

نہیں منت کش تاب شنیدن داستاں میری
خموشی گفتگو ہے بے زبانی ہے زباں میری
یہ دستور زباں بندی ہے کیسا تیری محفل میں
یہاں تو بات کرنے کو ترستی ہے زباں میری
اٹھائے کچھ ورق لالے نے کچھ نرگس نے کچھ گل نے
چمن میں ہر طرف بکھری ہوئی ہے داستاں میری
اڑا لی قمریوں نے طوطیوں نے عندلیبوں نے
چمن والوں نے مل کر لوٹ لی طرز فغاں میری
ٹپک اے شمع آنسو بن کے پروانے کی آنکھوں سے
سراپا درد ہوں حسرت بھری ہے داستاں میری
الٰہی پھر مزہ کیا ہے یہاں دنیا میں رہنے کا
حیات جاوداں میری نہ مرگ ناگہاں میری
مرا رونا نہیں رونا ہے یہ سارے گلستاں کا
وہ گل ہوں میں خزاں ہر گل کی ہے گویا خزاں میری
دریں حسرت سرا عمریست افسون جرس دارم
ز فیض دل طپیدن ہا خروش بے نفس دارم
ریاض دہر میں نا آشنائے بزم عشرت ہوں
خوشی روتی ہے جس کو میں وہ محروم مسرت ہوں
مری بگڑی ہوئی تقدیر کو روتی ہے گویائی
میں حرف زیر لب شرمندۂ گوش سماعت ہوں
پریشاں ہوں میں مشت خاک لیکن کچھ نہیں کھلتا
سکندر ہوں کہ آئینہ ہوں یا گرد کدورت ہوں
یہ سب کچھ ہے مگر ہستی مری مقصد ہے قدرت کا
سراپا نور ہو جس کی حقیقت میں وہ ظلمت ہوں
خزینہ ہوں چھپایا مجھ کو مشت خاک صحرا نے
کسی کو کیا خبر ہے میں کہاں ہوں کس کی دولت ہوں
نظر میری نہیں ممنون سیر عرصۂ ہستی
میں وہ چھوٹی سی دنیا ہوں کہ آپ اپنی ولایت ہوں
نہ صہبا ہوں نہ ساقی ہوں نہ مستی ہوں نہ پیمانہ
میں اس مے خانۂ ہستی میں ہر شے کی حقیقت ہوں
مجھے راز دو عالم دل کا آئینہ دکھاتا ہے
وہی کہتا ہوں جو کچھ سامنے آنکھوں کے آتا ہے
عطا ایسا بیاں مجھ کو ہوا رنگیں بیانوں میں
کہ بام عرش کے طائر ہیں میرے ہم زبانوں میں
اثر یہ بھی ہے اک میرے جنون فتنہ ساماں کا
مرا آئینۂ دل ہے قضا کے راز دانوں میں
رلاتا ہے ترا نظارہ اے ہندوستاں مجھ کو
کہ عبرت خیز ہے تیرا فسانہ سب فسانوں میں
دیا رونا مجھے ایسا کہ سب کچھ دے دیا گویا
لکھا کلک ازل نے مجھ کو تیرے نوحہ خوانوں میں
نشان برگ گل تک بھی نہ چھوڑ اس باغ میں گلچیں
تری قسمت سے رزم آرائیاں ہیں باغبانوں میں
چھپا کر آستیں میں بجلیاں رکھی ہیں گردوں نے
عنادل باغ کے غافل نہ بیٹھیں آشیانوں میں
سن اے غافل صدا میری یہ ایسی چیز ہے جس کو
وظیفہ جان کر پڑھتے ہیں طائر بوستانوں میں
وطن کی فکر کر ناداں مصیبت آنے والی ہے
تری بربادیوں کے مشورے ہیں آسمانوں میں
ذرا دیکھ اس کو جو کچھ ہو رہا ہے ہونے والا ہے
دھرا کیا ہے بھلا عہد کہن کی داستانوں میں
یہ خاموشی کہاں تک لذت فریاد پیدا کر
زمیں پر تو ہو اور تیری صدا ہو آسمانوں میں
نہ سمجھوگے تو مٹ جاؤگے اے ہندوستاں والو
تمہاری داستاں تک بھی نہ ہوگی داستانوں میں
یہی آئین قدرت ہے یہی اسلوب فطرت ہے
جو ہے راہ عمل میں گامزن محبوب فطرت ہے
ہویدا آج اپنے زخم پنہاں کر کے چھوڑوں گا
لہو رو رو کے محفل کو گلستاں کر کے چھوڑوں گا
جلانا ہے مجھے ہر شمع دل کو سوز پنہاں سے
تری تاریک راتوں میں چراغاں کر کے چھوڑوں گا
مگر غنچوں کی صورت ہوں دل درد آشنا پیدا
چمن میں مشت خاک اپنی پریشاں کر کے چھوڑوں گا
پرونا ایک ہی تسبیح میں ان بکھرے دانوں کو
جو مشکل ہے تو اس مشکل کو آساں کر کے چھوڑوں گا
مجھے اے ہم نشیں رہنے دے شغل سینہ کاوی میں
کہ میں داغ محبت کو نمایاں کر کے چھوڑوں گا
دکھا دوں گا جہاں کو جو مری آنکھوں نے دیکھا ہے
تجھے بھی صورت آئینہ حیراں کر کے چھوڑوں گا
جو ہے پردوں میں پنہاں چشم بینا دیکھ لیتی ہے
زمانے کی طبیعت کا تقاضا دیکھ لیتی ہے
کیا رفعت کی لذت سے نہ دل کو آشنا تو نے
گزاری عمر پستی میں مثال نقش پا تو نے
رہا دل بستۂ محفل مگر اپنی نگاہوں کو
کیا بیرون محفل سے نہ حیرت آشنا تو نے
فدا کرتا رہا دل کو حسینوں کی اداؤں پر
مگر دیکھی نہ اس آئینے میں اپنی ادا تو نے
تعصب چھوڑ ناداں دہر کے آئینہ خانے میں
یہ تصویریں ہیں تیری جن کو سمجھا ہے برا تو نے
سراپا نالۂ بیدار سوز زندگی ہو جا
سپند آسا گرہ میں باندھ رکھی ہے صدا تو نے
صفائے دل کو کیا آرائش رنگ تعلق سے
کف آئینہ پر باندھی ہے او ناداں حنا تو نے
زمیں کیا آسماں بھی تیری کج بینی پہ روتا ہے
غضب ہے سطر قرآں کو چلیپا کر دیا تو نے
زباں سے گر کیا توحید کا دعویٰ تو کیا حاصل
بنایا ہے بت پندار کو اپنا خدا تو نے
کنویں میں تو نے یوسف کو جو دیکھا بھی تو کیا دیکھا
ارے غافل جو مطلق تھا مقید کر دیا تو نے
ہوس بالائے منبر ہے تجھے رنگیں بیانی کی
نصیحت بھی تری صورت ہے اک افسانہ خوانی کی
دکھا وہ حسن عالم سوز اپنی چشم پر نم کو
جو تڑپاتا ہے پروانے کو رلواتا ہے شبنم کو
ذرا نظارہ ہی اے بو الہوس مقصد نہیں اس کا
بنایا ہے کسی نے کچھ سمجھ کر چشم آدم کو
اگر دیکھا بھی اس نے سارے عالم کو تو کیا دیکھا
نظر آئی نہ کچھ اپنی حقیقت جام سے جم کو
شجر ہے فرقہ آرائی تعصب ہے ثمر اس کا
یہ وہ پھل ہے کہ جنت سے نکلواتا ہے آدم کو
نہ اٹھا جذبۂ خورشید سے اک برگ گل تک بھی
یہ رفعت کی تمنا ہے کہ لے اڑتی ہے شبنم کو
پھرا کرتے نہیں مجروح الفت فکر درماں میں
یہ زخمی آپ کر لیتے ہیں پیدا اپنے مرہم کو
محبت کے شرر سے دل سراپا نور ہوتا ہے
ذرا سے بیج سے پیدا ریاض طور ہوتا ہے
دوا ہر دکھ کی ہے مجروح تیغ آرزو رہنا
علاج زخم ہے آزاد احسان رفو رہنا
شراب بے خودی سے تا فلک پرواز ہے میری
شکست رنگ سے سیکھا ہے میں نے بن کے بو رہنا
تھمے کیا دیدۂ گریاں وطن کی نوحہ خوانی میں
عبادت چشم شاعر کی ہے ہر دم با وضو رہنا
بنائیں کیا سمجھ کر شاخ گل پر آشیاں اپنا
چمن میں آہ کیا رہنا جو ہو بے آبرو رہنا
جو تو سمجھے تو آزادی ہے پوشیدہ محبت میں
غلامی ہے اسیر امتیاز ما و تو رہنا
یہ استغنا ہے پانی میں نگوں رکھتا ہے ساغر کو
تجھے بھی چاہیئے مثل حباب آبجو رہنا
نہ رہ اپنوں سے بے پروا اسی میں خیر ہے تیری
اگر منظور ہے دنیا میں او بیگانہ خو رہنا
شراب روح پرور ہے محبت نوع انساں کی
سکھایا اس نے مجھ کو مست بے جام و سبو رہنا
محبت ہی سے پائی ہے شفا بیمار قوموں نے
کیا ہے اپنے بخت خفتہ کو بیدار قوموں نے
بیابان محبت دشت غربت بھی وطن بھی ہے
یہ ویرانہ قفس بھی آشیانہ بھی چمن بھی ہے
محبت ہی وہ منزل ہے کہ منزل بھی ہے صحرا بھی
جرس بھی کارواں بھی راہبر بھی راہزن بھی ہے
مرض کہتے ہیں سب اس کو یہ ہے لیکن مرض ایسا
چھپا جس میں علاج گردش چرخ کہن بھی ہے
جلانا دل کا ہے گویا سراپا نور ہو جانا
یہ پروانہ جو سوزاں ہو تو شمع انجمن بھی ہے
وہی اک حسن ہے لیکن نظر آتا ہے ہر شے میں
یہ شیریں بھی ہے گویا بے ستوں بھی کوہ کن بھی ہے
اجاڑا ہے تمیز ملت و آئیں نے قوموں کو
مرے اہل وطن کے دل میں کچھ فکر وطن بھی ہے
سکوت آموز طول داستان درد ہے ورنہ
زباں بھی ہے ہمارے منہ میں اور تاب سخن بھی ہے
نمیگردید کو تہ رشتۂ معنی رہا کردم
حکایت بود بے پایاں بخاموشی ادا کردم

علامہ اقبال

نظم

وہ تو کل نو ہی برس کا تھا، اسے کیوں چن کر
فرقہ وارانہ فسادات نے کل قتل کیا۔۔۔!

گلزار

نظم

اے کہ تیرا مرغ جاں تار نفس میں ہے اسیر
اے کہ تیری روح کا طائر قفس میں ہے اسیر
اس چمن کے نغمہ پیراؤں کی آزادی تو دیکھ
شہر جو اجڑا ہوا تھا اس کی آبادی تو دیکھ
فکر رہتی تھی مجھے جس کی وہ محفل ہے یہی
صبر و استقلال کی کھیتی کا حاصل ہے یہی
سنگ تربت ہے مرا گرویدۂ تقریر دیکھ
چشم باطن سے ذرا اس لوح کی تحریر دیکھ
مدعا تیرا اگر دنیا میں ہے تعلیم دیں
ترک دنیا قوم کو اپنی نہ سکھلانا کہیں
وا نہ کرنا فرقہ بندی کے لیے اپنی زباں
چھپ کے ہے بیٹھا ہوا ہنگامۂ محشر یہاں
وصل کے اسباب پیدا ہوں تری تحریر سے
دیکھ کوئی دل نہ دکھ جائے تری تقریر سے
محفل نو میں پرانی داستانوں کو نہ چھیڑ
رنگ پر جو اب نہ آئیں ان فسانوں کو نہ چھیڑ
تو اگر کوئی مدبر ہے تو سن میری صدا
ہے دلیری دست ارباب سیاست کا عصا
عرض مطلب سے جھجک جانا نہیں زیبا تجھے
نیک ہے نیت اگر تیری تو کیا پروا تجھے
بندۂ مومن کا دل بيم و ريا سے پاک ہے
قوت فرماں روا کے سامنے بے باک ہے
ہو اگر ہاتھوں میں تیرے خامہ معجز رقم
شیشۂ دل ہو اگر تیرا مثال جام جم
پاک رکھ اپنی زباں تلمیذ رحمانی ہے تو
ہو نہ جائے دیکھنا تیری صدا بے آبرو
سونے والوں کو جگا دے شعر کے اعجاز سے
خرمن باطل جلا دے شعلۂ آواز سے

علامہ اقبال

نظم

لحد میں سو رہی ہے آج بے شک مشت خاک اس کی
مگر گرم عمل ہے جاگتی ہے جان پاک اس کی
وہ اک فانی بشر تھا میں یہ باور کر نہیں سکتا
بشر اقبال ہو جائے تو ہرگز مر نہیں سکتا
بہ زیر سایۂ دیوار مسجد ہے جو آسودہ
یہ خاکی جسم ہے ستر برس کا راہ پیمودہ
یہ خاکی جسم بھی اس کا بہت ہی بیش قیمت تھا
جسے ہم جلوہ سمجھے تھے وہ پردہ بھی غنیمت تھا
اسے ہم ناپتے تھے لے کے آنکھوں ہی کا پیمانا
غزل خواں اس کو جانا ہم نے شاعر اس کو گردانا
فقط صورت ہی دیکھی اس کے معنی ہم نہیں سمجھے
نہ دیکھا رنگ تصویر آئنے کو دل نشیں سمجھے
ہمیں ضعف بصارت سے کہاں تھی تاب نظارہ
سکھائے اس کے پردے نے ہمیں آداب نظارا
یہ نغمہ کیا ہے زیر پردہ ہائے ساز کم سمجھے
رہے سب گوش بر آواز لیکن راز کم سمجھے
شکست پیکر محسوس نے توڑا حجاب آخر
طلوع صبح محشر بن کے چمکا آفتاب آخر
مقید اب نہیں اقبالؔ اپنے جسم فانی میں
نہیں وہ بند حائل آج دریا کی روانی میں
وجود مرگ کی قائل نہیں تھی زندگی اس کی
تعالی اللہ اب دیکھے کوئی پائندگی اس کی
جسے ہم مردہ سمجھے زندہ تر پائندہ تر نکلا
مہ و خورشید سے ذرے کا دل تابندہ تر نکلا
ابھی اندازہ ہو سکتا نہیں اس کی بلندی کا
ابھی دنیا کی آنکھوں پر ہے پردہ فرقہ بندی کا
مگر میری نگاہوں میں ہیں چہرے ان جوانوں کے
جنہیں اقبالؔ نے بخشے ہیں بازو قہر مانوں کے

حفیظ جالندھری

نظم

طاقت ہو کسی میں تو مٹائے مری ہستی
ڈائن ہے مرا نام لقب فرقہ پرستی
میں نے بڑی چالاکی سے اک کام کیا ہے
پہلے ہی محبت کا گلا گھونٹ دیا ہے
میں فتنے اٹھا دیتی ہوں ہر اٹھتے قدم سے
اس دیش کے ٹکڑے بھی ہوئے میرے ہی دم سے
سرمایہ پرستوں نے جنم مجھ کو دیا ہے
مذہب کے تعصب نے مجھے گود لیا ہے
ہے ملک کی تقسیم لڑکپن کی کہانی
اس وقت تو بچپن تھا مرا اب ہے جوانی
گھبراتا ہے شیطاں مری تقریر کے فن سے
میں زہر اگلتی ہوں زباں بن کے دہن سے
درکار ہوا جب بھی مجھے خون زیادہ
میں آ گئی اوڑھے ہوئے مذہب کا لبادہ
میں دیش کی قتالہ ہوں اور سب سے بڑی ہوں
بچوں کی بھی گردن پہ چھری بن کے چلی ہوں
گولی کو سکھا دیتی ہوں چلنے کا قرینہ
میں چھید کے رکھ دیتی ہوں مظلوم کا سینہ
ہر سوکھے ہوئے ہونٹ سے لیتی ہوں تری میں
دم توڑنے والوں کی اڑاتی ہوں ہنسی میں
معصوموں کے ماں باپ کا سر میں نے لیا ہے
بچوں کو یتیمی کا لقب میں نے دیا ہے
ہندو کا لہو ہو کہ مسلماں کا لہو ہو
مطلب ہے لہو سے کسی انساں کا لہو ہو
مل جائے تو میں کس کا لہو پی نہیں سکتی
مجبور ہوں بے خون پیے جی نہیں سکتی
ہر فرقے کے لوگوں کا لہو چاٹ رہی ہوں
فصلوں کی طرح سب کے گلے کاٹ رہی ہوں
جس وقت جہاں چاہوں وہاں آگ لگا دوں
جس بستی کو چاہوں اسے ویرانہ بنا دوں
جس شہر کو پھونکا نہ مکیں تھے نہ مکاں تھا
اٹھتا ہوا کچھ دیر اگر تھا تو دھواں تھا
گلشن مرے ہاتھوں یوں ہی تاراج رہے گا
میں زندہ رہوں گی تو مرا راج رہے گا
طاقت ہو کسی میں تو مٹائے مری ہستی
ڈائن ہے مرا نام لقب فرقہ پرستی

نذیر بنارسی

نظم

بھول گئی ہے آج تو رہبر حق نگاہ کو
بھول گئی ہے آج تو مرد جہاں پناہ کو
بھول گئی ہے آج تو ضبط کے بادشاہ کو
تجھ سے کہوں تو کیا کہوں اے مری بامراد قوم
اے مری زندہ باد قوم اے مری زندہ باد قوم
تیرے مہنت تو ابھی مست ہیں ذات پات میں
تیرے بڑے بڑے گرو غرق ہیں چھوت چھات میں
آہ کہ ڈھونڈھتی ہے تو نور اندھیری رات میں
تجھ سے کہوں تو کیا کہوں اے مری بامراد قوم
اے مری زندہ باد قوم اے مری زندہ باد قوم
آہ کہ تو نے ضبط کے درس کو بھی بھلا دیا
آہ کہ تو نے قلب سے نام صفا مٹا دیا
آہ کہ دوستوں کو بھی تو نے عدو بنا دیا
تجھ سے کہوں تو کیا کہوں اے مری بامراد قوم
اے مری زندہ باد قوم اے مری زندہ باد قوم
تیرے مشیر بے عمل تیرے وزیر بے عمل
تیرے غریب بے عمل تیرے امیر بے عمل
تیرے سفیر بے عمل تیرے کبیر بے عمل
تجھ سے کہوں تو کیا کہوں اے مری بامراد قوم
اے مری زندہ باد قوم اے مری زندہ باد قوم
اف کہ قدم قدم پہ ہے تیرا شریک اہرمن
اف کہ تجھے نصیب ہیں فرقہ پرست راہزن
اف کہ تجھے عزیز ہیں چرب زبان و بد سخن
تجھ سے کہوں تو کیا کہوں اے مری بامراد قوم
اے مری زندہ باد قوم اے مری زندہ باد قوم
اف کہ جہالتوں پہ بھی عقل کا ہے گماں تجھے
اف کہ ابھی پسند ہے جہل کی داستاں تجھے
اف کہ ہے فرقہ دوستی دیتی ابھی اماں تجھے
تجھ سے کہوں تو کیا کہوں اے مری بامراد قوم
اے مری زندہ باد قوم اے مری زندہ باد قوم
ظلم کیے ہیں تو نے جو ظلم کے شاہدوں سے پوچھ
قتل کیے ہیں کس قدر اپنے مجاہدوں سے پوچھ
پیتے ہیں روز کتنی مے جھوٹ کے زاہدوں سے پوچھ
تجھ سے کہوں تو کیا کہوں اے مری بامراد قوم
اے مری زندہ باد قوم اے مری زندہ باد قوم
درس مہاتما کا بھی تجھ پر کوئی اثر نہیں
قول‌‌ مہاتما پہ بھی آج تری نظر نہیں
کون ہے اس کا جانشیں اس کی تجھے خبر نہیں
تجھ سے کہوں تو کیا کہوں اے مری بامراد قوم
اے مری زندہ باد قوم اے مری زندہ باد قوم
تجھ کو بتائے کون آج اصل میں راہبر ہے کون
تجھ کو بتائے کون آج بندۂ معتبر ہے کون
تجھ کو بتائے کون آج پیر جواں نظر ہے کون
تجھ سے کہوں تو کیا کہوں اے مری بامراد قوم
اے مری زندہ باد قوم اے مری زندہ باد قوم
دیکھ نہ چشم شوق سے پتھروں کے تو طور تو
قدر جواہر حسیں دیکھ بہ چشم غور تو
ورنہ ہزار ذلتیں تیرے لیے ہیں اور تو
تجھ سے کہوں تو کیا کہوں اے مری بامراد قوم
اے مری زندہ باد قوم اے مری زندہ باد قوم

عرش ملسیانی

نظم

ملک سے فرقہ پرستی کو ہٹا ہی ڈالو
دیر و کعبہ کے تفرقہ کو مٹا ہی ڈالو
ہند کو دیش محبت کا بنا ہی ڈالو
یہ نیا گیت زمانے کو سنا ہی ڈالو
ڈال دے ملک میں الفت کی بنائیں ہولی
دوستو آؤ چلو ایسی منائیں ہولی

کنول ڈبائیوی

نظم

بھلا دو بغض و عداوت کی داستانوں کو
جلا دو فرقہ پرستی کے آشیانوں کو
ہر ایک سمت بکھیرو خلوص کے نغمے
دلوں میں جذبۂ مہر و وفا جگا کے چلو
رہ وطن میں قدم سے قدم ملا کے چلو

جعفر ملیح آبادی

نظم

سلام اے افق ہند کے حسیں تارو
سلام تم پہ سپہر وطن کے مہ پارو
سلام تم پہ مرے بچو اے مرے پیارو
بھلائے بیٹھے ہو تم مجھ کو کس لئے یارو
جلاؤ میرے پیامات کے دئے یارو
سنو کہ میری تمنا و آرزو تم ہو
سنو کہ مادر بھارت کی آبرو تم ہو
سنو کہ امن زمانہ کی جستجو تم ہو
خموش بیٹھے ہو کیوں اپنے لب سیے یارو
جلاؤ میرے پیامات کے دئے یارو
سلام تم پہ کہ میرے چمن کے پھول ہو تم
مری نظر مری فطرت مرا اصول ہو تم
مگر یہ کیا ہوا کس واسطے ملول ہو تم
یہ تم نے چند غلط کام کیوں کئے یارو
جلاؤ میرے پیامات کے دئے یارو
وطن میں خون کے دریا بہا دئے تم نے
سبھی نقوش اہنسا مٹا دئے تم نے
رواج کار محبت بھلا دئے تم نے
رسوم مہر و وفا ترک کر دئے یارو
جلاؤ میرے پیامات کے دئے یارو
سبق پڑھایا تھا تم کو عدم تشدد کا
تمہیں بتایا تھا میں نے گناہ ہے ہنسا
یہ تم نے کس لئے تیغ و تبر سے کام لیا
تمہارے ہاتھوں میں خنجر ہیں کس لئے یارو
جلاؤ میرے پیامات کے دئے یارو
تمہارے ذہنوں میں مکروہ سازش اور فساد
دلوں میں نفرت و کینہ ہے اور بغض و عناد
مگر لبوں پہ ہے بابائے‌‌ قوم زندہ باد
مجھے یہ کھوکھلے نعرے نہ چاہیے یارو
جلاؤ میرے پیامات کے دئے یارو
زمین نانک و چشتی پکارتی ہے تمہیں
دیار بدھ کی تجلی پکارتی ہے تمہیں
سنو کنہیا کی بنسی پکارتی ہے تمہیں
اب اور دیر بھی کرنی نہ چاہیے یارو
جلاؤ میرے پیامات کے دئے یارو
اٹھو زمانۂ حاضر ہے اک پیام عمل
اٹھو کہ کانپ رہی ہے نوائے ساز غزل
اٹھو کہ ماند نہ ہو جائے حسن تاج محل
اٹھو کہ سینوں میں پھر روشنی جئے یارو
جلاؤ میرے پیامات کے دئے یارو
پھر اپنے ذہنوں میں لہکاؤ دوستی کا چمن
پھر اپنی سانسوں سے مہکاؤ پیار کا مدھوبن
پھر اپنے کاموں سے چمکاؤ سر زمین وطن
تمہارے میکدے میں دہر پھر پئے یارو
جلاؤ میرے پیامات کے دئے یارو
نہ چھوڑو زندہ وطن میں کسی لٹیرے کو
کچل دو بڑھ کے ہر اک سانپ کو سپیرے کو
مٹاؤ فرقہ پرستی کے ہر اندھیرے کو
بچاؤ دیش کو بھگوان کے لئے یارو
جلاؤ میرے پیامات کے دئے یارو
مجھے یہ کھوکھلے نعرے نہ چاہیے یارو

نازش پرتاپ گڑھی

نظم

ہے یہی دستور دنیا اور یہی دیکھا گیا
پھول سے خوشبو نکلتے ہی اسے پھینکا گیا

غوث خواہ مخواہ حیدرآبادی

نظم

کیا تمہیں چھوت کا یہ درس بزرگوں نے دیا
کیا تمہیں فرقہ پرستی کی اجازت دی تھی
رام کے ماننے والو کبھی اتنا سوچا
کیا بزرگوں نے کسی قوم سے نفرت کی تھی

کنول ڈبائیوی

نظم

جبین وقت پر کیسی شکن ہے ہم نہیں سمجھے
کوئی کیوں کر حریف علم و فن ہے ہم نہیں سمجھے
کسی بھی شمع سے بے زار کیوں ہو کوئی پروانہ
یہ کیا اس دور کا دیوانہ پن ہے ہم نہیں سمجھے
بہت سمجھے تھے ہم اس دور کی فرقہ پرستی کو
زباں بھی آج شیخ و برہمن ہے ہم نہیں سمجھے
اگر اردو پہ بھی الزام ہے باہر سے آنے کا
تو پھر ہندوستاں کس کا وطن ہے ہم نہیں سمجھے
چمن کا حسن تو ہر رنگ کے پھولوں سے ہے راشدؔ
کوئی بھی پھول کیوں ننگ چمن ہے ہم نہیں سمجھے

راشد بنارسی

نظم

یہ دنیا تو ان شعلہ سامان لوگوں نے آپس میں تقسیم کر لی
جو ہتھیار کی شکل میں رنج و غم ڈھالتے ہیں
یا گولہ بارود کے کارخانوں کے مالک ہیں
یا پھر ثنا خواں ہیں ان کے
ہمارے لیے صرف نعرے بچے ہیں
صنعتی دور کے کج کلاہوں کی داد و دہش روح پرور ہو یا جان لیوا
مگر زندہ باد، آفریں، مرحبا، کے سوا کچھ نہیں پاس اپنے
یہ سب جانتا ہے ہماری شجاعت کی پرواز کیا ہے
ہماری جواں مردی اک صوبہ جاتی تعصب سے
یا فرقہ واری فسادات سے آگے کچھ بھی نہیں ہے
فتوحات اسکندری ہم نے تختی پہ لکھ کر مٹا دی ہیں کب کی
ہمارے بعد زمیں کے تلے سو رہے ہیں
عجائب گھروں میں لٹکتی ہیں تلواریں ان کی
اور ان کے زریں لبادوں کو گھن کھا گیا ہے
ذرہ بکتروں پر کلونس آ گئی ہے
یہ سب جانتا ہے ہماری تگ و تاز کیا ہے
ہمارے شکم گر ہمارے سروں پہ نہ ہوتے
اور چہروں میں اعضائے جنسی
تو ہم اچھے انسان بنتے
ہمارے گھروں کے کم و بیش سب عقبی دروازے پیہم کھلے ہیں
ہمارے لہو میں ہرے لال پیلے بہت سارے پرچم کھلے ہیں
کہیں سے مگر حق کی آواز آتی نہیں ہے
ہماری زباں دل کی ساتھی نہیں ہے
ہمارے لیے کھوکھلا لفظ جمہوریت ہے، تقاریر ہیں لیڈروں کی
ہمارے لیے روز ناموں کے صفحات ہیں، اشتہارات ہیں نیم جنسی
ہمارے لیے دیوتاؤں کے بت ہیں، خدا کے فرامین ہیں اور عقبیٰ
جو بد رنگ ہے حال کی طرح اور کورے لٹھے کی بو سے بھری ہے
ہمارے لیے صرف روٹی کی جد و جہد
عورتوں کے برہنہ بدن کی تمنا سے آگے کہیں کچھ نہیں ہے
ہماری رگوں میں جو تیزاب ہے اس کی شدت کبھی کم نہ ہوگی!

اختر الایمان

نظم

میں نے کہا یہ ملک ایک ہے
تو سب کے لئے ایک سا ہو قانون
تو انہوں نے کہا کہ
میں فرقہ پرست کی طرح بولتا ہوں
میں نے کہا کہ مندر مسجد سے زیادہ ضروری ہے
تعلیم ہر انسان کو اور ہر پیٹ کو روٹی
تو انہوں نے کہا کہ
میں ناستک سا ایشور کو ضرورت میں تولتا ہوں
میں نے کہا کہ تم ہم نے چنے ہو
تو ہمارا وکاس کرو
نہ صرف اپنی تجوریاں بھرو
تو انہوں نے کہا کہ
میں بے وجہ راز کھولتا ہوں
میں نے کہا سارا ملک ایک ہے
بس کچھ دن میں بدل دیں گے
مل کر ہم سارا نظام
وو کچھ نہیں بولے اب
بس ہنستے رہے
میری بات اور میرے خیالات پر
اب وو سب زور سے ہنس رہے ہے
اور میرے پاؤں جیسے دھرتی میں دھنس رہے ہیں
میں جانتا ہوں کہ وو سارے ملک پر ہنس رہے ہیں

مادھو اوانہ

نظم

سماں سہانا تھا ٹھنڈی ہوا کے جھونکوں سے
بدن کو تازگی ملتی تھی روح میں جیسے
اضافہ ہوتا سا محسوس ہو رہا تھا مجھے
فضا میں اڑتے ہوئے مست ابر کے ٹکڑے
یہ لگ رہا تھا بہاروں کے ہیں فرستادے
خیال آیا کہ موسم کا لطف لیں سب دوست
مرے تو جاتے ہیں جینے کو آج کھل کے جئیں
عظیم شہر کی آلودہ اس فضا سے پرے
کہیں بھی مل کے چلیں ساتھ بیٹھیں کھائیں پئیں
مرا پڑوسی بڑا پیارا آدمی تھا اسے
گلی میں آن کے آواز دی غلام رسول
معاً مجھے یہ خیال آیا میرا ہمسایہ
اب اس جہاں میں نہیں بن چکا ہے وقت کی دھول
جو پچھلے سال اچانک بھڑک اٹھے تھے یہاں
وہ فرقہ واری فسادات کھا گئے اس کو

اختر الایمان

نظم

جھکے گا خاک پہ یہ قصر آسماں اک دن
ہمارے زیر قدم ہوگی کہکشاں اک دن
بڑھے گا جانب منزل یہ کارواں اک دن
فضائے ارض و سما ہوگی ہم عناں اک دن
حیات خضر ملے گی ہر ایک ذرے کو
ہمارا نقش قدم ہوگا جاوداں اک دن
ابھی جو خرمن اہل وفا پہ گرتی ہیں
چراغ راہ بنیں گی وہ بجلیاں اک دن
بہ ایں یقین و بہ ایں اعتقاد حسن یقیں
ابھی تو آئے گا وہ عہد خونچکاں اک دن
وہ عہد جس میں عزائم کے سوز و ساز کے ساتھ
اٹھے گا سینۂ مزدور سے دھواں اک دن
ہمارے ذوق تجسس کی تشنہ کامی کا
زمانہ لے گا سر دار امتحاں اک دن
ملیں گے بھیس میں رہزن کے رہبران وطن
فریب دیں گے ہمارے ہی پاسباں اک دن
یہ زر پرست کہ ہیں انقلاب کے دشمن
مٹا کے ہم کو بہت ہوں گے شادماں اک دن
چمن پہ فرقہ پرستی کی آگ برسا کر
یہ پھونک دیں گے ہر اک شاخ آشیاں اک دن
انہیں کا تیر ہے وہ گوڈسےؔ ہو یا اکبرؔ
ہر ایک بزم پہ لچکے گی یہ کماں اک دن
بنائیں گے یہی جمہوریت کے پردے میں
ہمارے ملک پہ غیروں کو حکمراں اک دن
منائیں گے یہ غریبوں کے خون سے ہولی
اجاڑ دیں گے کسانوں کی بستیاں اک دن
یہ جانشین ہیں راون کے ان کی سازش سے
اٹھیں گی رام کی عظمت پہ انگلیاں اک دن
جلو میں ان کے وہ سیلاب کشت و خوں ہوگا
لرز اٹھیں گی ہمالہ کی چوٹیاں اک دن
بتان دیر ندامت سے سرنگوں ہوں گے
اٹھے گی سینۂ ناقوس سے فغاں اک دن

مسعود اختر جمال

نظم

خلوص دل میں لیے کارواں کے ساتھ چلو
مسافرو چلو عزم گراں کے ساتھ چلو
زمانہ ساتھ چلے انجمن بھی ساتھ چلے
بہار چومے قدم بانکپن بھی ساتھ چلے
وہ عزم ہو کہ جسے زندگی سلام کرے
قدم قدم پہ سکوں جشن اہتمام کرے
وطن کی لاج بنو قوم کا نکھار بنو
ہر ایک دل کے لیے حسن اعتبار بنو
بھلا دو فرقہ پرستی کی داستانوں کو
مٹا دو بڑھ کے تعصب بھرے جہانوں کو
قسم وطن کی تمہیں ایکتا کے گن گاؤ
دلوں میں عظمت قوم و وطن کو چمکاؤ
قدم کے ساتھ اگر دل ملیں تو بات بنے
جہاں بھی چاہو وہیں منزل حیات بنے
ہو ایک دل ذرا آواز بھی ملا کے چلو
چلو تو راہ حوادث میں مسکرا کے چلو

بیکل اتساہی

نظم

کوئی کر سکتا نہیں فرقہ پرستوں کی شناخت
ایک دو کیا ٹولیوں کی ٹولیاں دہلی میں ہیں

اظہار ملیح آبادی

نظم

شراب شور سے لبریز ہے دنیا کا پیمانہ
حریف‌ دین و دانش ہے مذاق پیر مے خانہ
بشر ابلیس کو تزویر نو کا درس دیتا ہے
مزین ہے گناہ گوناگوں سے ہر پری خانہ
علوم‌ نو سے روشن بزم ہے تہذیب حاضر کی
ید تجدید نے ڈھالا ہے دل آویز بت خانہ
یہ مانا مغربی تعلیم نے پرواز بخشی ہے
یہ ماہ و خور بھی بن جائیں گے اب قندیل کا شانہ
خدا کے چاہنے والے ابھی تک بھولے بھالے ہیں
بنا رکھا ہے حرز جاں سدا ماضی کا افسانہ
گناہ تازہ کی تخلیق سے ابلیس قاصر ہے
دماغ فتنہ جو پر ہے مسلط ضعف پیرانہ
بہت مجبور بے چارہ ہے خود پیرانہ سالی سے
اسے معلوم کیا ہے معصیت کا تازہ پیمانہ
خدا والے تعجب ہے کہ معصوم و مقدس ہیں
عذاب نو بہ نو سے ہے مرصع آئنہ خانہ
رہ تشکیک پر رخش ہنر پیہم خراماں ہے
بہت مشکل ہے فطرت کا ابھی تسخیر فرمانا
مساوات نظر کا مدتوں سے شور سنتا ہوں
فضا دنیا کی ہے لیکن ابھی تک فرقہ‌ وارانہ
ہوس کا درس تو یارو بہت ہی خوب ہے لیکن
ابھی قرآن کی تفہیم سے عاجز ہے فرزانہ
بتوں کا توڑنا تھا کار آساں عہد ماضی میں
ولے مشکل ہے ڈھانا آج کی حکمت کا بت خانہ
قلوب عصر‌ حاضر میں ابھی ایمان ڈھل جائے
فقیروں کا نہیں دیکھا ہے اعجا‌‌ز کلیمانہ
تفاخر کے مریضوں کے لئے اکسیر ہوتی ہے
سراسر بندۂ‌ بیباکؔ کی طرز فقیرانہ

بیباک بھوجپوری

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے