کی تلاش کا نتیجه | موضو - نظم, صفحہ mood

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "mood"

نظم کے متعلقہ نتیجہ "mood"

نظم

میں بنجارہ
وقت کے کتنے شہروں سے گزرا ہوں
لیکن
وقت کے اس اک شہر سے جاتے جاتے مڑ کے دیکھ رہا ہوں
سوچ رہا ہوں
تم سے میرا یہ ناتا بھی ٹوٹ رہا ہے
تم نے مجھ کو چھوڑا تھا جس شہر میں آ کر
وقت کا اب وہ شہر بھی مجھ سے چھوٹ رہا ہے
مجھ کو وداع کرنے آئے ہیں
اس نگری کے سارے باسی
وہ سارے دن
جن کے کندھے پر سوتی ہے
اب بھی تمہاری زلف کی خوشبو
سارے لمحے
جن کے ماتھے پر روشن
اب بھی تمہارے لمس کا ٹیکا
نم آنکھوں سے
گم سم مجھ کو دیکھ رہے ہیں
مجھ کو ان کے دکھ کا پتا ہے
ان کو میرے غم کی خبر ہے
لیکن مجھ کو حکم سفر ہے
جانا ہوگا
وقت کے اگلے شہر مجھے اب جانا ہوگا

جاوید اختر

نظم

یاد کی راہ گزر جس پہ اسی صورت سے
مدتیں بیت گئی ہیں تمہیں چلتے چلتے
ختم ہو جائے جو دو چار قدم اور چلو
موڑ پڑتا ہے جہاں دشت فراموشی کا
جس سے آگے نہ کوئی میں ہوں نہ کوئی تم ہو
سانس تھامے ہیں نگاہیں کہ نہ جانے کس دم
تم پلٹ آؤ گزر جاؤ یا مڑ کر دیکھو
گرچہ واقف ہیں نگاہیں کہ یہ سب دھوکا ہے
گر کہیں تم سے ہم آغوش ہوئی پھر سے نظر
پھوٹ نکلے گی وہاں اور کوئی راہ گزر
پھر اسی طرح جہاں ہوگا مقابل پیہم
سایۂ زلف کا اور جنبش بازو کا سفر

فیض احمد فیض

نظم

گاؤں میں پھر اک میلہ آیا
بوڑھے باپ نے کانپتے ہاتھوں سے
بیٹے کی بانہہ کو تھاما
اور بیٹے نے
یہ کیا ہے اور وہ کیا ہے
جتنا بھی بن پایا
سمجھایا
باپ نے بیٹے کے کندھے پر سر رکھا
بیٹے نے پوچھا
نیند آتی ہے
باپ نے مڑ کے
یاد کی پگڈنڈی پر چلتے
بیتے ہوئے
سب اچھے برے
اور کڑوے میٹھے
لمحوں کے پیروں سے اڑتی
دھول کو دیکھا
پھر
اپنے بیٹے کو دیکھا
ہونٹوں پر
اک ہلکی سی مسکان آئی
ہولے سے بولا
ہاں!
مجھ کو اب نیند آتی ہے

جاوید اختر

نظم

وہ جب ہنگام رخصت دیکھتی تھی مجھ کو مڑ مڑ کر
تو خود فطرت کے دل میں محشر جذبات ہوتا تھا
وہ محو خواب جب ہوتی تھی اپنے نرم بستر پر
تو اس کے سر پہ مریم کا مقدس ہاتھ ہوتا تھا

اسرار الحق مجاز

نظم

برسو رام دھڑاکے سے
بڑھیا مر گئی فاقے سے
کل جگ میں بھی مرتی ہے ست جگ میں بھی مرتی تھی
یہ بڑھیا اس دنیا میں سدا ہی فاقے کرتی تھی
جینا اس کو راس نہ تھا
پیسا اس کے پاس نہ تھا
اس کے گھر کو دیکھ کے لکشمی مڑ جاتی تھی ناکے سے
برسو رام دھڑاکے سے
جھوٹے ٹکڑے کھا کے بڑھیا تپتا پانی پیتی تھی
مرتی ہے تو مر جانے دو پہلے بھی کب جیتی تھی
جے ہو پیسے والوں کی
گیہوں کے دلالوں کی
ان کا حد سے بڑھا منافع کچھ ہی کم ہے ڈاکے سے
برسو رام دھڑاکے سے

ساحر لدھیانوی

نظم

وہ راہ بدلتے ہیں اپنی اور مڑ کر ہاتھ ہلاتے ہیں
لیکن وہ دلوں کو یادوں کی خوشبو بن کر مہکاتے ہیں

فہمیدہ ریاض

نظم

منہ دھو کر جب اس نے مڑ کر میری جانب دیکھا
مجھ کو یہ محسوس ہوا جیسے کوئی بجلی چمکی ہے
یا جنگل کے اندھیرے میں جادو کی انگوٹھی دمکی ہے

منیر نیازی

نظم

ادھر نہ دیکھو کہ جو بہادر
قلم کے یا تیغ کے دھنی تھے
جو عزم و ہمت کے مدعی تھے
اب ان کے ہاتھوں میں صدق ایماں کی
آزمودہ پرانی تلوار مڑ گئی ہے
جو کج کلہ صاحب حشم تھے
جو اہل دستار محترم تھے
ہوس کے پر پیچ راستوں میں
کلہ کسی نے گرو رکھ دی
کسی نے دستار بیچ دی ہے
ادھر بھی دیکھو
جو اپنے رخشاں لہو کے دینار
مفت بازار میں لٹا کر
نظر سے اوجھل ہوئے
اور اپنی لحد میں اس وقت تک غنی ہیں،
ادھر بھی دیکھو
جو حرف حق کی صلیب پر اپنا تن سجا کر
جہاں سے رخصت ہوئے
اور اہل جہاں میں اس وقت تک نبی ہیں

فیض احمد فیض

نظم

تیرے خطوں کی خوشبو
ہاتھوں میں بس گئی ہے سانسوں میں رچ رہی ہے
خوابوں کی وسعتوں میں اک دھوم مچ رہی ہے
جذبات کے گلستاں مہکا رہی ہے ہر سو
تیرے خطوں کی خوشبو
تیرے خطوں کی مجھ پر کیا کیا عنایتیں ہیں
بے مدعا کرم ہے بے جا شکایتیں ہیں
اپنے ہی قہقہوں پر برسا رہی ہے آنسو
تیرے خطوں کی خوشبو
تیری زبان بن کر اکثر مجھے سنائے
باتیں بنی بنائی جملے رٹے رٹائے
مجھ پر بھی کر چکی ہے اپنی وفا کا جادو
تیرے خطوں کی خوشبو
سمجھے ہیں کچھ اسی نے آداب چاہتوں کے
سب کے لیے وہی ہیں القاب چاہتوں کے
سب کے لیے برابر پھیلا رہی ہے بازو
تیرے خطوں کی خوشبو
اپنے سوا کسی کو میں جانتا نہیں تھا
سنتا تھا لاکھ باتیں اور مانتا نہیں تھا
اب خود نکال لائی بیگانگی کے پہلو
تیرے خطوں کی خوشبو
کیا جانے کس طرف کو چپکے سے مڑ چکی ہے
گلشن کے پر لگا کر صحرا کو اڑ چلی ہے
روکا ہزار میں نے آئی مگر نہ قابو
تیرے خطوں کی خوشبو

قتیل شفائی

نظم

کیا زندگی ہماری
سب کچھ ہے اپنے بس میں
آزاد ہیں فضائیں
دنیا ہے دسترس میں
کیا کیا ہمیں ملا ہے
کچھ وقت کچھ برس میں
لیکن جو مڑ کے دیکھیں
تھی اک عجب کہانی
دشوار کیسا جینا
مشکل تھی زندگانی
اک آفت مسلسل
آلام ناگہانی
روزانہ صبح اٹھنا
آسان تھا نہ اتنا
ہر روز ڈانٹ کھانا
ہر روز کا سسکنا
ہر بات کے تماشے
ہر بات پر جھگڑنا
ابا وہیں کھڑے ہیں
اخبار پڑھ رہے ہیں
کیا کام ہم کو دے دیں
ہر وقت سوچتے ہیں
اولاد کو تو اپنی
نوکر سمجھ رہے ہیں
امی کے سامنے تو
بالکل نہ منہ کو کھولیں
ہم بد تمیز ٹھہرے
گو اچھی بات بولیں
چپ چاپ ہی رہیں بس
کتنا بھی خوار ہو لیں
پانی برس رہا ہے
پر دل ترس رہا ہے
وہ سائیکل کھڑی ہے
مانجھا وہیں رکھا ہے
کنچے یہاں پڑے ہیں
بلا وہاں کھڑا ہے
لیکن نہیں ہمیں کیا
لادے کمر پہ بستہ
اسکول جا رہے ہیں
تاریخ کا ہے پرچہ
اچھا نہیں ہوا تو
بس بند جیب خرچہ
اردو کا کام پورا
کل رات کر لیا تھا
لیکن ہمیں ریاضی
بالکل سمجھ نہ آیا
اللہ کے ہیں بندے
ہم سے ہے واسطہ کیا
امی نے صرف ڈانٹا
بالوں میں تیل ڈالا
بھیا نے صرف جھڑکا
باجی نے خوب ٹالا
سب کے لئے ہے جی میں
نفرت کا ایک جالا
بھیا کی سائیکل کی
کس نے ہوا نکالی
ہم کو بھلا خبر کیا
ہر شخص ہے سوالی
اس نے ہماری چڑیا
اس دن جو توڑ ڈالی
سچ ہے بہت ستم تھا
گویا تھے اک کھلونا
جیسے ہو سب برابر
گھر میں نہ ہونا ہونا
دیکھا نہیں کسی نے
چھپ چھپ ہمارا رونا
اب ہو گیا ہے اپنا ہر چیز پر اجارہ
سب اپنی ذمہ داری
سب فیصلے ہمارے
ہر چیز اختیاری
لیکن وہ بچپنے کی ہے یاد پیاری پیاری
کیا زندگی ہماری
کیا زندگی ہماری

اسنی بدر

نظم

تعلق
ترک کرنا ہے
تعلق
ترک
کر لینا
مگر
ویسے نہیں
جیسے
زمانہ
ترک
کرتا ہے
دلوں میں
فرق
کرتا ہے
وفا کو
غرق کرتا ہیں
تعلق
ترک کرنا ہے
تعلق
ترک کر لینا
مگر
اک مشورہ سن لو
اسے تم التجا سمجھو
تمہیں بس اتنا
کرنا ہے
کہ اس
انجام سے پہلے
میرا آغاز دہرا دو
مجھے پھر مجھ سے ملوا دو
تمہیں بس اتنا
کرنا ہے
محبت
کے مہینے کی
وہی تاریخ چنی ہے
وہی
اک وقت
رکھنا ہے
وہی
کپڑے پہننے ہیں
وہی
خوشبو لگانی ہے
جو پہلے دن لگائی تھی
محبت کی
وہ
پہلی
مسکراہٹ
ساتھ لانی ہے
اسی کیفے میں آنا ہے
اسی ٹیبل کو چننا ہے
وہی کافی منگانی ہے
کہ جو اس دن منگائی تھی
چمک
آنکھوں میں
وہ ہی ہو
کھنک
باتوں میں
وہ ہی ہو
ہتھیلی پر
اسی انداز میں
مہندی رچا لینا
کہ جو
اس دن رچائی تھی
سنو جاناں
محبت کا
مرا پہلا
لفافہ
وہ گلابی خط
اسے تم ساتھ لے آنا
تمہارا
خط
کہ جس کے رنگ
اب تک
ہو بہ ہو وہ ہیں
اسے میں ساتھ لاؤں گا
لفافے ہم
بدل لیں گے
تعلق
ترک کر لیں گے
اسی دن
کی طرح
کیفے سے جاتے وقت
مڑ کر دیکھ پاؤ تو
یہ تم پر چھوڑتا ہوں میں
تعلق توڑتا ہوں میں
جہاں سے
ابتدا کی تھی
وہیں پر
انتہا کرنا
تعلق
ترک کرنا ہے
تعلق
ترک
کر لینا
مگر
ویسے نہیں
جیسے
زمانہ
ترک
کرتا ہے

سراج فیصل خان

نظم

ثریا کو دیکھا پری اڑ گئی
جدھر سے تھی آئی ادھر مڑ گئی

صوفی غلام مصطفےٰ تبسم

نظم

ریستوران کی رنگا رنگ روشنیوں میں
ڈوبا ثمر کے خوبصورت گیت کی مدھم لے میں
میرے سامنے بیٹھی اداس چہرے والی اے خوبصورت لڑکی
اب پیچھے مڑ کے مت دیکھو
دیکھو تو ہمارے سامنے راستہ کتنا خوبصورت ہے
ہمارے سروں پر سکھ اور شانتی کا کتنا گہرا بادل ہے

سلمان سعید

نظم

تو سدا سہاگن ہو ماں ری!
مجھے اپنی توڑ نبھانا ہے
ری دلی چھو کر چرن ترے
مجھ کو واپس مڑ جانا ہے

فہمیدہ ریاض

نظم

اب جو میں نے مڑ کر دیکھا
جشن نہ تھا یہ دیوانوں کا
گرد ہمارے امن کی دیوی
گیت کی حوریں ساز کی پریاں
نغمے اور آواز کی لڑیاں
پیرس کی بد بخت حسینہ
مغرور امریکہ کا سپاہی
لندن کا بدمست شرابی
عیش و طرب کی محبوبائیں
نشۂ مے کی دوشیزائیں
غازہ و رنگ کی معشوقائیں
عطر اور ریشم کی مینائیں
حافظؔ اور غالبؔ کی غزلیں
پشکنؔ اور ٹیگورؔ کی نظمیں
کتنے ناز اور کتنی ادائیں
کتنی شیریں اور لیلائیں
کتنے رانجھے، کتنی ہیریں
کتنے بت، کتنی تصویریں
امن کی کوشش اور تدبیریں
مشرق و مغرب کی تقدیریں
حلقہ باندھے ناچ رہی تھیں

علی سردار جعفری

نظم

فردوس بنائے ہوئے ساون کے مہینے
اک گل رخ و نسریں بدن و سرو سہی نے
ماتھے پہ ادھر کاکل ژولیدہ کی لہریں
گردوں پہ ادھر ابر خراماں کے سفینے
مینہ جتنا برستا تھا سر دامن کہسار
اتنے ہی زمیں اپنی اگلتی تھی دفینے
اللہ رے یہ فرمان کہ اس مست ہوا میں
ہم منہ سے نہ بولیں گے اگر پی نہ کسی نے
وہ مونس و غم خوار تھا جس کے لیے برسوں
مانگی تھیں دعائیں مرے آغوش تہی نے
گل ریز تھے ساحل کے لچکتے ہوئے پودے
گل رنگ تھے تالاب کے ترشے ہوئے زینے
بارش تھی لگاتار تو یوں گرد تھی مفقود
جس طرح مئے ناب سے دھل جاتے ہیں سینے
دم بھر کو بھی تھمتی تھیں اگر سرد ہوائیں
آتے تھے جوانی کو پسینے پہ پسینے
بھر دی تھی چٹانوں میں بھی غنچوں کی سی نرمی
اک فتنۂ کونین کی نازک بدنی نے
گیتی سے ابلتے تھے تمنا کے سلیقے
گردوں سے برستے تھے محبت کے قرینے
کیا دل کی تمناؤں کو مربوط کیا تھا
سبزے پہ چمکتی ہوئی ساون کی جھڑی نے
بدلی تھی فلک پر کہ جنوں خیز جوانی
بوندیں تھیں زمیں پر کہ انگوٹھی کے نگینے
شاخوں پہ پرندے تھے جھٹکتے ہوئے شہ پر
نہروں میں بطیں اپنے ابھارے ہوئے سینے
اس فصل میں اس درجہ رہا بے خود و سرشار
میخانے سے باہر مجھے دیکھا نہ کسی نے
کیا لمحۂ فانی تھا کہ مڑ کر بھی نہ دیکھا
دی کتنی ہی آواز حیات ابدی نے

جوش ملیح آبادی

نظم

کچھ کیا جائے نہ سوچا جائے
مڑ کے دیکھوں تو نہ دیکھا جائے
میری تنہائی کی وحشت سے ہراساں ہو کر
میرا سایہ میرے قدموں میں سمٹ آیا ہے
کون ہے پھر جو مرے ساتھ چلا آتا ہے
میرا سایہ تو نہیں!!
کس کی آہٹ کا گماں
یوں مرے پاؤں کی زنجیر بنا جاتا ہے
دور تا حد نظر شہر کے آثار نہیں
اور دشمن کی طرح
شام تلوار لیے سر پہ چلی آتی ہے
بولتا ہوں تو اچانک کوئی
میری آواز میں آواز ملا دیتا ہے
مجھ کو خود میرے ہی لفظوں سے ڈرا دیتا ہے

امجد اسلام امجد

نظم

یہ تعلیم گر مل بھی جائے تو کیا ہے
یہ اسکول ہے اک خرابوں کی دنیا
سوالوں کی بستی جوابوں کی دنیا
یہ پنسل یہ کاغذ کتابوں کی دنیا
یہ تعلیم گر مل بھی جائے تو کیا ہے
نہ انگلش ہی جانوں نہ سوشل ہی بھائے
نہ بایو ہی سمجھوں نہ ہندی ہی آئے
جو مرضی چلے تو کروں سب کو بائے
یہ تعلیم گر مل بھی جائے تو کیا ہے
مصیبت ہے کیسی سحر کی جگائی
سبھی لوگ سوتے ہیں اوڑھے رضائی
مگر میری قسمت میں ہے منہ دکھائی
یہ تعلیم گر مل بھی جائے تو کیا ہے
برا موڈ اس پر سوا من کا بستہ
اور اس پر جسے دیکھیے رعب کستا
یہاں میرا بچپن ہے ہر شے سے سستا
یہ تعلیم گر مل بھی جائے تو کیا ہے
ذرا دوست سے بات کر لیں تو آفت
کسی وقت چھپ کر گزر لیں تو آفت
اجازت کسی سے اگر لیں تو آفت
یہ تعلیم گر مل بھی جائے تو کیا ہے
نہ فلموں کی باتیں نہ کھیلوں کی باتیں
یہ بیکار کی پاس فیلوں کی باتیں
اصولوں کے قصے جھمیلوں کی باتیں
یہ تعلیم گر مل بھی جائے تو کیا ہے
یہ تعلیم گر مل بھی جائے تو کیا ہے
میرے سامنے سے ہٹا لو کتابیں
مرے ٹیچرو تم سنبھالو کتابیں
پرنسپل کے کاندھوں پہ ڈالو کتابیں

اسنی بدر

نظم

اس نے شاید ٹھیک کہا تھا
پیچھے مڑ کر دیکھو گے تو
پتھر کے بن جاؤ گے
میں نے
پیچھے مڑ کر دیکھ لیا ہے

خلیل تنویر

نظم

شکایت نہ کرنا
اگر یہ زمانہ پکارے تمہیں
اور صدا میری آواز کی گونج ہو
شکایت نہ کرنا
اگر لوگ مڑ مڑ کے دیکھیں تمہیں
اور ہر شکل میں میری مسکان تم کو
دکھائی بھی دے اور سنائی بھی دے
شکایت نہ کرنا
اگر ہر زباں پر
تمہارے بجائے مرا نام ہو
تمہیں میری آنکھوں کی تعریف کرتے ہوئے
سوچنا چاہئے تھا
یہاں سانس لیتے ہوئے خواب
ہر آنکھ کے خواب جیسے نہیں ہیں
یہاں خواب آنکھوں سے بہہ جائیں تو
اشک بنتے نہیں ہیں
پگھلتے نہیں ہیں
تمہیں میرے ہاتھوں کی نرمی کو محسوس کرتے ہوئے
بھولنا تو نہیں چاہئے تھا
کہ اک ہاتھ میں ایک خالی ورق
دوسرے میں قلم ہے
شکایت نہ کرنا
اگر خوش نما روشنائی میں پہلے ورق پر
تمہیں لوگ پڑھ لیں

عنبرین صلاح الدین

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے